وبلىستىق پوليتسيا دەپارتامەنتى باستىعىنىڭ ءبىرىنشى ورىنباسارى, پوليتسيا پولكوۆنيگى ابدىعاني سەيدۋاليەۆتىڭ ايتۋىنشا, كەيىنگى كەزدە موپەد, موتوتسيكل مەن سكۋتەر جۇرگىزۋشىلەرى جاساعان جول-كولىك وقيعاسى جيىلەي باستادى. ماسەلەن, بيىل جىل باسىنان بەرى ەلەكترلى كولىكتەردىڭ جۇرگىزۋشىلەرى تاراپىنان 930 قۇقىق بۇزۋشىلىق تىركەلدى.
«قۇقىق بۇزۋشىلارعا اكىمشىلىك حاتتاما تولتىرىلدى. ارنايى ايىپ تۇراعىنا 120-دان استام سكۋتەر, موپەد قويىلدى. جۇرگىزۋشىلەردىڭ باسىم بولىگى جىلدامدىقتى اسىرىپ, الدىنداعى كولىكتى باسىپ وزادى. باعدارشامنىڭ قىزىل تۇسىنە توقتاماي, قاۋىپسىزدىك تالاپتارىن ساقتامايدى. تاجىريبەگە سۇيەنسەك, مۇنداي كولىك تۇرلەرىن جاسوسپىرىمدەر جۇرگىزەدى. كامەلەتكە تولماعان جۇرگىزۋشىلەر جولدا ءجۇرۋ ەرەجەسىن ءجيى بۇزادى», دەيدى ءا.سەيدۋاليەۆ.
ونىڭ پىكىرىنشە, جاسوسپىرىمدەردىڭ دەنى موتوتسيكل, موپەد پەن سكۋتەردى قۇجاتسىز جۇرگىزەدى. ال اتا-انالارى بالالارىنىڭ وسىنداي زاڭ بۇزۋىنا, ءتىپتى قاۋىپسىزدىگىنە ءمان بەرمەيدى.
«تەك اتىراۋ قالاسىندا جىل باسىنان بەرى ەلەكترلى كولىك جۇرگىزۋشىلەر بۇزعان 106 جول-كولىك وقيعاسى تىركەلدى. جول اپاتىنىڭ سالدارىنان 53 ادام دەنە جاراقاتىن الدى, 5 ادام قايتىس بولدى», دەپ مالىمدەدى ءا.سەيدۋاليەۆ.
بالاسىنا موپەد الىپ بەرگەن تۇرعىننىڭ ءبىرى – اتىراۋلىق تيمۋر راقىشەۆ. الايدا ونىڭ ۇلى ءبىر جىل بۇرىن جول اپاتىنا ءتۇسىپتى. قازىر دارىگەرگە قارالىپ ءجۇر.
«اتا-انانىڭ ءبارى بالالارىن قۋانتقىسى كەلەدى. مەن دە ءبىر جىل بۇرىن 14 جاستاعى ۇلىمدى قۋانتۋ ءۇشىن موپەد الىپ بەرگەن ەدىم. بىراق بالانىڭ ءبىر كۇنگى قۋانىشىن ەمەس, بولاشاعىن ويلاۋ قاجەتتىگىن كەش ءتۇسىنىپ وتىرمىن. قازىر كوشەدە موپەد ايداپ جۇرگەندەر جول ەرەجەسىن ءجيى بۇزادى. ءتىپتى ولاردىڭ جۇرىسىنەن قورقاتىن بولدىم. موپەدشىلەر ەكى كۇننىڭ بىرىندە جول اپاتىنا ۇشىراپ جاتىر. زارداپ شەگەتىندەر دە – موپەدشىلەر مەن سكۋتەرشىلەر. كوبىنىڭ جاسى ءالى 18-گە دە تولماعان. قازىر اربادا وتىرعان بالامدى كورگەندە, ءبىر كۇنگى قۋانىشى ءۇشىن بولاشاعىنا بالتا شاپتىم-اۋ دەپ وكىنەمىن», دەيدى ت.راقىشەۆ.
