مىنە, تاسقىن سۋدان قاۋىپ سەيىلىپ, كوڭىل اشىلعالى تۋرا ەكى ايدان استى. اسىرەسە ەلىمىزدىڭ باتىس وڭىرىندە قارا تەرگە ءتۇسىپ, كۇنى-ءتۇنى تولتىرىلعان قاپ-قاپ توپىراق جاعا بويىنان الىنىپ, جۇرت كۇيبەڭ تىرلىكتىڭ قامىنا قايتا كىرىستى. توتەنشە جاعدايدا باسپاناسىز قالعان حالىقتىڭ الەۋمەتتىك وسال توپتارىنا, اسىراۋشىسىنان ايىرىلعان, قۇقىق بەلگىلەيتىن قۇجاتتارىندا ماسەلەلەر تۋىنداعان نە جەكە تۇرعىن ءۇيى جوق كوپبالالى وتباسىلارعا اسسامبلەيا وكىلدەرى دە ءۇي الىپ بەرىپ جاتىر.
شىنايى جاناشىرلىقتى سەزىنگەندەردىڭ ءبىرى – اتىراۋ وبلىسى قۇلسارى قالاسىنداعى اتا-اناسىنىڭ قامقورلىعىنسىز قالعان داۋىلباەۆتار وتباسى. تابيعي اپات سالدارىنان باسپاناسىز قالعان اپكەلى-ءسىڭلىلى – شاتتىق, اقتىلەك جانە ايكوركەم بۇعان دەيىن اتىراۋ قالاسىندا پاتەر جالداپ كەلگەن. ارۋلار جۋىردا قحا-نىڭ «جۇرەكتەن جۇرەككە» جوباسى اياسىندا قونىس تويىن تويلادى.
– قۇلسارى قالاسىنىڭ اكىمدىگى بىزگە ءۇي بەرىلەتىنىن حابارلاعاندا توبەمىز كوككە جەتكەندەي بولدى. سوزبەن ايتىپ جەتكىزە المايتىن, قۋانىش سەزىمى بويدى كەرنەدى. سۋ تاسقىنىنا دەيىن دە تۋىستارىمىزدىكىندە تۇرعان ەدىك. مەن ءۇيدىڭ تۇڭعىشىمىن. وسىنداي جومارت جۇرەكتى جانداردىڭ ارقاسىندا ۋايىمىم سەيىلدى. اتىراۋ قالاسى, نۇرسايا شاعىن اۋدانىنان پاتەر الىپ بەردى. قۇجاتتارى تولىق رەتتەلگەن سوڭ, اسىعا قۋانىشتى تويلادىق, – دەدى شاتتىق داۋىلباەۆا.
بوركىن اسپانعا اتىپ, باسپانا كىلتىن جۇدىرىعىنا قىسقانداردىڭ تاعى ءبىرى – باتىس قازاقستان وبلىسىنىڭ پەرەميوتنوە اۋىلىندا سۋ تاسقىنى سالدارىنان ءۇيى قيراعان ەرلى-زايىپتى بەركىنعاليەۆتەر. ولار 3 بالاسىمەن بىرگە پاتەر جاعالاۋعا ءماجبۇر بولعان. ەندى قحا مۇشەلەرى مەن مەتسەناتتارى ءۇي سىيلاپ, قيىن كۇندەر ارتتا قالدى.
– بىزگە كومەكتەسىپ, ءۇي الىپ بەرىپ جاتقان جاناشىر جاندارعا العىسىمىز شەكسىز. وتە قۋانىشتىمىز. اپات ايماعىندا تۇرىپ, بارشا وتانداسىمىزدىڭ شىنايى ىقىلاسىن سەزىندىك. جان-جاقتان قاۋمالاپ, ءار ءتۇرلى كومەك جەتتى. مەملەكەت باسشىسى قاسىم-جومارت توقاەۆ بيىل سۋعا كەتكەن تۇرعىنداردى باسپانامەن قامتۋ تۋرالى ۇندەۋ جولداعان ەدى. باسپاناسىز تەنتىرەپ, دال بولعان تۇرعىندار دا ءبىز سياقتى قۋانسا ەكەن دەپ تىلەيمىن, – دەدى پەرەميوتنوە اۋىلىنىڭ تۇرعىنى مارال بەركىنعاليەۆا.
نەگىزى العاش بولىپ, اسسامبلەيا وكىلدەرى اقمولا وبلىسى جارقايىڭ اۋدانى دەرجاۆينسك قالاسىنداعى قابيدەنوۆتەر وتباسىن جاقسى جاڭالىقپەن قۋانتتى. دارحان مەن كسەنيانىڭ باسپاناسى سۋ تاسقىنىنان زارداپ شەگىپ, قالپىنا كەلتىرۋگە جارامسىز بولىپ قالعان. ەكى بالانى تاربيەلەپ وتىرعان جۇبايلارعا 4 بولمەلى پاتەر بەرىلىپ, كومەك كورسەتىلدى.
