انشەيىندە دۇنيەدەگى ەڭ مىقتى زات تەمىر دەپ ويلايتىنىمىز بار. سول تەمىردىڭ ءوزى قولى ەپسەكتى, قارۋلى ۇستانىڭ دەگەنىنە كونىپ, قالاعانىنداي قالىپقا ەنەدى ەكەن. قارا تەمىرگە جان بىتىرەتىن ۇستانى كورۋىمىز العاش. وقىدىق, ەستىدىك. بىراق ونداعى اسەر ءدال جانىندا تۇرىپ قىپ-قىزىل بولىپ بالقىعان سوم تەمىردى ءداۋ بالعاسىمەن سوققىلاپ, ءوز ويلاعانىنداي بۇيىم ەتىپ شىعارامىن دەپ جانتالاسىپ جاتقان ۇستانىڭ جانىندا تۇرىپ سەزىنگەندەي بولمايدى ەكەن.
زلاتوپولە اۋىلىنداعى «اف «Burabay-2007 GCK» جاۋاپكەرشىلىگى شەكتەۋلى سەرىكتەستىگىنىڭ ماشينا-تراكتور شەبەرحاناسىنداعى ۇستا تسەحىنان قولقاڭدى قاباتىن ءتۇتىن ءيىسى اڭقيدى. كولدەنەڭ جاتقان كوك تەمىر, بالعانىڭ الدەنەشە ءتۇرى, وزگە دە قاجەتتى قۇرالدار. وسىلاي بولماي قايتسىن؟ يۆان كيسەلەۆ – بىرنەشە ماماندىقتىڭ يەسى. جالعىز ءوز شارۋاشىلىعىنىڭ عانا ەمەس, وسى توڭىرەكتەگى تۇياعى قىبىرلاعان تەحنيكانى كادەسىنە جاراتىپ جاتقان بار شارۋاشىلىققا كەرەك ادام. اسىرەسە ناۋقاندىق جۇمىس كەزىندە قادىرى ءتىپتى وسەدى. كۇنى تۇسپەيتىن كىسى جوق. باسقاسىن بىلاي قويعاندا, ءبىر قاراعاندا قۋاتتى, شىدامدى بولىپ كورىنەتىن شەتەلدىك تەحنيكانى تىزگىندەگەندەر دە ۇستانىڭ قىزمەتىنە ءزارۋ. ەسكى تەحنيكا تىزگىندەپ, ەسى كەتىپ جۇرگەندەر ەسىگىن بوساتپايدى. تەحنيكا بولعان سوڭ سىنباي تۇرا ما, ءبىر كىشكەنتاي تەتىگى ىستەن شىقسا بولدى قاڭتارىلىپ تۇرىپ قالماق. ال ونداي نايقالۋدى ۋاقىت شىركىن كوتەرمەيدى.
بيىلعى جوسىعى ءتىپتى باسقا. كوكتەم تۋعالى اسپاننىڭ قاباعى ءبىر اشىلعان جوق. بۇگىن دە سولاي, ءبىز ماشينا-تراكتور شەبەرحاناسىنىڭ تابالدىرىعىنان اتتاعان كەزدە كۇن شايداي اشىق بولاتىن. ءسۇتپىسىرىم ۋاقىت وتپەي بۋرابايدىڭ بيىگىنەن ەسكەن جەل كۇشەيىپ, جەتىم توقتىنىڭ جاباعى ءجۇنى ءتارىزدى ۇيىسقان قارا بۇلتتى ءتوندىرىپ-اق اكەلدى. اق جاۋىن توپەپ بەردى-اي دەيسىڭ. القاپ باسىنداعى شارۋا تىزگىن تارتقانىمەن, شەبەرحانانىڭ ىشىندەگى قاۋىرت قيمىل تولاستار ەمەس. مىنە, ەگىس كەشەنىنىڭ ويماقتاي تەتىگىن اينىتپاي جاساپ بەرىپ, توسىپ تۇرعان مەحانيزاتورلارعا ۇسىنىپ جاتىر. وسى تەتىك بولماسا, كەشەن جۇرمەس ەدى. ۋاقىت ونسىز دا ۇزاپ بارا جاتقان كەزدە تابيعاتتىڭ تارپاڭ مىنەزى ەكى اياقتارىن ءبىر ەتىككە تىعىپ, قۋسىرعان ديقاندار قارەكەتسىز قاراپ وتىرا الا ما؟ جاڭاعى تەتىك اۋدان, وبلىس ورتالىعىنداعى ساۋدا سورەلەرىنەن تابىلا قويماۋى مۇمكىن. جالعىز امال – تاپسىرىس بەرۋ. ول كەلىپ جەتكەنشە قانشاما ۋاقىت. ال كەز كەلگەن ۇساق تەتىكتەردى جاساۋ – شىنايى شەبەر ءۇشىن ايتۋعا تۇرمايتىن اڭگىمە.
