كورەيا زاماناۋي بي ۇلتتىق كومپانياسىنىڭ نەگىزى 2010 جىلى قالانعان. ترۋپپا ءبىرتۋار سۋرەتشىلەرمەن بىرلەسىپ جاساعان ۇزدىك قويىلىمدارىمەن تانىمال. ونەر ۇجىمى كورەيانىڭ قازىرگى ءومىرى مەن قوعامىن بەينەلەيتىن تۋىندىلار جاساپ, ولاردى مادەني كودىنا قاراماستان دۇنيە ءجۇزى كورەرمەندەرىنە تۇسىنىكتى ەتىپ, ماڭىزدىلىعىن ارتتىرۋدى ماقسات ەتەدى.
2023 جىلى مامىردا كيم سونëن ترۋپپانىڭ كوركەمدىك جەتەكشىسى اتانىپ, ونىڭ شىعارماشىلىق قۋاتى مەن كوزقاراسى ۇجىمنىڭ قىزمەتىنە تىڭ سەرپىن بەردى. ونىڭ قويىلىمدارى ادام ءومىرىنىڭ مانىنە تەرەڭ ەنۋىمەن ەرەكشەلەنەدى, بۇل ولاردى بىرەگەي ءارى ۇمىتىلماستاي ەتەدى.
ءبىزدىڭ كورەرمەنگە كورەيالىق ترۋپپا كيم سونëن قويعان «دجۋنگلي» حورەوگرافيالىق تۋىندىسىن دايىنداعان. بۇل سپەكتاكل اعىمداعى جىلى ساۋىردە سەۋلدەگى CJ Towol ارت-ورتالىعىنىڭ ساحناسىندا العاش رەت ورىندالدى. سونداي-اق 23-24 شىلدەدە Le 13ème ART تەاترىندا ۇسىنىلىپ, پاريجدەگى كورەرمەندەردىڭ جۇرەگىن جاۋلاپ ۇلگەردى.
«دجۋنگلي» تۋىندىسى قاراپايىم تابيعات پريزماسى ارقىلى ادام ءومىرىن فيلوسوفيالىق تۇرعىدا قالاي زەرتتەۋدى كورسەتەدى. ول قيمىلداردىڭ ەرەكشەلىگىنە كوڭىل ءبولىپ, اقىل مەن ەموتسيانىڭ, سانا مەن تۇيسىكتىڭ, سۇلۋلىق پەن كورىكسىزدىكتىڭ قاتار ءومىر سۇرەتىنىن سۋرەتتەيدى.
سپەكتاكلدى جاساۋمەن جارىق بويىنشا سۋرەتشى – لي چجونيۋن, كوستيۋمدەر بويىنشا سۋرەتشى بە گيونسۋل دە اينالىستى. توبەدەن سالبىراپ تۇراتىن ءشوپ ءتۇيىنى ساحناداعى نەگىزگى ەلەمەنت سانالادى. ول وسىناۋ ماتىندە تابيعي ورتا عانا ەمەس, تۇيسىك الەمىنىڭ مەتافوراسى رەتىندە دە قابىلداناتىن دجۋنگليدى بەينەلەيدى. مۇندا ەڭ مىقتىنىڭ امان قالاتىنى, زاماناۋي قوعامدا تۇيسىكتەر قالاي بايقالاتىنى تۋرالى وي پايدا بولادى.
قويىلىم باسىندا ارتىستەر شەڭبەردى اينالىپ جۇرەدى. قيمىلدارى كوزگە ۇيرەنشىكتى جانە قاراپايىم بولىپ كورىنۋى مۇمكىن, بىراق شىن مانىندە ولار ءبىزدىڭ كۇندەلىكتى ءومىرىمىزدى جانە قالالىق ورتاداعى تۇيسىكتىك ءجۇرىس-تۇرىسىمىزدى بەينەلەيدى. بيشىلەردىڭ قيمىلداردى سول مەزەتتە ويلاپ تاپقانداي ورىنداۋى ولاردىڭ ونەر كورسەتۋىنە بىرەگەيلىك پەن ەرەكشەلىك ۇستەيدى. سپەكتاكلدىڭ سوڭىندا ارتىستەر ءبىر-بىرىنە قاراپ, وي تولعاۋ ءۇشىن جاڭا كەڭىستىك جاسايدى. توپ جەكە ادامداردى باقىلاسا, ال ولار ءوز كەزەگىندە توپقا ءبىر ءبۇتىن رەتىندە قارايدى.
سونىمەن استانالىق كورەرمەن اسىعا كۇتكەن «دجۋنگلي» – بي شوۋى عانا ەمەس, 17 ءارتىستىڭ قيمىلى ارقىلى ادام تابيعاتىنىڭ تەرەڭ زەرتتەۋى, سونداي-اق ول تابيعاتتىڭ بەينەسى, تازالىق پەن تابيعيلىقتىڭ ءرامىزى ىسپەتتەس.
