سۋرەتتەردى تۇسىرگەندەر – ا.دۇيسەنباەۆ, ە.ۇكىباەۆ
ىقپالداستىقتىڭ باسىم باعىتى
قازاقستان پرەزيدەنتى وسى ۋاقىتقا دەيىن وتكەن كونسۋلتاتيۆتىك كەزدەسۋلەردىڭ ناتيجەسى ايماقتىق ىنتىماقتاستىققا جۇيەلى, جان-جاقتى, ەڭ باستىسى, سەنىمدى سيپات بەرىپ, بۇرىن-سوڭدى بولماعان دەڭگەيگە شىعارعانىن جەتكىزدى.
بىرلەسكەن كۇش-جىگەردىڭ ارقاسىندا جىلدار بويى قوردالانعان ماسەلەلەر شەشىمىن تاۋىپ, ايماقتىڭ تۇراقتىلىعى مەن قاۋىپسىزدىگىن قامتاماسىز ەتۋ ءۇشىن كەشەندى شارالار قابىلدانىپ جاتىر. وسىلاي دەگەن پرەزيدەنت:
– شەكارا, سۋمەن قامتاماسىز ەتۋ, ميگراتسيا ماسەلەلەرى جوسپارلى تۇردە رەتتەلىپ, ءوزارا ساۋداداعى كوپتەگەن كەدەرگى جويىلدى. شەكاراداعى وتكىزۋ پۋنكتتەرى جاڭعىرتىلىپ جاتىر. كولىك قاتىناسىنىڭ مۇمكىندىكتەرى كەڭەيىپ, جاڭا باعىتتار اشىلۋدا. ساۋدا-ەكونوميكالىق جانە ينۆەستيتسيالىق ىقپالداستىق قارقىندى دامىپ كەلەدى, – دەدى.
پرەزيدەنتتىڭ ايتۋىنشا, مادەني-گۋمانيتارلىق بايلانىس مازمۇندىق تۇرعىدان تولىقتىرىلىپ كەلەدى. مەملەكەت باسشىسى مادەنيەت كۇندەرى, قولونەر شەبەرلەرىنىڭ كورمەسى, ۇلتتىق تاعام فەستيۆالدەرى, جاستار فورۋمدارى مەن باسقا دا ءىس-شارالار تۇراقتى تۇردە وتكىزىلىپ كەلە جاتقانىنا نازار اۋداردى.
– وتكەن جىلدار ىشىندە كونسۋلتاتيۆتىك كەزدەسۋلەر ايماقتىڭ حالىقارالىق سۋبەكتىلىگى مەن بىرلىگىن تانىتاتىن, سونداي-اق قازىرگى سىن-قاتەرلەرگە توتەپ بەرۋگە دايىندىعىن كورسەتەتىن ءتيىمدى الاڭعا اينالعانىن سەنىمدى تۇردە ايتا الامىن. ورتالىق ازيا قاشاندا بىرەگەي وركەنيەتتەر توعىسقان ايماق بولعان. ونىڭ جالپى الەمدىك پروگرەستە اتقاراتىن ءرولى زور. بۇگىندە ورتاق تاريحىمىز بەن حالىقتارىمىزدىڭ دۇنيەتانىمىنىڭ ۇقساستىعىنا ارقا سۇيەپ, ورتالىق ازيانىڭ جاڭا كەلبەتىن قالىپتاستىرامىز. ونى كەلەشەككە ۇمتىلاتىن ءارى مول مۇمكىندىكتەر مەكەنى رەتىندە تانىتامىز. بۇل سامميت وسى جولداعى ماڭىزدى بەلەسكە اينالاتىنىنا سەنىمدىمىن, – دەدى پرەزيدەنت.
