سەناتور الدىمەن استانا قالاسىنداعى بايقوڭىر اۋداندىق اكىمدىگىنىڭ اپپاراتىمەن جانە تۇرعىندارىمەن, سونداي-اق پوليتسيا بولىمشەسىنىڭ وكىلدەرىمەن كەزدەستى. كەزدەسۋگە قاتىسۋشىلار اۋدان ومىرىندەگى الەۋمەتتىك ماسەلەلەردى, جاڭارتۋ باعدارلاماسىن ىسكە اسىرۋ مەن پوليتسيا جۇمىسىنىڭ تيىمدىلىگىن ارتتىرۋ جاعدايىن تالقىلادى.
ا.لۋكين بايقوڭىر اۋدانىن ودان ءارى وركەندەتۋدىڭ مۇمكىندىگى زور ەكەنىن اتاپ ءوتتى. ينفراقۇرىلىمدى جاقسارتۋ, ءومىر سۇرۋگە قولايلى جاعداي جاساۋ جانە تۇراقتى الەۋمەتتىك-ەكونوميكالىق دامۋدى قامتاماسىز ەتۋ ماقساتىندا قارقىندى جۇمىستار قولعا الىنعان. دەپۋتات سەناتتىڭ زاڭ شىعارۋ قىزمەتى, ونىڭ ىشىندە ازاماتتاردىڭ قۇقىقتارىن قورعاۋ جانە ولاردىڭ ءال-اۋقاتىن جاقسارتۋعا باعىتتالعان زاڭدار تۋرالى كەزدەسۋگە قاتىسۋشىلارعا ايتىپ بەردى.
نۇرا اۋدانىنىڭ تۇرعىندارىمەن كەزدەسۋدە الەۋمەتتىك سالا, قۇرىلىس جانە ەكولوگيالىق احۋالدى جاقسارتۋ ماسەلەلەرى تالقىلاندى. «وتكەن جىل نۇرا اۋدانى ءۇشىن اسا ماڭىزدى بولدى. حالىقتى الەۋمەتتىك قولداۋ مەن ينفراقۇرىلىمدى دامىتۋدا بىرقاتار وڭ ناتيجەگە قول جەتكىزدىك. اۋدان قارقىندى تۇردە دامىپ, ءوسىپ-وركەندەۋ جالعاسىپ وتىر. ازاماتتارعا قولايلى جاعداي جاساۋ ءۇشىن اۋقىمدى ىستەر قولعا الىنىپ جاتىر. ەكولوگيالىق جاعدايدى جاقسارتۋ, قۇرىلىس جوبالارىن دامىتۋ جانە الەۋمەتتىك قولداۋدى قامتاماسىز ەتۋدە قاجىرلى قىزمەت ەتىپ كەلەمىز. ءاربىر تۇرعىن ءوز ۇيىندە قاۋىپسىز ءارى جايلى سەزىنۋى ءتيىس», دەدى ا.لۋكين.