– قازاقستان حالقى اسسامبلەياسى قايىرىمدىلىققا باسىمدىق بەرەدى. حالىقتىڭ بىرلىگى مەن سابىرى قيىندىقتا سىنالادى. ەلىمىزدىڭ بىرقاتار وڭىرىندە بولعان سۋ تاسقىنى ءبۇتىن حالىقتى جۇدىرىقتاي جۇمىلدىردى. بۇل رەتتە اسسامبلەيانىڭ ءار مۇشەسى بارلىق مۇمكىندىگىن اياماي, ايماقتارعا كومەك قولىن سوزدى. بارلىق دوستىق ۇيىندە ۆولونتەرلىك ورتالىقتار مەن گۋمانيتارلىق كومەك قابىلداۋ پۋنكتتەرى ۇيىمداستىرىلدى. اسسامبلەيانىڭ مەتسەناتتارى جان-جاقتان قالىس قالماي بەلسەندى تۇردە قارجىلاي قولداۋلارىن كورسەتتى. «جۇمىلا كوتەرگەن جۇك جەڭىل» دەمەكشى, قيىن جاعدايدا كاسىپكەرلەر مەملەكەتكە دەگەن ادالدىعىن وسىلاي حالىققا كومەك بەرۋمەن كورسەتىپ, سوزدەن ناقتى ىسكە كوشتى دەپ ايتا الامىن. اسسامبلەيا شىنىمەن مۇقتاج ادامدارعا كومەكتەسەدى. باسپانالى بولعانداردىڭ اراسىندا وتانداسىمىز, ءتورت بالانى جالعىز تاربيەلەپ وتىرعان انا – ايمان قازوۆا دا بار. ونىڭ ارقالىق قالاسى ماڭىنداعى ءۇيى قالپىنا كەلتىرۋگە جارامسىز دەپ بەلگىلەندى. ايماننىڭ قۇقىق بەلگىلەيتىن قۇجاتتارمەن ماسەلەلەرى بولىپ, باسپانا الۋدان ءۇمىتى ۇزىلگەن ەدى. ءۇمىتى اقتالدى, – دەدى سۋ تاسقىنىنان زارداپ شەككەندەرگە گۋمانيتارلىق كومەك كورسەتۋ جونىندەگى قحا رەسپۋبليكالىق شتابىنىڭ جەتەكشىسى اكبارجون يسمايلوۆ.
جالپى, قحا-نىڭ زارداپ شەككەندەرگە قولداۋ كورسەتۋ جونىندەگى رەسپۋبليكالىق جانە وڭىرلىك شتابتارى جەدەل جانە ۇيلەسىمدى تۇردە «جۇرەكتەن جۇرەككە» اۋقىمدى اكتسياسىن وتكىزدى. اپات ايماقتارىنا جالپى سوماسى 770 ميلليون تەڭگەگە 1500 توننادان استام ازىق-ت ۇلىك پەن ءبىرىنشى قاجەتتىلىكتەگى تاۋارلار جونەلتىلدى. ەتنومادەني بىرلەستىكتەردىڭ 12 مىڭ ەرىكتىسى قايىرىمدىلىق كومەك جيناۋعا, ەۆاكۋاتسيالاۋدى ۇيىمداستىرۋعا جانە ازاماتتاردى اقپاراتتاندىرۋعا بەلسەنە قاتىستى.
– وتكەن جىلدىڭ وزىندە قازاقستان حالقى اسسامبلەياسىنىڭ ۇيىمداستىرۋىمەن اباي اۋدانىنداعى الاپات ورتتەن زارداپ شەككەندەرگە جالپى سوماسى 47 ميلليون تەڭگەدەن استام گۋمانيتارلىق جانە قارجىلىق كومەك كورسەتىلدى. يگى ىستەردىڭ ۇلكەنى مەن كىشىسى بولمايدى. كومەككە مۇقتاج وتباسىلارعا قول ۇشىن سوزىپ, قايىرىمدىلىق جوبالارعا قولداۋ كورسەتۋ – ءبىزدىڭ ازاماتتىق جاۋاپكەرشىلىگىمىز جانە پاتريوتتىق سەزىمىمىزدىڭ ايقىن ۇلگىسى دەپ بىلەمىن. سوندىقتان بۇل ءىس-شارالار ءالى دە جالعاسادى. حالقىمىزدىڭ «ىرىس الدى – ىنتىماق» دەگەن قاناتتى سوزىندە ۇلكەن ءمان بار. دوستىق پەن تاتۋلىقتىڭ تەمىرقازىعىنداي ەل بىرلىگى – ەڭ باستى قۇندىلىعىمىز, باعا جەتپەس بايلىعىمىز. وسىلايشا, ەلىمىزدىڭ اۋىز بىرلىگى ارتىپ, ءال-اۋقاتى جاقسارسا, وزگەلەرمەن تەرەزەمىز تەڭ, كەرەگەمىز كەڭ ەل رەتىندە ودان ءارى دامي بەرەتىنىمىز انىق, – دەدى ا.يسمايلوۆ.
توسىننان كەلىپ, توسىرقاتقان تاسقىن تۇسىندا جاس تا, جاسامىس تا قولىنان كەلگەن كومەگىن ايامادى. ءبىرى سۋدان قورعانۋدىڭ امالىن ىستەپ, قامال تۇرعىزسا, ەندى ءبىرى كۇندىز-ءتۇنى قارا كۇش جۇمساپ, تەر توككەن جۇرتقا اس-اۋقاتىن قامدادى. تاعى ءبىر ەرىكتىلەر ارنايى پۋنكتتەردە گۋمانيتارلىق كومەكتى رەتتەپ, ۇلەستىردى. بۇگىنگى قامسىز كوڭىل سول جانداردىڭ ەڭبەگى.
