قىرعىز رەسپۋبليكاسىنىڭ وش وبلىسىنداعى سەل سالدارىنان تۇرعىن ۇيلەر مەن الەۋمەتتىك نىسانداردى قوسا العاندا 800-گە جۋىق عيماراتتى سۋ باستى. 14 شىلدەدەگى تولاسسىز جاۋىن-شاشىننان التى ادام قازا تاپتى. جەرگىلىكتى جاۋاپتى وكىلدەردىڭ مالىمەتىنشە, تابيعي اپات قايتالانىپ, ءبىر اۋرۋحانا, ساۋدا ءۇيى, بەس كوپىر زاقىمدانىپ, 23 اۆتوكولىكتى سۋ اعىزىپ كەتكەن. وسىناۋ قيىن تۇستا وتانداستارىمىز تاسادا قالمادى. «Biz Birgemiz» قورى مەن «جاستار رۋحى» جاستار قاناتىنىڭ ەرىكتىلەرى ەۆاكۋاتسيالانعان تۇرعىندارى ءۇشىن ازىق-ت ۇلىك, كيىم-كەشەك جانە قاجەتتى زاتتاردى جيناپ, كومەك كورسەتۋگە كىرىسىپ كەتتى.
– ەلىمىزدە ورىن العان توتەنشە جاعدايلار كەزىندە قىرعىزستاندىقتار قولداۋ كورسەتىپ, جانىمىزدان تابىلا ءبىلدى. قيىن حالدە قالعان وش وبلىسىنىڭ تۇرعىندارىنا دا ءتيىستى دەمەۋ ءبىلدىرۋ – ءبىزدىڭ پارىزىمىز دەپ بىلەمىن. دايىندالعان زاتتار ىشىندە ۇزاققا جارامدى ازىق-ت ۇلىكتەر, توسەك ورىندارى – ماتراس, جاستىق, جامىلعىش جانە تاعى باسقا العاشقى ۋاقىتتا قاجەت دۇنيەلەر بار, – دەدى «Biz Birgemiz» قورىنىڭ جەتەكشىسى پەريزات قايرات.
ءوز كەزەگىندە گۋمانيتارلىق جۇكتەردى تيەۋگە جانە جونەلتۋگە كومەك كورسەتۋ ءۇشىن از ۋاقىت ىشىندە «جاستار رۋحى» الماتى قالالىق فيليالىنىڭ 20-دان استام ەرىكتىسى جۇمىلدىرىلعان.
– ءبىزدىڭ ەرىكتىلەر كەز كەلگەن جاعدايدا كومەك كورسەتۋگە ارقاشان دايىن. باۋىرلاس قىرعىز ەلىنە قولدان كەلگەن كومەكتى ايامايتىن بولامىز. توتەنشە جاعدايلار كەزىندە تاجىريبە جيناقتاعان جاستارمەن وش قالاسىنا جول تارتتىق, – دەدى «جاستار رۋحى» الماتى قالالىق فيليالىنىڭ توراعاسى اكەجان كەڭەسوۆ.