قاسىم-جومارت توقاەۆ مەملەكەتتەر باسشىلارى ايماقتىق ىنتىماقتاستىقتى, سونىڭ ىشىندە كونسۋلتاتيۆتىك كەزدەسۋلەر فورماتىن دامىتۋ ءۇشىن بارىنشا كۇش-جىگەر جۇمساپ وتىرعانىن جەتكىزدى. قازاقستاننىڭ توراعالىعى اياسىندا قاۋىپسىزدىك پەن ەكونوميكالىق سەرىكتەستىكتى نىعايتۋعا, قوعامداعى ايەلدەردىڭ ءرولىن كۇشەيتۋگە, ساراپتامالىق تۇرعىدان ىقپالداستىقتى كەڭەيتۋگە باعىتتالعان كوپتەگەن بىرلەسكەن ءىس-شارا ۇيىمداستىرىلدى.
– وسى جيىندا 2027 جىلعا دەيىنگى ايماقتىق ىنتىماقتاستى دامىتۋدىڭ جول كارتاسى بەكىتىلەدى. بۇل ءوزارا ىقپالداستىق تەتىكتەرىن جەتىلدىرۋ تۇرعىسىنان ايتۋلى وقيعا بولماق. قۇجات ۇكىمەتتەردىڭ ۇيلەسىمدى جۇمىسىن جەتىلدىرەدى جانە وسى الاڭدا ۇسىنىلعان باستامالاردىڭ ورىندالۋ بارىسىنا باقىلاۋدى كۇشەيتەدى. بۇعان قوسا «ورتالىق ازيا – 2040» وڭىرلىك كووپەراتسياسىن دامىتۋعا باعىتتالعان تاعى ءبىر ماڭىزدى قۇجاتقا قول قويىلادى. وسى جانە وزگە دە شارالار حالىقتارىمىزدىڭ يگىلىگى جولىنداعى جان-جاقتى ايماقتىق ىقپالداستىققا ءبارىمىزدىڭ بەيىلدى ەكەنىمىزدى كورسەتەدى, – دەدى قازاقستان پرەزيدەنتى.
بەرىك ەكونوميكالىق بازا قاجەت
قاسىم-جومارت توقاەۆ قازىرگىدەي كۇردەلى گەوساياسي جانە ەكونوميكالىق جاعدايدا ايماقتاعى ىنتىماقتاستىقتىڭ جوعارى دامۋ قارقىنىن ساقتاۋ وتە ماڭىزدى دەپ سانايدى. وسى ورايدا مەملەكەت باسشىسى ورتالىق ازيانىڭ وركەندەۋىنە ىقپال ەتەتىن بىرقاتار وزەكتى مىندەتكە توقتالدى.
– بۇگىندە حالىقارالىق قاتىناستار جۇيەسىنىڭ ىرگەلى نەگىزدەرى وزگەرىسكە ۇشىراعانىن بايقاپ وتىرمىز. بۇل – قاۋىپتى قۇبىلىس. مۇنداي جاعدايدا ايماقتاعى بەيبىتشىلىك پەن تۇراقتىلىقتى ساقتاۋ ەڭ باستى مىندەت ەكەنى ەستەن شىقپاۋعا ءتيىس. قازىرگى سىن-قاتەرلەردى تەك ساياسي ديالوگ پەن مەملەكەتتەرىمىز اراسىندا ءوزارا سەنىم شارالارىن نىعايتۋ ارقىلى ەڭسەرۋگە بولاتىنى انىق. وسى رەتتە كەيىنگى جىلدارى ءبىر-بىرىمىزگە جاساعان ساپارلارىمىز ناتيجەلى بولدى. بۇل ەلدەرىمىزدىڭ دوستىققا, تاتۋ كورشىلىك قارىم-قاتىناسقا جانە وداقتاستىققا نەگىزدەلگەن وڭىرلىك ىنتىماقتاستىعىنىڭ دەڭگەيى جوعارى ەكەنىن بىلدىرەدى. الايدا وڭىرلىك كووپەراتسيا اياسىندا سىرتقى سەرىكتەستەرمەن جان-جاقتى بايلانىستى جوسپارلى تۇردە كۇشەيتۋ ماڭىزدى. الەمنىڭ جەتەكشى ەلدەرىنىڭ «ورتالىق ازيا پليۋس» فورماتىنا قىزىعۋشىلىق تانىتۋى – وسىنىڭ ايعاعى, – دەدى مەملەكەت باسشىسى.
