فوتو: جەتىسۋ وبلىسى اكىمدىگى
بيىلعى جىلدىڭ سوڭىنا دەيىن اتالعان جول تومەنگى اسفالت جابىنىمەن كولىك قوزعالىسى ءۇشىن اشىلادى دەپ جوسپارلانعان. ال اسفالتتىڭ بەتكى قاباتى مەن اباتتاندىرۋ جۇمىستارى تولىعىمەن 2025 جىلى اياقتالادى.
قازىرگى كەزدە لەپسى اۋىلىنان بالقاش كولىنىڭ جاعالاۋىنا دەيىنگى 27 شاقىرىم اۆتوكولىك جولىنىڭ قايتا جاڭعىرتۋ جۇمىسى اياقتالىپ, قولدانىسقا بەرىلگەن. ال «مولالى-لەپسى-اقتوعاي» ۋچاسكەسىندەگى 105 شاقىرىمدا قۇرىلىس جۇمىستارى ءجۇرىپ جاتىر. سونىڭ ىشىندە 71 شاقىرىمىنا ەكى قابات اسفالت توسەلدى, قالعان 34 شاقىرىمىنداعى قۇرىلىس جۇمىستارى جىلدىڭ سوڭىنا دەيىن اياقتالادى دەيدى ماماندار. وسىلايشا بيىلعى جىلدىڭ اياعىنا قاراي بالقاشقا اپاراتىن جول تومەنگى جابىنىمەن اۆتوكولىك قۇرالدارى ءۇشىن اشىلادى. ال بەتكى قاباتى مەن جول جيەگىن اباتتاندىرۋ جۇمىستارى - جول بەلگىلەرى, جول سىزىقتارى, مەتالل توسقاۋىلدار, دەمالىس ايماعى, سانيتارلىق بەكەت ورناتۋ – بارلىعى كەلەسى جىلدىڭ جازعى شومىلۋ ماۋسىمىنا دەيىن تولىق اياقتالادى.
«قازىر قۇرىلىسقا 90-عا جۋىق ارنايى تەحنيكا جۇمىلدىرىلعان. 25 ادام اسفالت جامىلعىسىن سالۋعا, 50 ادام جەر توسەمى جۇمىستارىندا, تاعى 50 ادام زاۋىتتاعى اسفالت دايىنداۋ, ۇنتاقتاۋ, ماتەريالداردى وڭدەۋ, تاسىمالداۋ جۇمىستارىندا – جالپى سانى 130-عا جۋىق ادام جۇمىس ىستەپ جاتىر. لەپسى اۋىلىنان بالقاش جاعالاۋىنا دەيىنگى جولدىڭ باستاپقى ەنى 6 مەتر بولسا, جاڭعىرتىلعاننان كەيىن 8 مەترگە ۇلعايتىلدى, ال 105 شاقىرىمىنىڭ ەنى 7-دەن 9 مەترگە ۇلعايتىلدى. سونىمەن قاتار جوبادا 67 دانا سۋ وتكىزۋ قۇبىرلارى تولىعىمەن اۋىستىرىلدى. ەكى كوپىر سالىندى. جوبا ىسكە اسىرىلعانعا دەيىن وسى جولمەن قاتىنايتىن جول كولىكتەرىنىڭ اعىنى تاۋلىگىنە 3 مىڭ اۆتوكولىك بولسا, قايتا جاڭعىرتۋدان كەيىن بۇل كورسەتكىش 6 مىڭعا جوعارىلاپ وتىر. بۇل تۋريستىك ايماقتى دامىتۋعا باستى سەرپىن بەرەتىن جوبا بولىپ وتىر», دەيدى وبلىستىق جولاۋشىلار كولىگى جانە اۆتوموبيل جولدارى باسقارماسى باسشىسىنىڭ ورىنباسارى ايدوس دوسجانوۆ.
بۇل رەتتە جوبانى ىسكە اسىرۋ بارىسىندا قۇرىلىس قۇنىنىڭ قىمباتتاۋىنا بايلانىستى وبلىس اكىمى بەيبىت يساباەۆتىڭ تاپسىرماسىنا سايكەس بالقاشقا دەيىنگى جول سالۋ جۇمىسىنا وبلىستىق بيۋدجەتتەن قوسىمشا 15,9 تەڭگە قارجى ءبولىندى. سونىڭ 5,5 ملرد تەڭگەسى بيىلعى جىلى ءبولىندى, قالعان قاراجات 2025 جىلى بولىنەدى. بالقاش كولىنە دەيىنگى جول قۇرىلىسى جوباسىنىڭ جالپى قۇنى – 30,4 ملرد تەڭگە.
جالپى بيىل وبلىستىڭ جول سالاسىن دامىتۋعا 37,9 ملرد تەڭگە قاراجات ءبولىندى. وسى قاراجاتقا وبلىستىق ماڭىزى بار اۆتوكولىك جولداردى جوندەۋگە ارنالعان 29 جوبا ىسكە اسىرىلىپ, 54 ەلدى مەكەننىڭ ىشكى كوشەلەرى جوندەلەدى.
سول سياقتى وبلىس اۋماعىندا رەسپۋبليكالىق ماڭىزى بار ءىرى جوبالار دا ىسكە اسىرىلىپ جاتىر. ءۇشارال-دوستىق جولى ىسكە قوسىلدى جانە بۇگىنگى كۇنگە تالدىقورعان-ءۇشارال اۆتوجولىن جوندەۋ 95%-عا ورىندالدى, نىسان تولىعىمەن 2024 جىلدىڭ سوڭىندا اياقتالادى دەپ جوسپارلانعان. سونداي-اق سارىوزەك-كوكتال, جاركەنت-قورعاس اۆتوجولدارى جوندەۋدەن ءوتىپ جاتىر.
