زاڭسىز كۇل-قوقىس ورنىنىڭ ءبىرى پاۆلودار قالاسىنداعى سولتۇستىك ونەركاسىپ اۋدانىندا ورنالاسقان. مۇندا الدەبىرەۋلەر قۇرىلىس جۇمىستارىنان قالعان قالدىقتاردى زاڭسىز ۇيگەن. ال ءدال جانىندا قۇم الىناتىن شۇڭقىر قازىلىپ, ونى قالاداعى كاسىپكەرلەر پايدالانا باستاعان. قۇم الىناتىن ورىن دا زاڭسىز پايدالانىلىپ وتىر.
وڭىرلىك ەكولوگيا دەپارتامەنتى باسشىسىنىڭ ورىنباسارى ماعزۇم قوقىمباەۆتىڭ دەرەگىنشە, ارنايى رەيدتەردىڭ جانە «عارىش ساپارى» ۇلتتىق كومپانياسىنىڭ عارىشتان تۇسىرگەن فوتوسۋرەتتەرىنىڭ ناتيجەسىندە زاڭسىز كۇل-قوقىس ورىندارى ۋاقىت سايىن انىقتالادى.
«مالىمەتتەردى جەرگىلىكتى اتقارۋشى ورگاندارعا بەرەمىز. ولار جىل سايىن رۇقسات ەتىلمەگەن كۇل-قوقىس توگۋ ورىندارىن جويۋمەن اينالىسادى. جىل باسىنان 7 اكىمدىككە جالپى سوماسى 1,3 ملن تەڭگە ايىپپۇل سالدىق. ال پاۆلودار قالاسىنىڭ وزىندە بۇگىندە 10 زاڭسىز كۇل-قوقىس ورنى بار. قوقىس شىعاراتىن كولىكتەردىڭ جۇرگىزۋشىلەرى قاراجاتتارىن ۇنەمدەۋ ماقساتىندا تيەپ العان تۇرمىستىق جانە قۇرىلىس قالدىقتارىن جۇرت كوزىنەن تاسا وسىنداي جەرلەرگە توگىپ كەتەدى. نەگىزى مۇنداي قالدىقتار قوقىستى اقىلى تۇردە قابىلدايتىن پوليگوندارعا اپارىلۋى كەرەك. زاڭسىز ۇيىلگەن ورىندارعا قوقىستى سىرتتان كەلىپ ەشكىم توگىپ كەتپەيدى, ونى جاساپ وتىرعان – قالا تۇرعىندارى», دەيدى
م.قوقىمباەۆ.
ەكولوگيا ماسەلەسىنە جاۋاپتى جەرگىلىكتى مەكەمەلەردىڭ قىزمەتكەرلەرى, پوليتسەيلەر, دەپۋتاتتار جانە «Amanat» پارتياسىنىڭ مۇشەلەرى سولتۇستىك ونەركاسىپ اۋدانىندا ورنالاسقان زاڭسىز كۇل-قوقىس ورنىندا بولدى. ولار مۇنداي ورىنداردى جويۋعا باعىتتالعان ۇسىنىس-پىكىرلەرىن جەتكىزدى. ماسەلەنى تالقىلاي كەلە دەپۋتاتتار رۇقسات ەتىلمەگەن كۇل-قوقىس ورىندارىمەن شۇعىلداناتىن مونيتورينگ توبىن قۇرۋ تۋرالى شەشىم قابىلدادى. پوليتسيا مەن ولاردىڭ كومەكشىلەرىنىڭ ارقاسىندا قوقىستى كەز كەلگەن جەرگە توگىپ كەتەتىندەردى قولعا ءتۇسىرىپ, جاۋاپكەرشىلىككە تارتۋ كوزدەلىپ وتىر.
قالالىق ءماسليحات دەپۋتاتى بولات سۇلەيمەنوۆتىڭ ايتۋىنشا, ايىنا ەكى رەت قوعام بەلسەندىلەرى مەن پوليتسيا قىزمەتكەرلەرىن تورۋىلعا شىعارىپ, كەزەكشى پاترۋلدەردى جاي ماشينالارعا وتىرعىزىپ قويۋعا بولادى. ال زاڭ بۇزۋشىلاردى بەينەجازباعا ءتۇسىرىپ, كوپشىلىككە كورسەتكەن ابزال. قالا تۇرعىندارى زاڭ بۇزۋشىلاردىڭ ءجۇزىن تانۋى كەرەك. ال وزگە كولىك جۇرگىزۋشىلەرى مۇنى كورىپ, كەلەسىدە كۇل-قوقىستى ارنايى پوليگونعا اپارىپ توگەدى. زاڭسىزدىقپەن اينالىسىپ جۇرگەن ازاماتتاردى وسىنداي جولمەن تاربيەلەۋ كەرەك.
– وكىنىشكە قاراي, ءبىز كوبىنە بيۋدجەت قاراجاتىن وسىنداي زاڭسىز كۇل-قوقىس ورىندارىن جويۋعا ىسىراپ ەتەمىز. مەنىڭ ويىمشا, بۇل قاراجاتتى كۇل-قوقىس قابىلدايتىن ورىنداردى سۋبسيديالاۋعا جۇمساۋىمىز كەرەك. ەسەسىنە ولار قوقىستى تەگىن قابىلداسىن. قوعام كوبىنە ماسەلەنىڭ سالدارىمەن كۇرەسۋگە ۇيرەنىپ قالعان. قوقىستى اقىلى قابىلداۋ جۇرگىزۋشىلەردى وسىعان يتەرمەلەپ وتىرعانى انىق. ال اينالىپ كەلگەندە زاڭسىز توگىلگەن قالدىقتاردى ءبىز ءبارىبىر قازىنا قاراجاتى ەسەبىنەن جويامىز. سوندىقتان پوليگوندار قوقىستى تەگىن قابىلدايتىنداي جۇيە قاجەت. قاراجاتتى سوعان بولەيىك, – دەگەن ۇسىنىسىن جەتكىزدى دەپۋتات.
ەكولوگيا دەپارتامەنتىنىڭ وكىلدەرى مۇنداي مۇمكىندىكتى رەسپۋبليكالىق دەڭگەيدە قاراستىرىپ كورۋگە بولاتىنىن مالىمدەدى. ەكولوگيا مينيسترلىگىندە ۋتيل الىمى مەن وزگە ەكولوگيالىق تولەمدەردەن تۇسەتىن قاراجاتتاردى قاجەتتى باعىتتارعا تاراتۋ ماسەلەسى قارالىپ جاتىر. بۇل قاراجاتتار «جاسىل دامۋ» اق-دا ورتالىقتاندىرىلعان. بيىل كۇل-قوقىس قابىلدايتىن پوليگوندارعا قارجى بولىنە باستاۋى كەرەك. قاراجات قوقىس ورنىنا تۇسكەن قالدىقتاردى وڭدەۋگە جانە قايتا پايدالانۋعا جۇمسالادى. بۇعان قوسا بۇگىندە قالدىقتى كونتەينەرگە جيناعانى ءۇشىن پوليگون يەلەرىنە سۋبسيديا تولەنىپ كەلەدى.
پاۆلودار وبلىسى