قاسىم-جومارت توقاەۆ پرەزيدەنتتەردى ورتالىق ازيانى قاۋىپسىز, ىنتىماعى جاراسقان ءارى وركەندەگەن كەڭىستىك رەتىندە ساقتاۋ ءۇشىن بارىنشا كۇش-جىگەر جۇمساۋعا شاقىردى.
پرەزيدەنت اتاعان تاعى ءبىر ماڭىزدى مىندەت – جان-جاقتى ىقپالداستىقتىڭ بەرىك ەكونوميكالىق بازاسىن قالىپتاستىرۋ. كەيىنگى جىلدارى بۇل باعىتتا ەلەۋلى ناتيجەگە قول جەتكىزىلدى. ءوڭىر ىشىندەگى ساۋدا كولەمى بىرتىندەپ ۇلعايىپ كەلەدى. بۇل كورسەتكىش 11 ميلليارد دوللارعا جەتتى. مەملەكەت باسشىسى تاۋار اينالىمىن ارتتىرۋ جانە ونى 15 ميلليارد دوللارعا جەتكىزۋ ماڭىزدى ەكەنىن اتاپ ءوتتى.
– ەلدەرىمىزدىڭ ەكونوميكاسىن دامىتۋعا بىرلەسكەن ءىرى ينفراقۇرىلىم جانە كولىك جوبالارى تىڭ سەرپىن بەرەر ەدى. ءوزارا ءتيىمدى ىنتىماقتاستىقتىڭ مۇنداي وڭ مىسالدارى ايماعىمىزدا قازىردىڭ وزىندە دە بار. ماسەلەن, قىرعىزستانداعى قامباراتا 1-گەس-ءىن, تاجىكستانداعى روگۋن گەس-ءىن, قازاقستان, وزبەكستان جانە تاجىكستاننىڭ گاز جوبالارىن, جاڭا كولىك دالىزدەرىنىڭ قۇرىلىسىن, سونداي-اق باسقا دا ماڭىزدى جوبالاردى اتاۋعا بولادى. بۇدان بولەك شەكارا ماڭى اۋداندارىندا ساۋدا-لوگيستيكا جەلىلەرى مەن ونەركاسىپ حابتارىن دامىتۋ ماڭىزدى. اۋىل شارۋاشىلىعى, لوگيستيكا, توقىما جانە حيميا ونەركاسىبى, قۇرىلىس سەكىلدى پەرسپەكتيۆتى سالالاردا جاڭا كەلىسىمدەر جاساپ, جان-جاقتى سەرىكتەستىگىمىزدى نىعايتۋ قاجەت, – دەدى قازاقستان پرەزيدەنتى.
سونداي-اق مەملەكەت باسشىسى قازاقستاننىڭ ورتالىق ازيا ىسكەرلىك كەڭەسىن قۇرۋ تۋرالى ۇسىنىستى قولدايتىنىن مالىمدەدى. ونىڭ پىكىرىنشە, ايماقتىڭ كولىك-ترانزيت الەۋەتىن ودان ءارى ىلگەرىلەتۋدىڭ, ورتالىق ازيانىڭ كولىك جۇيەسىن دامىتۋ جونىندەگى كەشەندى ستراتەگيانى قابىلداۋدىڭ ءمانى زور ەكەنىن العا تارتتى.