– ۇستاسىز وتە قيىن بولار ەدى. ءبىزدىڭ ۇستامىز بىردە سوقانىڭ ءتىسىن وتكىرلەپ, قايراپ جاتسا, ەكىنشى جاعىنان تەسىلىپ قالعان رادياتورلاردى جاماپ-جاسقاپ جاتادى. يۆان ءۇشىن زاتى تەمىر بولسا بولدى, – دەيدى شەبەرحانا مەڭگەرۋشىسى ميحايل گوربەنكو.
ءبىزدىڭ كەيىپكەرىمىز ەڭ اۋەلى تراكتور تىزگىندەگەن ەكەن. جيىرما جىلدان اسا ۋاقىت بويى ەڭبەك ەتكەن. 2002 جىلدان باستاپ ۇستاحانادا جۇمىس ىستەيدى. قولىنان جەتەكتەپ اكەلىپ, ەشكىم ىسكە قوسپاعان. ءوزىنىڭ اڭسارى اۋعان-دى. ال ادامنىڭ اڭسارى ءبىر اۋسا, سول ىنتىزار كوڭىلگە قاجىر-قايراتى ۇستەمەلەپ دەم بەرسە, تاۋ قوپارماس پا؟ وزىنە دەيىن جۇمىس ىستەگەن بايىرعى ۇستا نيكولاي نيكولاەنكو ءبىر رەت قانا كورسەتىپ, ءتۇسىندىرىپتى. قالعانىن زەيىندى جىگىت جالعاستىرىپ اكەتكەن. العاشقى بەتتە جاساعان دۇنيەلەرى كادەگە اسا باستاعانىن كورگەن اكەسى «سەنىڭ ورنىڭ وسى ۇستاحانا ەكەن» دەپ جالعىز اۋىز ءسوز ايتسا كەرەك. «اكە بالاعا سىنشى» ەمەس پە, پەرزەنتىنىڭ قولىنان ءىس كەلەتىنىن اڭعارعان دا. قازىر اكە ءۇمىتىن اقتاعان ۇستا وسى توڭىرەكتەگى ءۇش ۇلكەن شارۋاشىلىقتىڭ كادەسىنە جاراپ تۇر. شارۋا قوجالىقتارى دا كەلەدى, اۋىل ادامدارى دا ءوتىنىش ايتادى. ءبىرىنىڭ ءسوزىن جەرگە تاستاعان ەمەس.
بىزبەن بۇل كۇندە ۇمىت بولعان ۇستالىق ونەر تۋرالى وي ءبولىسىپ تۇرعاندا دا قولىنداعى سوم بالعاسىن تاستاعان جوق. كورىكتىڭ ىشىندە قىپ-قىزىل بولىپ بالقىپ جاتقان سوم تەمىردى تىستەۋىكپەن تىستەپ الىپ, ءتوستىڭ ۇستىنە سالىپ, جاپىرا, سولقىلداتا سوعادى-اي كەلىپ. نە عاجابى بارىن كىم ءبىلسىن, بالقىپ تۇرعان مەتالل بىرتە-بىرتە قاجەتتى بۇيىمنىڭ كەيپىنە ەنە باستايدى. ولاي بولماسقا شاراسى دا جوقتاي. ويتكەنى ۇستا ءوز جۇمىسىن جاقسى بىلەدى.
ەندى بىرەر ايدان سوڭ يۆان ۆاسيلەۆيچ زەينەت دەمالىسىنا شىقپاق. بار جيعان تاجىريبەسىن, ءبىلىمى مەن بىلىگىن كەيىنگى ۇرپاق جالعاستىرسا دەيدى. ازىرگە 14 جاستاعى نەمەرەسى ارا-تۇرا ۇستاحاناعا باس سۇعاتىنىن كوڭىلىنە مەدەۋ ەتەدى. ءوزى دە ماڭدايدان تەرىن سورعالاتىپ, ادال ەڭبەك ەتىپ جاتقان, ەڭ باستىسى قاۋمالاعان قالىڭ ەلدىڭ العىسىن ارقالاتقان, سونشالىقتى ىستىق, سونشالىقتى قادىرلى ۇستاحاناعا وسىلاي باس سۇققان جوق پا ەدى؟ كىم ءبىلسىن, قاشاندا بولسىن ەڭبەكشى قاۋىمعا قاجەتتى ماماندىقتىڭ سورابى ۇزىلمەيتىن شىعار.
اقمولا وبلىسى,
بۋراباي اۋدانى
