جالپى, جەتىسۋ اۋدانىندا 2024 جىلدىڭ سوڭىنا دەيىن ءۇش ەمحانا اشۋ جوسپارلانعان بولسا, وسى ەمدەۋ مەكەمەلەرى كەلەشەكتە اۋداندى تولىق مەديتسينالىق قىزمەتپەن قامتاماسىز ەتپەك. سونىمەن قاتار «ساياحات» اۆتوۆوكزالى مەن «قۇلاگەر» شاعىن اۋدانىنداعى ەمحانالار جاڭعىرتىلىپ, پايدالانۋعا بەرىلگەلى وتىر. جۇمىسشىلار كەنتىندەگى №33 ەمحانا دا ساقاداي ساي دايىن.
جەتىسۋ اۋدانىندا بىرنەشە جىل بۇرىن ءۇش قانا ەمحانا بولعاندىقتان, جەرگىلىكتى حالىق كوبىنەسە كورشىلەس تۇركسىب, المالى, مەدەۋ اۋداندارىنا قارالۋعا ءماجبۇر ەدى. بۇل ءبىر جاعىنان جەتىسۋ اۋدانىندا ەمحانا سالۋعا جەر تەلىمىنىڭ تاپشىلىعىنان تۋعان ماسەلە بولاتىن. وسى تۇيتكىلدى تارقاتۋ ءۇشىن مەديتسينالىق مەكەمەگە جارامدى عيمارات قاراستىرىلىپ, اۋدان اكىمى گۇلنار كوكەباەۆا ماسەلەنىڭ زاڭدى جاعىن قولعا الىپ, بىرتە-بىرتە ەمحاناعا اينالدىرۋعا جارامدى ءۇش عيمارات ساتىپ الىندى.
بۇعان قوسا كەمەل شاعىن اۋدانىندا اۋىسىمدا 200 ادام قابىلدايتىن وتباسىلىق-دارىگەرلىك امبۋلاتوريا سالىندى. بۇل قازىر اتالعان شاعىن اۋدان تۇرعىندارىنا قىزمەت كورسەتەدى. سونداي-اق №11 ەمحانادا كۇردەلى جوندەۋ جۇرگىزىلدى, كت مەن مرت قىزمەتى بار ءوزىنىڭ دياگنوستيكالىق ورتالىعىن اشتى.
وسى اۋدانداعى وزگە دە وڭ وزگەرىستەرگە توقتالاتىن بولساق, ۇزاقمەرزىمدى جوبالار ساتىمەن ىسكە اسىرىلىپ, جۇرت اۋقىمدى ينفراقۇرىلىمدىق جوبالاردىڭ يگىلىگىن كورە باستادى. 2019 جىلدان بەرى 190 مىڭنان اسا حالقى بار اۋداندا 96,7 شاقىرىم سۋمەن جابدىقتاۋ جانە سۋ بۇرۋ جەلىلەرىن قايتا جاڭارتۋ سياقتى باسىم جوبالاردى اتقارۋ ءىسى كەشەۋىلدەپ تۇرعان ەدى. 2020 جىلدان باستاپ اۋداندى باسقارۋعا كەلگەن گۇلنار كوكەباەۆا وسى جۇمىستى ىلگەرىلەتىپ, تاپسىرىستى «ەلەكترورەمونت» جشس مەردىگەرلىك ۇيىمدارى ورىندادى. بيىل قازىلعان كوشەلەردى تولىق اسفالتتاپ, ەكىنشى مەردىگەر ويدىم-ويىق جولدارعا ورتاشا جوندەۋ جۇمىستارىن جۇرگىزۋگە ءتيىس.
سول سياقتى بيىل الماتى وبلىسىنان قالاعا قوسىلعان شاعىن اۋدانى تۇرعىندارىنىڭ ءبىر بولىگى تۇراقتى قالالىق سۋمەن قامتاماسىز ەتىلەدى. كەمەلدىڭ تۇرعىندارى دا جىلدار بويى سۋ تاپشىلىعىن ابدەن تارتىپ كەلگەن ەدى. وعان قوسا كەمەلگە 43,5 شاقىرىم ەلەكتر سىمى تارتىلىپ, قالانىڭ جاڭا شاعىن اۋدانى تۇراقتى قالالىق ەلەكتر قۋاتىنا قوسىلدى. سونداي-اق 32,5 شاقىرىمدىق پاللادين – پاۆلودار – بورالداي, تايمىر كوشەلەرىنىڭ اۋماعىندا جاڭا ەلەكتر جەلىلەرى تارتىلدى. ۇزىندىعى 8,4 شاقىرىم بولاتىن ماگيسترالدىق جىلۋ جەلىلەرى قايتا جاڭارتىلدى. كوشەلەردى جارىقتاندىرۋ ماسەلەسى دە شەشىمىن تاۋىپ, بيىل جاڭا باعانالار ورناتىلىپ, 150 جارتىلاي جارىق جۇرگىزىلمەگەن كوشەدە 35 مىڭ شاقىرىمنان اسا كابەل سالىندى.
وسىناۋ وڭدى جاڭالىقتار – ءبىر عانا جەتىسۋ اۋدانىنا تيەسىلى.
الماتى