– ترانسكاسپي حالىقارالىق كولىك باعىتى, «سولتۇستىك – وڭتۇستىك» ءدالىزى, ء«بىر جول, ءبىر بەلدەۋ» سەكىلدى باستامالاردىڭ ماڭىزى ايرىقشا. بۇل جوبالارعا ورتالىق ازياداعى بارلىق ەلدىڭ بەلگىلى ءبىر دەڭگەيدە قاتىسى بار. بىرلەسكەن كۇش-جىگەردىڭ ناتيجەسىندە «قازاقستان – تۇرىكمەنستان – يران» تەمىرجول ماگيسترالىنىڭ الەۋەتى دايەكتى تۇردە ارتىپ كەلەدى. قازىر بۇل پارسى شىعاناعىنداعى ەلدەرگە شىعاتىن ەڭ توتە جول سانالادى. سونىمەن قاتار وڭتۇستىك ازيا نارىعىنا شىعۋ ءۇشىن اۋعانستان ارقىلى تەمىرجول سالۋدىڭ كەلەشەگى زور دەپ ەسەپتەيمىز. قازاقستان ءوزىنىڭ كولىك-ترانزيت سالاسىندا اۋقىمدى جۇمىس اتقارىپ جاتىر. 2030 جىلعا دەيىن 11 مىڭ شاقىرىم تەمىرجولدى جاڭعىرتىپ, جاڭادان 5 مىڭ شاقىرىم تەمىرجول سالۋدى جوسپارلاپ وتىرمىز, – دەدى قاسىم-جومارت توقاەۆ.
جاڭا سۋ ساياساتىنىڭ كوكەيكەستىلىگى
ءوڭىردىڭ كۇن تارتىبىندەگى تاعى ءبىر ماڭىزدى ماسەلە – سۋ-ەنەرگەتيكا رەسۋرستارىن راتسيونالدى پايدالانۋ. مەملەكەت باسشىسى سۋدى پايدالانۋدىڭ تەڭ قۇقىلى ءارى ءادىل تارتىبىنە, ءوزارا مىندەتتەمەنى مۇلتىكسىز ورىنداۋ ەرەجەسىنە نەگىزدەلگەن جاڭا سۋ ساياساتىن قالىپتاستىرۋ كەرەك دەپ سانايدى.
– ورتالىق ازيا ەلدەرىنە ارنالعان سۋ-ەنەرگەتيكا كونسورتسيۋمىن قۇرۋ جانە گيدروەنەرگەتيكالىق نىسانداردى بىرلەسە سالۋ باستاماسى سۋ شارۋاشىلىعىنداعى كوپجاقتى ىنتىماقتاستىققا نەگىز بولادى. سۋدى ءبولۋ مەن ەسەپكە الۋدى تسيفرلاندىرۋ, عارىشتىق مونيتورينگ تەحنولوگيالارىن ەنگىزۋ, جۇيەلى عىلىمي جۇمىستار جۇرگىزۋ ماڭىزدى مىندەتتەردىڭ ساناتىنا جاتادى, – دەدى مەملەكەت باسشىسى.
قاسىم-جومارت توقاەۆتىڭ ايتۋىنشا, قازاقستان ءبىلىم بەرۋ, عىلىم, مادەنيەت جانە ادامي كاپيتالدى دامىتۋ سالالارىنداعى بەسجاقتى ىنتىماقتاستىقتى كەڭەيتۋدى ءاردايىم قۇپتايدى. قازىرگى ۋاقىتتا ورتالىق ازيادا بىرىڭعاي جوعارى ءبىلىم كەڭىستىگى قالىپتاسىپ كەلەدى.
