فوتو: حابار24
قاراعاندى پوليتەحنيكالىق كوللەدجىنىڭ 17 جاستاعى 3 كۋرس ستۋدەنتى 2023 جىلدىڭ ءساۋىر ايىندا ينتەرنەتتەن كۋرەر قاجەت ەكەندىگى تۋرالى حابارلاندىرۋدى كورەدى. اتالعان تەلەفون نومىرىنە قوڭىراۋ شالىپ, جۇمىستىڭ قيىن ەمەس ەكەنىن, سونىمەن قاتار جالاقىسىنىڭ جوعارى ەكەنىن بىلەدى. ءجاسوسپىرىم جاقسى وقىماعانىمەن, ۇستازدار تاراپىنان شاعىمدار بولماعان, اكەسىمەن جانە وگەي شەشەسىمەن بىرگە تۇرادى (ولار ونى تولىعىمەن قامتاماسىز ەتكەن), دەگەنمەن ول جەڭىل اقشا تابۋعا شەشىم قابىلدايدى.
وسىلايشا ول كۋرەر بولدى. الىنعان گەولوكاتسيا بويىنشا 5-15 جيىنتىق تاۋىپ, ولاردى ءبىر-بىردەن وراپ, قاراعاندى كوشەلەرىنە سالىپ كەتەتىن, كۋراتورعا فوتوەسەپ جىبەرىپ وتىرعان.
ءاربىر سالىنعان وراما ءۇشىن بانك كارتاسىنا 2,5 مىڭ تەڭگەدەن اۋدارىم الىپ وتىرعان, ونى جەكە قاجەتتىلىكتەرىنە جۇمساعان. 2023 جىلدىڭ قاراشا ايىندا 15 ورامانى الىپ, ونىڭ 4-ءىن تاراتقان ساتتە ونى پوليتسيا قىزمەتكەرلەرى ۇستايدى.
ء«جاسوسپىرىمنىڭ سومكەسى مەن قالتاسىنان پسيحوتروپتىق زات (مەفەدرون) بار 11 وراما پاكەت تابىلدى. ءجاسوسپىرىم پسيحوتروپتىق زاتتىڭ انالوگىن وتكىزۋ ماقساتىندا باسقا اداممەن الدىن-الا ءسوز بايلاسۋ ارقىلى ەلەكتروندىق اقپاراتتىق رەسۋرستاردى پايدالانۋ ارقىلى ادامدار توبىمەن زاڭسىز ساقتادى دەپ ايىپتالدى (قك-ءنىڭ 297-بابى 3-بولىگى 1), 3), 5) تارماقشالارى بويىنشا). ايىپتالۋشىنىڭ كىناسى – كۋالاردىڭ, پوليتسيا قىزمەتكەرلەرىنىڭ ايعاقتارىمەن, كۋاگەرلەرمەن, ساراپتامالاردىڭ قورىتىندىلارىمەن, سالىنعان ورامداردىڭ فوتوسۋرەتتەرى تابىلعان ۇيالى تەلەفوندى تەكسەرۋمەن, كۋراتورمەن حات الماسۋمەن جانە قىلمىستىق ءىستىڭ باسقا ماتەريالدارىمەن دالەلدەندى», دەلىنگەن حابارلامادا.
جازا تاعايىنداۋ كەزىندە سوت اسا اۋىر قىلمىس ساناتىنا جاتاتىن جانە جوعارى قوعامدىق قاۋىپتى بىلدىرەتىن ءىس-ارەكەتتىڭ سيپاتى مەن قوعامدىق قاۋىپتىلىك دارەجەسىن, سوتتالۋشىنىڭ جەكە باسى, ونىڭ مىنەز-قۇلقىن, جاۋاپتىلىقتى جەڭىلدەتەتىن ءمان-جايلاردى, اۋىرلاتاتىن فاكتورلاردىڭ بولماۋىن, تاعايىندالعان جازانىڭ سوتتالعاندى تۇزەتۋگە جانە جاڭا قىلمىستاردىڭ الدىن-الۋعا اسەرىن نازارعا الدى.
قك-ءنىڭ 297-بابىنىڭ 3-بولىگى 1),3),5) تارماقشاسىنىڭ 3-بولىگى مۇلكى تاركىلەنىپ, 10 جىلدان 15 جىلعا دەيىنگى مەرزىمگە باس بوستاندىعىنان ايىرۋدى كوزدەيدى. ايىپتالۋشى ايىپتى دەپ تانىلدى جانە ونىڭ كامەلەتكە تولماعان جاسىن ەسكەرە وتىرىپ, ول 7,5 جىلعا باس بوستاندىعىنان ايىرىلدى.
ۇكىم زاڭدى كۇشىنە ەندى.
