شىرشىق قالاسىندا وتاندىق جوعارى وقۋ ورنى فيليالىنىڭ اشىلۋى ەكى ەلدىڭ عىلىم-ءبىلىم سالاسىنداعى ىنتىماقتاستىعىن ارتتىرادى. بۇل تۋرالى عىلىم دوكتورى, عىلىم جانە جوعارى ءبىلىم ەكس-ۆيتسە-ءمينيسترى قۋانىش ەرعاليەۆ الەۋمەتتىك جەلىلەردەگى پاراقشاسىندا جازدى.
«مۇحتار اۋەزوۆ اتىنداعى وڭتۇستىك قازاقستان زەرتتەۋ ۋنيۆەرسيتەتىنىڭ وزبەكستاننىڭ شىرشىق قالاسىنداعى فيليالىنىڭ اشىلعانىنا وتە قۋانىشتىمىن. بۇل ەكى ەلدىڭ عىلىم-ءبىلىم سالاسىنداعى ىنتىماقتاستىعىن ارتتىرۋعا جاقسى اسەر ەتەتىنى ءسوزسىز. بۇل ستراتەگيالىق يدەيانىڭ جۇزەگە اسۋىنا وڭتۇستىك قازاقستان زەرتتەۋ ۋنيۆەرسيتەتىنىڭ بۇرىنعى رەكتورى داريا پەرنەشقىزى قوجامجاروۆا زور ۇلەس قوستى. وزبەكستانعا ىسساپارمەن بىرنەشە رەت بارىپ, فيليال اشۋ ماسەلەسىن كوتەردى, كەلىسسوزدەر جۇرگىزدى. مەن دە عىلىم جانە جوعارى ءبىلىم ۆيتسە-ءمينيسترى بولعان كەزىمدە دە 5-6 رەت بارىپ, ساياسي دەڭگەيدەگى كەزدەسۋلەردە فيليال اشۋ تۋرالى, عيمارات بەرۋ ماسەلەسى, نارىققا كادر دايارلاۋ, زاڭنامالىق ماسەلەلەر بويىنشا كەلىسسوزدەر جۇرگىزدىم», دەدى عالىم.
اسسيستەنت پروفەسسور قۋانىش اسىلحان ۇلىنىڭ ايتۋىنشا, وتاندىق جوو فيليالى تەحنيكالىق, IT-تەحنولوگيالار باعىتىنداعى مامانداردى دايارلاۋعا باسىمدىق بەرەدى.
«شىرشىق – وزبەكستاننىڭ ونەركاسىبى دامىعان, قازاقتار كوپ شوعىرلانعان قالالارىنىڭ ءبىرى. بۇل وڭىردە حيميا ونەركاسىبى, ماشينا جاساۋ, مەتالل وڭدەۋ سياقتى سالالار قارقىندى دامىعان. Auezov University فيليالى وزبەكستاننىڭ ەڭبەك نارىعىندا سۇرانىسقا يە, باسەكەگە قابىلەتتى مامانداردى دايارلاۋدى جۇزەگە اسىراتىن بولادى. تەحنيكالىق, IT-تەحنولوگيالار, حيميا جانە تاماق ونەركاسىبى باعىتتارى بويىنشا كادر دايارلاۋدى جۇزەگە اسىرادى. سونداي-اق جوعارى ءبىلىم سالاسىنداعى بۇل ىنتىماقتاستىق شىمكەنت قالاسىنىڭ جانە وڭتۇستىك ايماقتىڭ ەكونوميكاسىنىڭ ستراتەگيالىق دامۋىنا ۇلەس قوساتىنىن اتاپ وتكىم كەلەدى», دەدى ول.
سونداي-اق ەكس-ۆيتسە-مينيستر وزگە ەلدە ۋنيۆەرسيتەت فيليالىن اشۋ وتاندىق جوو ءۇشىن جوعارى كورسەتكىش ەكەنىن اتاپ ءوتتى.