– بۇگىندە قازاقستاندا ايماقتاعى ەلدەردەن كەلگەن 9 مىڭعا جۋىق ستۋدەنت ءبىلىم الادى. ءبىز ورتالىق ازيا جاستارىنىڭ ەلىمىزدە جوعارى ءبىلىم الۋعا ۇمتىلىسىن باعالايمىز. وسى كۇنى ەلىمىز اقش, ەۋروپا, قىتاي, رەسەي جانە وڭتۇستىك كورەيانىڭ ونداعان تانىمال ۋنيۆەرسيتەتىمەن ستراتەگيالىق سەرىكتەستىك ورناتتى. قازاقستاننىڭ كوپتەگەن ايماعىندا شەتەلدىك وقۋ ورىندارىنىڭ فيليالدارى جۇيەلى تۇردە اشىلىپ, ستۋدەنتتەردى بەلسەندى قابىلداي باستادى. بۇعان قوسا قازاقستاندا زەرتتەۋ ۋنيۆەرسيتەتتەرىنىڭ سانى ارتىپ, تەحنوپاركتەر مەن ينجەنەرلىك ورتالىقتار ىسكە قوسىلىپ جاتىر. ءبىز ورتالىق ازيا جانە كاۆكاز ەلدەرىنىڭ جاستارىن وسى مۇمكىندىكتى پايدالانىپ, حالىقارالىق دەڭگەيدە سۇرانىسقا يە قوس ديپلومدى ءبىلىم الۋعا شاقىرامىز, – دەدى مەملەكەت باسشىسى.
سەنىم مەن ديالوگ ۇستىنى
قاسىم-جومارت توقاەۆ اقپاراتتىق-ساراپتامالىق سالاداعى ىقپالداستىقتى جانداندىرۋ قاجەت ەكەنىنە نازار اۋداردى. مەملەكەت باسشىسى بىرلەسكەن مەدياونىمدەردى شىعارۋ جۇمىستارىن قولعا الۋ جونىندە ۇكىمەتتەرگە تاپسىرما بەرۋدى ۇسىندى.
– ورتاق تاريحي سيۋجەتتەردى ەكرانيزاتسيالاۋعا, حالىقتارىمىزدىڭ دوستىعى مەن ىنتىماعىن دارىپتەۋگە ەرەكشە ءمان بەرۋ كەرەك. ءبىز جالپىوڭىرلىك تەلەارنا جانە اقپاراتتىق ينتەرنەت-پورتالىن اشۋ ماسەلەسىن تالقىلادىق. بۇل رەتتە ورتالىق ازيا ەلدەرىنىڭ تەلەحابار تاراتۋ سالاسىنداعى ىنتىماقتاستىعى تۋرالى كەلىسىمدى ازىرلەپ, قول قويۋدىڭ ماڭىزى زور, – دەدى قاسىم-جومارت توقاەۆ.
پرەزيدەنت قازاقستاننىڭ وڭىرلىك سەرىكتەستىكتى جان-جاقتى نىعايتۋدى جانە ورتالىق ازيانىڭ الەمدىك ارەناداعى ءرولىن ارتتىرۋدى كوزدەيتىن ستراتەگيالىق باعدارى وزگەرمەيتىنىن اتاپ ءوتتى.
– ءبىز ۇلتتىق دەڭگەيدە «تابىستى ورتالىق ازيا – تابىستى قازاقستان» فورمۋلاسىن بەرىك ۇستانامىز. ءوڭىرىمىزدىڭ بولاشاعى تەك ەلدەرىمىز اراسىنداعى سەنىمدى ديالوگ پەن ىنتىماقتاستىققا, بارلىق ىشكى جانە سىرتقى سىن-قاتەرلەرگە لايىقتى جاۋاپتى بىرلەسىپ ىزدەۋگە بايلانىستى ەكەنىنە سەنىمدىمىن, – دەدى قازاقستان پرەزيدەنتى.
كونسۋلتاتيۆتىك كەزدەسۋدە قىرعىز رەسپۋبليكاسىنىڭ پرەزيدەنتى سادىر جاپاروۆ, تاجىكستان پرەزيدەنتى ەمومالي راحمون, تۇرىكمەنستان پرەزيدەنتى سەردار بەردىمۇحامەدوۆ جانە وزبەكستان پرەزيدەنتى شاۆكات ميرزيوەۆ ءسوز سويلەدى.
