ءالي مۇحاممەد ءتۇرلى روليك ءتۇسىرىپ, ارنايى بلوگ جۇرگىزەدى. كوكونىس دۇكەنى تۋرالى ءتۇرلى كونتەنت ازىرلەپ, ەلدى ەلىكتىرىپ اكەتەدى. ءاليدىڭ ەرەكشەلىگى سول – ساۋدا-ساتتىق كەزىندە ادامنىڭ تابەتىن اشاتىن ولەڭدەردى لەزدە قۇراپ, ايتىپ بەرەدى. جەتىسۋلىق ازاماتتىڭ جىگەرلى ىسىنە سۇيسىنبەۋ مۇمكىن ەمەس. ءتىپتى, تالدىقورعاندىقتار ءاليدى ارنايى ىزدەپ ورتالىققا بارادى. بازاردا جوق بولسا, كۇتۋگە ءازىر. ونىڭ ساتقان ءونىمى وبلىس ورتالىعىنىڭ ەڭ ءدامدى تاۋارلارىنىڭ ءبىرى. ماڭايىنداعى ساۋداگەرلەر دە جاس كاسىپكەردىڭ جارناماسىنا تاۋەلدى. باعاسىنا كەلىسسە, ارىپتەستەرىنىڭ دە قولىن قاقپايدى.
«وسىدان ون جىل بۇرىن كەلىنشەگىم ەكەۋىمىز شاعىن ساۋدا دۇكەنىن اشىپ, وسى سالاعا بەت بۇردىق. مىنە, سودان بەرى جەمىس-جيدەك ساتىپ كەلە جاتىرمىز. ال الەۋمەتتىك جەلىگە شىققانىما ءبىر جىل عانا بولدى. ونىڭ ءوزى دە قىزىق وقيعا. جاقىن دوسىم حافيز ۇيالى تەلەفونىنا ءتۇسىرىپ, الەۋمەتتىك جەلىگە سالىپ جىبەردى. سودان تارالىم ۇدەپ, تۇتىنۋشىلار سانى ارتا ءتۇستى. وسىلايشا, مۇنى ءارى قاراي دامىتايىن دەگەن وي كەلدى. قوعام جاقسى قابىلدادى. كۇننىڭ ىستىعىنا قاراماي, مەنىڭ ولەڭدەرىمدى تىڭداپ تۇرادى», دەيدى ءا.مۇحاممەد.
وڭىردەگى اپا-اتالار بازارعا ارنايى كەلىپ, ءاليدىڭ ولەڭدەرىنە قۇلاق تۇرەدى ەكەن. ونەرىن تاماشالاۋ ءۇشىن باسقا قالادان ات ارىتىپ جەتەتىندەر دە قانشاما. ولار ساۋداگەرمەن سۋرەتكە تۇسۋگە ىنتىق.
ايتتىق قوي, الدى قاشان كورسەڭ قاربالاس. وندايدا كەيىپكەرىمىز:
«جاقسى كورەم, اپكەم مەنەن جەزدەمدى,
ۇيگە بۇگىن جەمىس الار كەز كەلدى.
ءالي جاققا بۇگىن كەلە بەرىڭىز,
ول باعاسىن تۇسىرەم دەپ ءسوز بەردى» دەپ ولەڭ قۇراپ جىبەرەدى.
«ەكى بالام – ءبىر ۇل, ءبىر قىزىم بار. ەكى بالدىرعانىمنىڭ بولاشاعى ءۇشىن تىنباي ەڭبەك ەتۋگە ءازىرمىن. سودان با ۇنەمى ويىما كرەاتيۆتى يدەيالار كەلەدى. ونى بىردەن ىسكە اسىراماساڭىز, ساۋداعا الدانىپ كەتەسىز. سودان ويداعى دۇنيەم ىسكە اسپاي قالادى. بەلگىلى ءبىر ۋاقىتتى تاڭدامايمىن, جۇمىس اراسىندا قولىم قالت بوساعاندا بەينەروليكتەر ءتۇسىرىپ, الەۋمەتتىك پاراقشاما سالامىن», دەيدى جاس ساۋداگەر.
بۇگىندە كەيىپكەرىمىزدىڭ «Instagram»-داعى پاراقشاسىندا 124 مىڭ جازىلۋشى بار. وعان قوسىمشا «YouTube» جانە «Tik Tok» پاراقشالارىنا دا قىزىقتى كونتەنت ءتۇسىرىپ تۇرادى. بلوگەر رەتىندە تالدىقورعان قالاسىنداعى ءارتۇرلى ساۋدا نۇكتەلەرىن, دۇكەندەر مەن برەندتەردى جارنامالايدى. ەرىنبەي جاساعان ەڭبەكتىڭ ناتيجەسىندە وبلىس ورتالىعىنداعى «كوكبازار» بازارىنان جەكە كوكونىس دۇكەنىن دە اشقان.
«ساتۋشىنىڭ جۇمىسى وڭاي ەمەس. جۇمىس تاڭەرتەڭ ەرتە باستالىپ, كەشكە دەيىن جالعاسۋى مۇمكىن. ساۋدا ۇقىپتىلىقتى, شىدامدىلىقتى, فيزيكالىق كۇش پەن ادامدارمەن قارىم-قاتىناستا ۇلكەن تاجىريبەنى تالاپ ەتەدى. كۇن سايىن بىزگە ءارتۇرلى ادام كەلەدى. ءاربىر ساتىپ الۋشىعا وزىندىك كوزقاراس قاجەت. بۇل دا ءبىزدىڭ تاراپىمىزدان وراسان زور ەڭبەك دەر ەدىم. بىراق ماعان وسى جۇمىسىم ەرەكشە ۇنايدى», دەيدى ءوزى.
تۇتىنۋشىلارعا كوتەرىڭكى كوڭىل كۇي سىيلاپ جۇرگەن جاس ساۋداگەر بولاشاقتا ۇلكەن ساۋدا ءۇيىن اشۋعا نيەتتى. ونىڭ ايتۋىنشا, بارلىق قىزىعۋشىلىق تۇتىنۋشىنىڭ ەموتسياسىندا جاتىر.
«قازىر ادامدارعا ازداپ نازار جەتىسپەيدى. ءبىر-بىرىمىزگە ءسال دە بولسا كوڭىل بولسەك, دۇنيەدە ز ۇلىمدىق از بولار ەدى. ارەكەتىم ادامدارعا جاقسى كوڭىل كۇي سىيلاپ, جان سارايىن سەرگىتىپ جاتسا, مەنىڭ دە جانىم جاي تابادى», دەيدى ءالي.
زاڭ سالاسىندا ءبىلىم العان جاس جىگىتتىڭ قارەكەتىنە قايران قالاسىز. قۇددى جانىپ تۇرعان وت سەكىلدى. تۇتىنۋشىنىڭ نازارىن بىردەن وزىنە تارتىپ الادى. ال ساۋدا دا بىرەۋدىڭ نازارىن وزىنە قاراتا ءبىلۋ – ۇلكەن جەتىستىكپەن پارا-پار.
جەتىسۋ وبلىسى
