يادرولىق قارۋسىزدانۋ, يادرولىق قارۋدى تاراتپاۋ جانە اتوم ەنەرگياسىن بەيبىت ماقساتتا پايدالانۋ سالاسىنداعى ەڭ وزەكتى ماسەلەلەر مەن قاتىسۋشى مەملەكەتتەردىڭ ياقتش-تى ورىندالۋ ۇدەرىسىن بەينەلەيتىن توراعانىڭ جۇمىس قۇجاتى سەسسيانىڭ نەگىزگى قورىتىندىسى بولدى.
كونفەرەنتسيا ەكى اپتا بويى اسا كۇردەلى گەوساياسي جاعدايدا ءوتتى. بۇل يادرولىق قارۋعا يە مەملەكەتتەر جانە يادرولىق ەمەس مەملەكەتتەردىڭ كونفرونتاتسيالىق مالىمدەمەلەرى مەن ديامەترالدى قاراما-قايشى ۇستانىمدارىندا كورىنىس تاپتى.
شارتقا قوسىلعانىنا 30 جىل تولعان جىلى ەلىمىزدىڭ ياقتش الاڭىندا تابىستى توراعالىق ەتۋى وتاندىق ديپلوماتيانىڭ بەدەلىن ارتتىرىپ, قازاقستاننىڭ «ورتا دەرجاۆا» رەتىندەگى سىرتقى ساياسي بەدەلىن نىعايتتى. سونداي-اق ەلىمىزدىڭ حالىقارالىق ساياساتتاعى بەيتاراپ جانە تەڭگەرىمدى اكتورى مارتەبەسىن راستادى. بۇل جەتىستىككە وتاندىق ۇجىمنىڭ قورىتىندى قۇجاتتاردى ۇيلەستىرۋ جانە قابىلداۋ جونىندەگى ساليقالى جۇمىسى ىقپال ەتتى.
سوڭعى جىل ىشىندە توراعا شارتقا قاتىسۋشى مەملەكەتتەردىڭ, سونىڭ ىشىندە «يادرولىق بەستىككە» مۇشە ەلدەردىڭ وڭىرلىك توپتارىمەن جانە دەلەگاتسيالارىمەن كوپتەگەن كونسۋلتاتسيالار مەن كەلىسسوزدەر جۇرگىزدى. قازاقستان توراعالىعى كەزىندەگى يادرولىق قارۋسىزدانۋ سالاسىنداعى ماڭىزدى كەلىسسوزدەردىڭ وڭ ديناميكاسىنا ايرىقشا كوڭىل ءبولىندى. بۇل گانانىڭ توراعالىعىمەن كەلەر جىلدىڭ ءساۋىر-مامىر ايلارىندا نيۋ-يوركتە وتەتىن ءۇشىنشى جانە سوڭعى دايىندىق كوميتەتىنىڭ سىندارلى نەگىزىن قالاپ بەردى.
ايتا كەتۋ كەرەك, يادرولىق قارۋدى تاراتپاۋ تۋرالى شارت 1970 جىلى كۇشىنە ەنگەن. سونىمەن بىرگە بۇل – يادرولىق قارۋدىڭ تارالۋىن بولدىرماۋعا, يادرولىق قارۋسىزدانۋعا جاردەمدەسۋگە, اتوم ەنەرگياسىن بەيبىت ماقساتتا پايدالانۋدى ىلگەرىلەتۋگە باعىتتالعان ىرگەلى حالىقارالىق قۇجات. ەلىمىز 1994 جىلدان بەرى ياقتش-عا قاتىسۋشى تولىققاندى يادرولىق قارۋى جوق مەملەكەت. بيىل ءبىزدىڭ ەل العاش رەت ياقتش شولۋ تسيكلى اياسىنداعى ماڭىزدى وقيعالاردىڭ بىرىنە توراعالىق ەتتى. شارتتىڭ ورىندالۋىن باعالاۋ جانە ونىڭ ماقساتتارىنا قول جەتكىزۋ ءۇشىن ودان ءارى جۇمىس باعىتتارىن انىقتاۋ ءۇشىن شارتقا شولۋ كونفەرەنتسيالارى بەس جىل سايىن وتكىزىلەدى. ون ءبىرىنشى ياقتش شولۋ كونفەرەنتسياسى ەكى جىلدان كەيىن نيۋ-يورك قالاسىندا وتەدى دەپ جوسپارلانعان.