جيىن سوڭىندا مەملەكەت باسشىسى وزبەكستان پرەزيدەنتى شاۆكات ميرزيوەۆكە كونسۋلتاتيۆتىك كەزدەسۋدىڭ كەلەسى توراعالىق مىندەتىن تابىستى اتقارۋىنا تىلەكتەستىك ءبىلدىردى.
وڭىرلىك ىنتىماقتاستىقتىڭ ورتاق ۇستانىمى
بۇدان كەيىن پرەزيدەنت ورتالىق ازيا مەملەكەتتەرى باسشىلارىنىڭ VI كونسۋلتاتيۆتىك كەزدەسۋىنىڭ كەڭەيتىلگەن قۇرامداعى وتىرىسىنا قاتىستى.
جيىنعا قۇرمەتتى قوناق رەتىندە ازەربايجان پرەزيدەنتى يلحام اليەۆ جانە بۇۇ باس حاتشىسىنىڭ ارنايى وكىلى, ورتالىق ازيا بويىنشا پرەۆەنتيۆتى ديپلوماتيا جونىندەگى وڭىرلىك ورتالىعىنىڭ باسشىسى كاحا يمنادزە دە كەلدى.
مەملەكەت باسشىسىنىڭ ايتۋىنشا, كونسۋلتاتيۆتىك كەزدەسۋدىڭ التىنشى رەت وتكىزىلۋى تاراپتاردىڭ باۋىرلاس حالىقتار اراسىنداعى عاسىرلار بويىنا جالعاسقان دوستىق بايلانىستى نىعايتۋعا, كوپجاقتى ىنتىماقتاستىقتى ودان ءارى كەڭەيتۋگە جانە حالىقارالىق ارەناداعى ىقپالداستىقتى كۇشەيتۋگە بەيىلدى ەكەنىن كورسەتەدى.
– 2018 جىلى استانادا وتكەن العاشقى كەزدەسۋدەن بەرى بىرلەسكەن كۇش-جىگەردىڭ ارقاسىندا بۇل جيىننىڭ دامۋىندا ايتارلىقتاي جەتىستىكتەرگە قول جەتكىزىلدى. بۇعان وڭىرلىك ىنتىماقتاستىقتى ارتتىرۋداعى ماڭىزدى شەشىمدەر قابىلدانعان بۇرىنعى بەس ءسامميتتىڭ قورىتىندىلارى ايقىن دالەل, – دەدى مەملەكەت باسشىسى.
قازاقستان پرەزيدەنتى الەمدەگى كۇردەلى ۇدەرىستەر جاعدايىندا وڭىرلىك ىنتىماقتاستىقتى ودان ءارى ىلگەرىلەتۋ جونىندە ورتاق ۇستانىم قالىپتاستىرۋ ماڭىزدى دەپ سانايدى.
– ء«ححى عاسىردا ورتالىق ازيانى دامىتۋ ماقساتىنداعى دوستىق, تاتۋ كورشىلىك جانە ىنتىماقتاستىق تۋرالى شارتتىڭ» ءمانى ارتىپ كەلەدى. مەملەكەتتەرىمىز كوپجاقتى قۇرىلىمدار, ەڭ الدىمەن, بۇۇ اياسىندا ورتاق ۇستانىمدارعا سۇيەنە وتىرىپ ارەكەت ەتۋگە ءتيىس. ەلدەرىمىز الەۋەتىن بىرىكتىرسە, ءبىز ورنىقتى دامۋ ماقساتتارى سالاسىنداعى كۇن ءتارتىبىن جۇزەگە اسىرۋعا ەلەۋلى ۇلەس قوسا الامىز. وسى ماڭىزدى ماقساتقا قولداۋ رەتىندە بىرىككەن ۇلتتار ۇيىمىنىڭ 80 جىلدىعى قارساڭىندا ورتالىق ازيادا ورنىقتى دامۋ ماقساتتارىنا قول جەتكىزۋ تۋرالى بۇۇ باس اسسامبلەياسىنىڭ قارارىن قابىلداۋ جونىندە باستاما كوتەرۋدى ۇسىنامىن. بىرىككەن ۇلتتار ۇيىمىنىڭ جوعارى لاۋازىمدى وكىلى, قۇرمەتتى كاحا يمنادزە مىرزانىڭ وسى سامميتكە قاتىسۋى يگى داستۇرگە اينالىپ, «ورتالىق ازيا – بۇۇ» باعىتىنداعى تىعىز ىقپالداستىققا جول اشادى دەپ ۇمىتتەنەمىن, – دەدى مەملەكەت باسشىسى.
