ەكى كۇنگە سوزىلعان قويان-قولتىق ۇرىستا ەرلەرمەن قاتار اسكەردىڭ جەتى قۇراماسىنان كەلگەن 19 ايەل سپورتشى ونەر كورسەتتى. ايەلدەر اراسىنداعى جەكە ەسەپتە 52 كيلوعا دەيىنگى سالماق دارەجەسىندە قاتارداعى جاۋىنگەر انەل ستامبەكوۆا ءبىرىنشى ورىندى يەلەندى. ول بۇعان دەيىن دە ءتۇرلى جارىستاردا باق سىناپ, جەڭىمپاز اتانعان.
ء«وزىم سپورتقا جاقىنمىن. قازىر ءجۇزۋ مەن قويان-قولتىق سايىستارعا شىعىپ ءجۇرمىن. بۇل جارىس مەن ءۇشىن ماڭىزدى بولدى, ەڭبەگىمنىڭ جەمىسىن كورىپ وتىرمىن. اسكەري ءبولىمنىڭ سپورتتىق ۇجىمىنا العىسىم شەكسىز, ءبىزدىڭ دايىندىق جاساۋىمىزعا مۇمكىندىك بەرىپ, ارقاشان قولداۋ كورسەتەدى. قارسىلاستارىم دا جوعارى دايىندىقپەن كەلىپتى. اسىرەسە شىعىس پەن وڭتۇستىكتىڭ قىزدارى مىقتى ەكەن. دەگەنمەن نامىسقا تىرىسىپ, جەڭىسكە جەتتىم», دەيدى جۇلدە يەسى اعىنان جارىلىپ.
قويان-قولتىق ۇرىس ءاربىر اسكەري قىزمەتشىنى دايارلاۋدىڭ نەگىزگى ەلەمەنتتەرىنىڭ ءبىرى. جاقىن شايقاستا اتىس نەمەسە باسقا قارۋ تۇرلەرىن قولدانۋعا مۇمكىندىك بولماعان جاعدايدا اسكەري قىزمەتشى ءتۇرلى جاۋىنگەرلىك جانە سپورتتىق ادىستەردى قولدانا ءبىلۋى شارت. اسكەري قولدانبالى سپورت تۇرىنەن العاش رەت باق سىناعاندار اراسىندا سەرجانت ايگەرىم بەكمىرزاەۆا مەن كىشى سەرجانت ينابات امانوۆا دا بار. ولار جارىسقا دايىندىق كەزىندە سپورتتىق قاسيەتتەرىن شىڭداعانىن ايتادى.
«قىزداردىڭ دايىندىعى جوعارى دەڭگەيدە بولدى. سولاردىڭ ىشىنەن 5-ورىنعا ىلىگۋ بىزگە وڭاي بولعان جوق. باسىندا قورقىنىش, قوبالجۋ بولعانمەن, قىزدارمەن ءبىر-ەكى جەكپە-جەك وتكىزگەننەن كەيىن شيراپ الدىق. ءبىزدى جىگەرلەندىرىپ, وسى دوداعا ىنتالاندىرىپ الىپ بارعان جەتەكشىمىز, مايور ايىمبەك قايراقانوۆقا العىسىمىز شەكسىز», دەيدى قوس ارۋ.
جەكپە-جەكتە ەرلەر اراسىندا 80 كيلو سالماقتا ەلوردالىق قۇرامانىڭ ساربازى, قاتارداعى ولجاس ابدۋۆاليەۆ جەڭىسكە جەتتى. سونداي-اق نيكيتا ششەرباكوۆ 57 كيلو سالماقتا, قۇربانجان سادىقوۆ 97 كيلو سالماقتا ءۇشىنشى ورىندى ەلشىلەدى.
جالپىكوماندالىق ەسەپتىك كورسەتكىشتە 5573 اسكەري ءبولىمىنىڭ قۇراماسى 5-ورىنعا تۇراقتادى. قاتارداعى انەل ستامبەكوۆا, قۇربانجان سادىقوۆ پەن ولجاس ابدۋۆاليەۆ ۇلتتىق ۇلاننىڭ قۇراماسىنا قابىلداندى. ەندى جاۋىنگەرلەر 8 تامىز كۇنى تاراز قالاسىندا وتەتىن جەكپە-جەكتە كۇش سىناسپاق.
