فوتو: ratel.kz
پرەزيدەنت لۋلومانيانى باستى الەۋمەتتىك ماسەلەلەردىڭ ءبىرى دەپ اتادى. «كەيبىر مالىمەتتەرگە قاراساق, 400 مىڭعا جۋىق ازامات – بۋكمەكەرلىك كەڭسەلەر مەن كازينولاردىڭ تۇراقتى كليەنتى. بۇل – تۇتاس ءبىر قالانىڭ حالىق سانىنا پارا-پار كورسەتكىش», دەي كەلە مەملەكەت باسشىسى ازاماتتاردىڭ جەكەلەگەن ساناتتارى ءۇشىن قۇمار ويىندارعا قاتىستى شەكتەۋ قويۋ جۇمىسىن كۇشەيتۋدى قاجەت ەكەنىن قاداپ ايتتى.
«Amanat» پارتياسى فراكتسياسىنىڭ باستاماسىمەن وسى ماسەلە بويىنشا ءتيىستى زاڭ جوباسى ازىرلەندى. پارلامەنتتە قارالىپ جاتقان سول جوبانى وسى سەسسيانىڭ سوڭىنا دەيىن قابىلداۋ قاجەت. ءبىز جاستاردىڭ قۇمار ويىنعا سالىنىپ, ارزان تابىسقا ۇمتىلۋىنا جول بەرمەۋىمىز كەرەك. ادال ەڭبەكپەن تاپقان تابىس قانا بەرەكەلى بولادى», دەدى قاسىم-جومارت توقاەۆ.
پارلامەنت ويىن بيزنەسى, لوتەرەيا جانە لوتەرەيا قىزمەتى ماسەلەلەرى بويىنشا زاڭنامالىق تۇزەتۋلەردى, ونىڭ ىشىندە, اكىمشىلىك قۇقىق بۇزۋشىلىق تۋرالى كودەكسكە تۇزەتۋلەردى قابىلدادى. ۇكىمەت زاڭسىز ويىن بيزنەسىنە جانە لۋدومانياعا قارسى كۇرەستىڭ 2024-2026 جىلدارعا ارنالعان كەشەندى جوسپارىن ەنگىزدى.
زاڭ ارقىلى حالىقتىڭ ويىنعا تاۋەلدىلىگىن تومەندەتۋگە باعىتتالعان شەكتەۋشى جانە ىنتالاندىرۋشى نورمالار ەنگىزىلدى. ەندى مەملەكەتتىك قىزمەتكەرلەرگە قۇمار ويىنداردىڭ كەز كەلگەن قىزمەتى – بۋكمەكەرلىك كەڭسەلەر, كازينولار جانە ونلاين كازينولار شەكتەلەدى. جالپى سانى 280 مىڭعا جۋىق ادامدى قۇرايتىن اسكەري قىزمەتكەرلەر, مەملەكەتتىك مەكەمە قىزمەتكەرلەرى, بيۋدجەتتىك ۇيىمداردىڭ باسشىلارى قۇمار ويىندارعا قاتىسا المايدى. قۇمار ويىندارعا تاۋەلدى ادامداردى مەديتسينالىق وڭالتۋ ءتارتىبى دە انىقتالعان.
زاڭنىڭ ماڭىزدى جاڭالىقتارىنىڭ ءبىرى – 21 جاسقا تولماعان تۇلعالارعا ەنەرگەتيكالىق سۋسىنداردى ساتۋعا تىيىم سالۋ. زاڭ بايلانىس وپەراتورلارىنا قۇمار ويىندار مەن ءباس تىگۋگە ارنالعان جارنامانى قامتيتىن حابارلامالاردى جىبەرۋگە تىيىم
سالادى.
بۋكمەكەرلىك كەڭسەنىڭ ورنالاسقان جەرىندە, عيماراتتاردا, كولىك قۇرالدارىندا بۋكمەكەرلىك كەڭسەلەر عيماراتتارىنىڭ سىرتقى جارناماسىنا, بۋكمەكەرلىك كەڭسەلەردى بۇقارالىق اقپارات قۇرالدارىندا, كينو, بەينە جانە انىقتامالىق قىزمەتتەردە جارنامالاۋعا تىيىم سالىنادى. بۋكمەكەرلىك كەڭسەلەردىڭ جارناماسىن تاراتقان جاعدايدا 60 اەك جانە ودان جوعارى ايىپپۇلدار قاراستىرىلعان.
ونلاين-كازينو ۇيىمداستىرۋشىلارى ەكى جىلعا دەيىن باس بوستاندىعىنان ايىرىلۋمەن بايلانىستى قىلمىستىق جاۋاپكەرشىلىككە تارتىلۋ قاۋپى بار. بۇدان وزگە وزگەرىستەر مەن تولىقتىرۋلار ەنگىزىلگەن زاڭعا سايكەس ەندى ەلەكتروندى لوتەرەيا بيلەتتەرى تەك رەسمي ينتەرنەت-رەسۋرس نەمەسە لوتەرەيا وپەراتورىنىڭ ءموبيلدى قوسىمشاسى ارقىلى ساتىلادى. «Lotomatic» تەرمينالدارى مەن لوتو كلۋبتارىنىڭ قىزمەتىنە تىيىم سالىندى.
لوتەرەيا بيلەتتەرىن تۇرعىن ۇيلەردە, جاتاقحانالاردا, ۇيىمداردا, ءبىلىم بەرۋ, دەنساۋلىق ساقتاۋ, ءدىني عيماراتتارى مەن قۇرىلىستارىندا, ءبىلىم بەرۋ جانە دەنساۋلىق ساقتاۋ ۇيىمدارىنان ءجۇز مەتر راديۋستا تاراتۋعا تىيىم سالىنادى. بۇل دا بىتكەن ۇلكەن ءبىر جۇمىس ءارى جەڭىس. سەبەبى ءدال وسى زاڭعا قارسى بولعان نەبىر لوببيستىك توپتار بولدى.
داۋلەت مۇقاەۆ,
ءماجىلىس دەپۋتاتى
