جوبانىڭ باس دەمەۋشىسى – قورداعى كومپانيالار توبىنىڭ بىرىڭعاي قايىرىمدىلىق وپەراتورى – «Samruk-Kazyna Trust» وكىلدەرى ەلورداداعى قورىتىندى شارادا جوبانىڭ ەكىنشى كەزەڭىنە قاتىسۋ باقىتى بۇيىرعان 200 بالامەن جۇزدەستى. ءوز كەزەگىندە, اسەرلى ساپاردان ورالعان جاس ساياحاتشىلار تۋعان ەلىنىڭ سۇلۋلىعىنا, ونىڭ تاريحىنا بويلاپ, قانىعۋعا, دوستار تابۋعا جانە جاڭا ءبىلىم الۋعا بەرىلگەن مۇمكىندىك ءۇشىن ۇيىمداستىرۋشىلار تاراپىنا شىن جۇرەكتەن العىس ءبىلدىردى. بالالاردىڭ تەڭ جارتىسى قوردىڭ شالعاي اۋداندارداعى وندىرىستىك كاسىپورىن قىزمەتكەرلەرىنىڭ بالالارى بولسا, قالعان بولىگى سۋ تاسقىنىنان زارداپ شەككەن اۋىلدارداعى كوپبالالى جانە تۇرمىسى تومەن, تولىق ەمەس وتباسىلارداعى بالالار. سونىمەن قاتار جوبانىڭ تاربيەلىك-مازمۇندىق جاعىنا پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا اتسالىسقانىن اتاپ وتكەن ابزال.
ساياحاتقا ەڭ كوبى اتىراۋ وبلىسىنان – 93,سولتۇستىك قازاقستان وبلىسىنان – 35, باتىس قازاقستان وبلىسىنان – 35, اقتوبە وبلىسىنان – 40, قوستاناي وبلىسىنان – 27, اقمولا وبلىسىنان – 32, قاراعاندى وبلىسىنان – 20, ۇلىتاۋ وبلىسىنان – 4, ماڭعىستاۋ وبلىسىنان – 21, قىزىلوردا وبلىسىنان – 9, شىعىس قازاقستان وبلىسى مەن اباي وبلىسىنان – 28, الماتى وبلىسىنان – 22, تۇركىستان وبلىسىنان – 10, پاۆلودار وبلىسىنان – 14, جامبىل وبلىسىنان – 9, شىمكەنت قالاسىنان 1 بالا قاتىستى.
«كوپتەگەن قىزىقتى جەردى ارالاپ, جاڭا نارسەلەرگە قانىقتىق. ەلىمىزدىڭ تابيعاتى دا, ادامدارى دا تاماشا ەكەنىنە كوزىمىز جەتە ءتۇستى. بالالاردىڭ كوبى اۋىلدارىنان العاش رەت وسىنداي ساپارعا شىعىپ وتىر. سوندىقتان سىزدەر بالالاردىڭ ارمانىن ورىندادىڭىزدار», دەيدى جوباعا پاۆلودار وبلىسىنان قاتىسقان ءاسانالى مەن ءنۇرالى ادىلبەك.
سونىمەن قاتار قاتىسۋشىلار «تازا قازاقستان» جالپىۇلتتىق اكتسياسىنا ءۇن قوسىپ, ساپار بويى ەكولوگيالىق ءومىر سالتىن قالىپتاستىردى. وزدەرى بولعان قالالاردا 200 كيلودان استام تۇرمىس قالدىعىن قايتا وڭدەۋگە تاپسىردى. ەكولوگيا تاقىرىبىندا شەبەرلىك شاراسى وتكىزىلىپ, مەكتەپ جاسىنداعى جاس ساياحاتشىلار قوقىستى دۇرىس سۇرىپتاۋدى, ءارى قاراي قالاي كادەگە جاراتۋ كەرەكتىگىن ۇيرەندى. بۇل رەتتە ۆاگوندارعا تۇرمىس قالدىعى تۇرلەرىنە بايلانىستى ارنايى كونتەينەرلەر ورناتىلدى.
35 مىڭ اۋىل تۇرعىنى تەگىن مەديتسينالىق-قۇقىقتىق كومەك الدى
بۇگىندە قور قولداۋىمەن ناعىز حالىقتىق جوبا – «سالاماتتى قازاقستان» مەديتسينالىق پويىزى ماڭعىستاۋ, اتىراۋ, اقتوبە, باتىس قازاقستان مەن قوستاناي وبلىستارىنىڭ شالعايداعى تۇرعىندارىنا شاراپاتىن تيگىزدى. قازىرگى تاڭدا پويىز ۇجىمى ساپارىن اقمولا جانە سولتۇستىك قازاقستان وڭىرلەرىندە جالعاستىرىپ جاتىر.