اتىراۋ قالالىق پوليتسيا باسقارماسى پاترۋلدىك پوليتسيا باتالونىنىڭ كومانديرى داۋرەن ناسيپوللانىڭ ايتۋىنا قاراعاندا, بىلتىرعى 29 ماۋسىمدا جول قوزعالىسى تۋرالى زاڭناماعا وزگەرىستەر ەنگىزىلگەن. سوعان سايكەس ەندى سكۋتەر, موپەد, ساموكات جۇرگىزۋشىلەرىنە تالاپ كۇشەيتىلىپ وتىر. ولاردىڭ جولدا ءجۇرۋ ەرەجەسىن بۇزعانى انىقتالسا, «اكىمشىلىك قۇقىق بۇزۋشىلىق تۋرالى» كودەكستىڭ 127, 440, 620 جانە 593-باپتارىنا ساي اكىمشىلىك حاتتاما تولتىرىلادى.
ماسەلەن, جىلىوي اۋدانىنىڭ ورتالىعى قۇلسارى قالاسىندا 15 جاستاعى ءجاسوسپىرىم موپەدپەن كەلە جاتىپ, وزگە كولىككە سوقتىعىسقان. بۇل ءىس اتىراۋ وبلىستىق كامەلەتكە تولماعانداردىڭ ىستەرى جونىندەگى مامانداندىرىلعان اۋدانارالىق سوتىندا قارالدى. جول قوزعالىسى ەرەجەسىن بۇزعان ءجاسوسپىرىمنىڭ اناسى ر.س-عا قاتىستى «اكىمشىلىك قۇقىق بۇزۋشىلىق تۋرالى» كودەكستىڭ 127-بابى 3-بولىگىمەن اكىمشىلىك ءىس قوزعالعان.
«ر.س-نىڭ كامەلەتكە تولماعان 15 جاستاعى ۇلى ن.ل. بيىل مامىر ايىندا قۇلسارى قالاسىندا «سامۋراي» موپەدىن جۇرگىزۋشى كۋالىگىنسىز جۇرگىزگەن. ءسويتىپ, «Toyota Camry» ماركالى كولىگىمەن سوقتىعىستى. اناسىنىڭ ۇلىن تاربيەلەۋ جونىندەگى مىندەتتەرىن تيىسىنشە ورىنداماۋىنىڭ سالدارى كامەلەتكە تولماعان ءجاسوسپىرىمنىڭ اكىمشىلىك قۇقىق بۇزۋشىلىق بەلگىلەرى بار قاساقانا ءىس-ارەكەت جاساۋىنا الىپ كەلگەن. اناسىنىڭ كىناسى ءىس قۇجاتتارىمەن تولىق دالەلدەندى. ول سوتتا كىناسىن مويىنداپ, ۇلىنىڭ ارەكەتى ءۇشىن كەشىرىم سۇرادى», دەپ حابارلادى وبلىستىق سوتتىڭ ءباسپاسوز قىزمەتى.
سوت قاۋلىسىمەن ر.س. جوعارىدا كورسەتىلگەن باپپەن كىنالى دەپ تانىلدى. ونىڭ جەكە باسى, جاۋاپكەرشىلىگىن جەڭىلدەتەتىن ءمان-جاي, قۇقىق بۇزۋشىلىقتىڭ سيپاتى ەسكەرىلدى. سوت قاۋلىسىمەن ءجاسوسپىرىمنىڭ اناسىنا 51 مىڭ 688 تەڭگە كولەمىندە اكىمشىلىك ايىپپۇل سالىندى.
مۇنايلى شاھار ماڭىنداعى ۆودنيكوۆ اۋىلىندا موپەد جۇرگىزۋشىسى Kia Sportage اۆتوكولىگىنە سوقتىعىستى. جول اپاتىنىڭ سالدارىنان موپەدتىڭ جۇرگىزۋشىسى وقيعا ورنىندا مەرت بولدى. كوز جۇمعان جىگىتتىڭ جاسى 20-دا.
وسىعان ۇقساس تاعى ءبىر وقيعا قىزىلقوعا اۋدانىنىڭ ساعىز اۋىلىندا تىركەلدى. مۇندا كامەلەتكە تولماعان ءجاسوسپىرىم موتوتسيكلمەن كەلە جاتىپ تۇيەگە سوقتىعىسقان. اۋىر جاراقات العان 14 جاستاعى ءجاسوسپىرىم وقيعا ورنىندا كوز جۇمدى.
اتىراۋ وبلىسى
