دەنەسىنىڭ كوپ بولىگىن كۇيىك شالعان جۇمىسشىلار ح.ماقاجانوۆ اتىنداعى كوپبەيىندى اۋرۋحانادا ەم-دوم قابىلداپ جاتىر.
«ناۋقاستاردىڭ كوبى تەرميالىق كۇيىك العان. بەسەۋىندە كۇيىك دارەجەسى 70 پەن 100 پايىزدىڭ اراسىندا. باسى, اياق-قولى عانا ەمەس, تاعى دا ينگالياتسيالىق كۇيىكپەن زاقىمدانعان. سوندىقتان جاعدايلارى وتە اۋىر. دارىگەرلەر ناۋقاستاردى ءجىتى باقىلاپ, ەدەل-جەدەل ەم-دومىن جاساپ جاتىر», دەيدى پروفەسسور ح.ماقاجانوۆ اتىنداعى كوپسالالى اۋرۋحانانىڭ تراۆماتولوگيا ورتالىعىنىڭ باسشىسى بەرىك تىلەۋباەۆ.
دەنساۋلىق ساقتاۋ مينيسترلىگىنىڭ تاپسىرماسىمەن قوسىمشا مەديتسينالىق كومەكتى كورسەتۋ ءۇشىن قاراعاندىعا اكادەميك ن.باتپەنوۆ اتىنداعى ۇلتتىق تراۆماتولوگيا جانە ورتوپەديا عىلىمي ورتالىعىنىڭ ديرەكتورى ولجاس بەكارىسوۆ باستاعان قىزمەتكەرلەر ارنايى كەلدى. مەديتسينالىق توپتىڭ قۇرامىندا تاجىريبەلى كومبۋستيولوگ-رەانيماتولوگتەر بار.
وكىنىشكە قاراي, دارىگەرلەر 30 جاستاعى مۇزافار يسمايلوۆتىڭ جانىن اراشالاي المادى. مارقۇمنىڭ دەنەسىنىڭ 85 پايىزى كۇيگەن. قارالى حاباردى كومپانيا جەتكىزىپ, وتباسىنا بارىنشا كومەك كورسەتەمىز دەدى.
«ارىپتەسىمىز, پەش باستىعى مۇزافار يسمايلوۆ اۋرۋحانادا قايتىس بولدى. ءبىز مۇزافاردىڭ وتباسى مەن ونىڭ جاقىندارىنا وسىناۋ قيىن ساتتە قايعىلارىنا ورتاقتاسىپ, كوڭىل ايتامىز. سونداي-اق ونىڭ وتباسى مۇشەلەرىنىڭ وسى قيىن كەزەڭنەن ءوتۋى ءۇشىن قولدان كەلگەننىڭ ءبارىن جاسايمىز», دەپ حابارلادى «YDD Corporation» كومپانياسى.
«YDD Corporation» قازا بولعان قىزمەتكەرىنىڭ وتباسىنا قاجەتتى قولداۋدى كورسەتەمىز دەپ ۋادەسىن بەردى. ناقتى ايتقاندا, مارقۇمدى اقتىق ساپارعا شىعارىپ سالۋ شىعىندارى مەن ونىڭ وتباسىنىڭ بارلىق نەسيەسىن جاۋىپ, تۇرعىن ءۇي جاعدايىن جاقسارتۋعا كومەك بەرەدى. ونىمەن قوسا كومپانيا 10 جىلدىق جالاقى مولشەرىندە قارجىلىق كومەك تولەيدى.
فەرروقورىتپا زاۋىتىندا بولعان جازاتايىم وقيعانىڭ سەبەبى مەن ءمان-جايدى انىقتاۋ ءۇشىن ەڭبەك زاڭناماسىنا سايكەس ارنايى كوميسسيا قۇرىلدى. ونى ەڭبەك ينسپەكتسياسى باسقارماسىنىڭ باسشىسى مۇرات قاراكەكىلوۆ باسقارادى. كوميسسيا قۇرامىندا بارلىق ۋاكىلەتتى مەملەكەتتىك ورگانداردىڭ وكىلدەرى بار.
وقيعا ورنى تەكسەرىلىپ, جازاتايىم وقيعانىڭ كۋاگەرلەرىنە ساۋالناما جۇرگىزىلدى, تەحنيكالىق قۇجاتتامامەن تانىسۋ جۇمىسى ءجۇرىپ جاتىر.
زاۋىتتاعى وقىس وقيعانى تەرگەپ-تەكسەرۋ وبلىس باسشىلىعىنىڭ تۇراقتى باقىلاۋىندا. وبلىس اكىمى ەرماعانبەت بولەكپاەۆ زارداپ شەككەن قىزمەتكەرلەردىڭ تۋىستارىمەن كەزدەستى. سونىمەن قاتار دارىگەرلەر مالىمەتىن تىڭدادى.
«فەرروقورىتپا زاۋىتىندا بولعان وقىس جاعدايدان, وكىنىشكە قاراي, 8 قىزمەتكەر زارداپ شەكتى, بىرەۋى قازا بولدى. زارداپ شەككەن ازاماتتارعا قاجەتتى مەديتسينالىق كومەك كورسەتىلىپ جاتىر. مەديتسينا قىزمەتكەرلەرى قولدان كەلگەننىڭ ءبارىن جاسايدى», دەدى وبلىس اكىمى.
ءتورت ادامنىڭ جاعدايى وتە اۋىر, ۇشەۋىنىڭ جاعدايى كۇردەلى. بۇل تۋرالى وبلىستىق دەنساۋلىق ساقتاۋ باسقارماسىنىڭ باسشىسى بيبىگۇل تولەگەنوۆا حابارلادى.
بۇل وقيعاعا بايلانىستى فەرروقورىتپا زاۋىتىندا قىلمىستىق كودەكستىڭ 156-بابىنىڭ 2-بولىگى بويىنشا, ياعني «ابايسىزدا دەنساۋلىققا اۋىر زيان كەلتىرۋگە اكەپ سوققان ەڭبەكتى قورعاۋ ەرەجەلەرىن بۇزۋ» بويىنشا قىلمىستىق ءىس تە قوزعالدى. تەرگەۋ شارالارى بويىنشا قورىتىندى جاسالادى.
قاراعاندى وبلىسى