34 331 ازاماتتى (ونىڭ ىشىندە 10 051 بالا) اقىسىز مەديتسينالىق قىزمەتپەن قامتىعان دارىگەرلەر ەڭبەگىنەن تىس, مەدياتور مەن زاڭگەر 1 811 ارىزدى قاراستىرىپ, جەرگىلىكتى ازاماتتاردىڭ قۇقىقتىق, ەڭبەك كيكىلجىڭدەرىن شەشۋگە كۇش سالدى. ماسەلەن, سقو-دا پويىزداعى ايەلدەر دارىگەرىنە جۇگىنگەن 18 جاستاعى قىز بالانى ۋلترادىبىستىق تەكسەرۋ بارىسىندا جاتىردىڭ بولماۋىنا بايلانىستى سيرەك كەزدەسەتىن دياگنوز قويىلىپ, ناۋقاسقا قوسىمشا قارالۋعا كەڭەس بەرىلدى. بۇل رەتتە قۇرامداعى اق حالاتتىلار بارلىق نازىك جاندى دەنساۋلىعىنا جاۋاپكەرشىلىك تانىتىپ, جوسپارلى تەكسەرىستەردەن ۋاقتىلى وتۋگە شاقىرادى. اقكول ستانساسىندا پويىز زاڭگەرلەرى ءۇي قۇجاتتارى بويىنشا باسىندا داۋ تۋىنداعان تۇرعىنعا سوتقا مەنشىك قۇقىعىن راسىمدەۋ جونىندە ارىز جازۋعا, بارلىق قاجەتتى قۇجاتىن رەتتەۋگە كومەكتەستى.
سونداي-اق مادەنيەت جانە اقپارات مينيسترلىگىنىڭ قولداۋىمەن ءىرى ستانسالاردا قايىرىمدىلىق كونتسەرتى ءوتىپ جاتىر. وسىعان دەيىن رەسپۋبليكالىق دەڭگەيدەگى ارتىستەردىڭ ونەر كورسەتۋىمەن كونتسەرتتەر اقمولا مەن قوستاناي وبلىستارىندا ۇيىمداستىرىلدى.
شەكارالاس اۋداندارعا دەمەۋ
شىعىس قازاقستان وبلىسىنىڭ كاتونقاراعاي مەن زايسان اۋداندارىندا قور قولداۋىمەن ەكى بىردەي سپورت الاڭى قولدانىسقا بەرىلدى. الەۋمەتتىك جوبانىڭ بۇقارالىق سپورتتى دامىتۋدان بولەك, ستراتەگيالىق جانە يدەولوگيالىق ماڭىزى زور.
اۋدانداردا العاش رەت بوي كوتەرگەن سپورت الاڭدارىن حالىق كوپتەن كۇتتى. ەندى اتالعان نىسانداردا 20 مىڭنان اسا تۇرعىن سالاماتتى ءومىر سالتىن ۇستانىپ, ءتۇرلى تۋرنير وتكىزۋگە مۇمكىندىك الىپ وتىر.
الاڭداردىڭ ءاربىرىنىڭ جالپى اۋماعى 1,6 مىڭ شارشى مەتردى قۇرايدى. وندا جاساندى كوگالمەن كومكەرىلگەن اۋماعى ۇزىندىعى – 40, ەنى 20 مەتر بولاتىن فۋتبول جانە ۇزىندىعى – 24, ەنى 16 مەتر بولاتىن باسكەتبول الاڭدارى, تولىقتاي قۇرىلعىلارمەن قامتىلعان ۆوركاۋت ايماعى بار. الاڭنىڭ جان-جاعى قورشالىپ, اباتتاندىرىلادى. ايتا كەتەيىك, اشىلۋدان سوڭ شاعىن فۋتبولدان تۋرنير ءوتتى. يگىلىكتى ىسكە مۇرىندىق بولىپ كەلگەن ءماجىلىس دەپۋتاتى ەرلان سايروۆ پەن قازاقستان فۋتبول فەدەراتسياسىنىڭ پرەزيدەنتى ادىلەت بارمەنقۇلوۆ «سامۇرىق-قازىنا» اق كومپانيالار توبىنىڭ باستاماسىنا جوعارى باعا بەردى.
«شەكارالاس ايماقتاردىڭ ينفراقۇرىلىمىن دامىتۋ ماڭىزدى. ەل بولاشاعى جاستاردىڭ بويىندا مەملەكەتتىك, ۇلتتىق رۋحتى قالىپتاستىرۋىمىز كەرەك. سونىڭ ءبىر تەتىگى – سپورتقا باۋلۋ. بۇگىندە «Samruk-Kazyna Trust» قورى ەكى اۋدانعا بىردەي سپورت الاڭدارىن سالىپ بەرىپ وتىر», اتاپ ءوتتى ەرلان سايروۆ.
«Samruk-Kazyna Trust» كق ءباسپاسوز ورتالىعى