سونىمەن بىرگە پرەزيدەنت كوپجاقتى ىنتىماقتاستىقتىڭ بەرىك ەكونوميكالىق نەگىزىن قالىپتاستىرۋ كەزەك كۇتتىرمەيتىن مىندەتتىڭ ءبىرى دەپ ەسەپتەيدى.
– ورتالىق ازيا ەلدەرىندە ءوزارا ءتيىمدى ىنتىماقتاستىقتى كەڭەيتۋ ءۇشىن مۇمكىندىك مول. ەكولوگيا جانە كليماتتىڭ وزگەرۋىمەن كۇرەس سالاسىنداعى ىقپالداستىق اسا ماڭىزدى. بارلىق ەل ۇقساس سىن-قاتەرلەرمەن بەتپە-بەت كەلىپ وتىر. سوندىقتان ءوزارا ىقپالداستىقتى كەڭەيتۋدىڭ, ۇيلەسىمدى جۇمىستى كۇشەيتۋدىڭ جانە كليماتتىق كۇن تارتىبىندەگى ماسەلەلەر بويىنشا تاجىريبە الماسۋدىڭ ءمانى زور. وسى مۇمكىندىكتى پايدالانا وتىرىپ, ازەربايجان پرەزيدەنتى, قۇرمەتتى دوسىمىز يلحام گەيدار وعلىنىڭ بيىل كۇزدە COP29 جاھاندىق كليماتتىق كونفەرەنتسياسىن تابىستى وتكىزۋىنە تىلەكتەستىك بىلدىرەمىن, – دەدى قاسىم-جومارت توقاەۆ.
پرەزيدەنت ەلىمىزدىڭ وڭىرلىك ىنتىماقتاستىقتى جان-جاقتى نىعايتۋ جولىنداعى ستراتەگيالىق باعدارى وزگەرمەيتىنىن راستادى. سونداي-اق بۇگىن قابىلدانعان شەشىمدەر جانە ونىڭ الداعى ۋاقىتتا ءتيىمدى جۇزەگە اسىرىلۋى عاسىرلاردان تامىر تارتاتىن دوستىق پەن ءوزارا قولداۋ رۋحىنداعى كوپجاقتى سەرىكتەستىگىمىزدى ودان ءارى تەرەڭدەتۋگە سەپتىگىن تيگىزەتىنىنە سەنىم ءبىلدىردى.
جيىندا ازەربايجان پرەزيدەنتى يلحام اليەۆ پەن بۇۇ-نىڭ ورتالىق ازيا بويىنشا پرەۆەنتيۆتى ديپلوماتيا جونىندەگى وڭىرلىك ورتالىعىنىڭ باسشىسى كاحا يمنادزە ءسوز سويلەدى. ال سامميت سوڭىندا قاسىم-جومارت توقاەۆ كونسۋلتاتيۆتىك كەزدەسۋدىڭ توراعاسى رەتىندە ورتالىق ازيا مەملەكەتتەرى باسشىلارىنىڭ اتىنان وزبەكستان پرەزيدەنتى شاۆكات ميرزيوەۆتى قۇرمەت بەلگىسىمەن ماراپاتتادى.
