اۋىلعا باعىتتالعان قارجى كولەمى ازايدى

وڭىرلىك بولىنىستە پاۆلودار, اقمولا جانە سولتۇستىك قازاق­ستان وبلىستارى العا وزعان. اگرو­ونەركاسىپ كەشەنىنىڭ (اوك) نەگىزگى كاپيتالىنا سالىنعان اۋقىمدى ينۆەستيتسيا وسى وڭىر­لەردە بايقالعان: پاۆلودار وبلىسىنا – 53,8 ملرد تەڭگە, اقمولا وبلىسىنا – 30,7 ملرد تەڭگە, سولتۇستىك قازاقستان وبلىسىنا – 30,2 ملرد تەڭگە. ينۆەستيتسيانىڭ ايتارلىقتاي كولەمىن الۋ بويىنشا قوستاناي (18,4 ملرد تەڭگە), تۇركىستان (15,6 ملرد تەڭگە) جانە شىعىس قازاقستان وبلىستارى دا (10,4 ملرد تەڭگە) كوشباسشىلارمەن ۇزەڭگى قاعىستىرادى.

اگروونەركاسىپ سالاسىنداعى قارجىلاندىرۋدىڭ نەگىزگى كوزى – بيزنەستىڭ جەكە قارجىسى. بيزنەستىڭ مەنشىك قاراجاتىنىڭ كولەمى قاڭتار-مامىردا 142,4 ملرد تەڭگەنى (بىلتىرعىعا ۇقساس كەزەڭ كورسەتكىشىنەن 27,4 پايىزعا تومەن) قۇراعان. ودان كەيىنگى ورىندا بانكتىك ەمەس زايم قارجىسى تۇر – 49,8 ملرد تەڭگە. بۇل قارجى كولەمى بويىنشا 24,5 پايىزعا قۇلدىراۋ اڭعارىلادى. ال 5,8 ملرد تەڭگە (-27,1 پايىز) – ەكىنشى دەڭگەيلى بانكتەر ۇسىنعان كرەديت قارجىسى.

اوك سالاسىنداعى ينۆەستيتسيا قۇرىلىمىندا بۇكىل نەگىزگى سالىمنىڭ 93,4 پايىزىن مال شارۋاشىلىعى مەن ماۋسىمدىق داقىلداردى ءوسىرۋ ەنشىلەيدى. اتالعان ەكى باعىتقا 93,3 ملرد جانە 91,6 ملرد تەڭگە قارجى قۇيىلعان. بۇل رەتتە مال شارۋاشىلىعىنا سالىنعان ينۆەستيتسيا كولەمى ءبىر جىل ىشىندە اقشالاي ماندە ەكى ەسە ءوسىپ وتىرعانىن دا ايتا كەتەيىك. ال داقىلداردى ءوسىرۋ سالاسىنا سالىنعان كاپيتالدىق سالىم كەرى­سىنشە 2 ەسە قىسقارىپ كەتكەن.

سونىمەن قاتار ارالاس اۋىل شارۋاشىلىعىنا, بالىق اۋلاۋ مەن اكۆامادەنيەتكە دە ەلەۋلى قارجى سالىنىپتى, ناقتىلاپ ايتقاندا, 8,8 ملرد تەڭگە جانە 3,1 ملرد تەڭگە.

«Finprom» اقپاراتى بويىنشا, اۋىل, ورمان جانە بالىق شارۋاشىلىعى سالاسىندا ەڭبەك ەتەتىن قىزمەتكەرلەردىڭ ورتاشا ايلىق نومينالدى جالاقىسى بيىل ءبىرىنشى توقساندا 212,3 مىڭ تەڭگە بولعان. بۇل ەلدەگى بۇكىل سالا جالاقىسىنىڭ ورتاشا دەڭگەيىنەن 44,5 پايىزعا تومەن.

بۇعان دەيىن اۋىل شارۋاشى­لىعى ءمينيسترى ايداربەك ساپاروۆ وسى جىلى اۋىل شارۋاشىلىعى سالاسىنا 1,7 ترلن تەڭگە ينۆەستيتسيا تارتۋ جوسپارلانعانىن ايتقان. بىراق وعان قول جەتكىزۋ مۇمكىن بولمادى.

«جارتىجىلدىق قورىتىندى­سى بويىنشا رەسپۋبليكاداعى كورسەت­كىش 410 ملرد تەڭگەگە جۋىقتادى. بۇل – جوسپاردىڭ نەبارى 24,1 پايى­زى. شىمكەنت پەن استانا قالاسى, جەتىسۋ وبلىستارىنداعى كورسەتكىش 10 پايىزعا دا جەتپەيدى. وسىعان بايلا­نىستى اكىمدىكتەر جىلدىق كورسەتكىشكە قول جەتكىزۋ بويىنشا جۇمىستى كۇشەيتۋى كەرەك», دەدى مينيستر.

ايتۋىنشا, بيىل جالپى قۋا­تى 373 مىڭ توننا ءسۇت بولاتىن 65 ءسۇت-تاۋارلى فەرماسىن ىسكە قوسۋ جوسپارلانعان. بۇل ماق­سات­قا رەسپۋبليكالىق بيۋدجەتتەن 100 ملرد تەڭگە بولىنگەن. الاي­دا ءبىرىنشى جارتىجىلدىق قورى­تىندىسىندا جالپى قۋاتى 67,2 مىڭ توننا بولاتىن تەك 16 جوبا جۇمىس باستاعان. ەت باعىتىنداعى قۇس فابريكالارىن سالۋ جانە كەڭەيتۋ بويىنشا قۋاتتىلىعى 72 مىڭ توننا قۇس ەتىن قۇرايتىن 10 جوبانى ىسكە قوسۋ جوسپارعا ەنگىزىلگەن. ونىڭ ەكەۋى الماتى جانە قىزىلوردا وبلىستارىندا ءوز جۇمىسىن باستاپتى. ەكى وڭىردە ءوندىرىستىڭ باستالۋى  نەگىزگى جوسپاردىڭ 20 پايىزى عانا.