وڭدەلگەن القاپتاردىڭ جالپى كولەمى 3,1 ملن گەكتاردى قۇراعان. بۇل بيىل بولجانعان 2,5 ملن گەكتار كورسەتكىشتەن 23%-عا جوعارى. بولجامدى كولەمنىڭ ءىس جۇزىندە اسىپ كەتۋى جاڭادان تارالۋ وشاعى انىقتالعان جەرلەردى قايتا وڭدەۋگە بايلانىستى ورىن الدى.
تۇراقتى مونيتورينگ, دروندارمەن قوسا تەحنيكانى زيانكەستەردىڭ بەلسەندى تارالۋ ورىندارىنا جەدەل كوشىرۋ, ورتالىق ۇكىمەتتىك جانە وڭىرلىك دەڭگەيلەردەگى جاعدايدى قولمەن باسقارۋ جانە باقىلاۋ, شەكارا ماڭى مەملەكەتتەرىنىڭ اگرارلىق ۆەدومستۆولارىمەن تىعىز ءوزارا ءىس-قيمىل ءوز ناتيجەسىن بەردى. سوندىقتان بيىل فەرمەرلەر ەگىستىكتەرى شەگىرتكەدەن زارداپ شەككەن جوق. نەگىزگى قورعانىس ءىس-شارالارىنىڭ اياقتالۋىنا قاراماستان, تاعى ءبىر اپتا بويى جەكەلەگەن وڭىرلەردە شەگىرتكەنىڭ پايدا بولۋىن باقىلاۋ بويىنشا جۇمىس جۇرگىزىلەدى.
ۇكىمەت شەگىرتكەگە قارسى بەلسەندى جۇمىس كەزەڭىن اياقتاپ, كەلەسى جىلعا دايىندىقتى باستايدى. بيىلعى جوسپاردا – شەگىرتكەنىڭ تارالۋ كولەمى بويىنشا بولجام جاساۋ جانە وڭىرلەردە فيتوسانيتارلىق ينسپەكتسيالار پايدالاناتىن دەرناسىلدەردىڭ پايدا بولۋ ورىندارىن مونيتورينگتەۋ ءۇشىن 100 درون ساتىپ الۋ قاراستىرىلعان. 2025 جىلى القاپتاردى وڭدەۋ ءۇشىن دروندار ساتىپ الۋ جوسپارلانىپ جاتىر.
سونداي-اق كەلەسى جىلى پەستيتسيدتەرگە, ولاردى تاسىمالداۋعا, ساقتاۋعا جانە قولدانۋعا ارنالعان شىعىنداردى قامتيتىن شەگىرتكەگە قارسى بىرىڭعاي قىزمەتتى ورتالىقتاندىرىلعان ساتىپ الۋعا كوشۋ كوزدەلىپ وتىر. بۇل جەردى وڭدەۋدىڭ ساپاسى مەن تيىمدىلىگىن باقىلاۋعا, ورىنداۋشىلاردىڭ جاۋاپكەرشىلىگىن ارتتىرۋعا جانە بيزنەستىڭ ساتىپ الۋعا قاتىسۋىن تارتىمدى ەتۋگە مۇمكىندىك بەرەدى.
