كوللاجدى جاساعان – امانگەلدى قياس, «EQ»
القيسسا, ءبىلىم ەكىگە بولىنەدى دەيدى. ءبىرى – باس ءبىلىمى, ەكىنشىسى – جۇرەك ءبىلىمى. باس ءبىلىمى – كاسىپتىك ءبىلىم, سالالىق, ماماندىقتى يگەرۋ, مال تابۋعا ارنالعان دۇنيەلىك بىلىمدەر. ال جۇرەك ءبىلىمى – ار-ۇيات, يمان, وبال, ساۋاپ ءبىلىمى. شىعىستا تەك باس ءبىلىمىن مەڭگەرىپ, جۇرەك ءبىلىمىن الماعاندى جالعىز كوزدى توبەكوزگە تەڭەگەن ەكەن. توبەكوز ۇعىمى وسى تۇسىنىكتەن شىققان دەسەدى. ياعني وبال, ساۋاپ ءبىلىمىن يگەرمەگەن جان كىسىگە جانى اشۋ, تازالىق, كىسىلىك دەگەن قاسيەتتەردى «ەسكىلىك» دەپ قاراپ, سۋىق اقىلمەن مەجەسىنە ۇمتىلادى. نەگە اۋىل قارتىنىڭ كەۋدەسى كومبە, ءتۇسى مەن ءسوزى جىلى؟ ولار ءداستۇر اتتى ينستيتۋتتىڭ ۇزدىك شاكىرتتەرى ەكەن. ال قازاقى سالت-سانا, ىرىم مەن جورالعى, ءداستۇر ساباقتاستىعى يمان بىلىمىمەن, ار-ۇيات, وبال, ساۋاپپەن بىتە قايناسقان. كەيدە ەلدىك ءداستۇر اتتى ينستيتۋتىنا جەتەر بىلىكتى ورىن جوق شىعار دەگەن وي كەلەدى. ءوز باسىم باتىستان, شىعىستان, الەمنىڭ تۇكپىر-تۇكپىرىنەن ىزدەگەن, تاپقان ءبىلىمىم قازاقىلىق اتتى كيەلى ۇعىمنىڭ توبىعىنا دا جەتە المايتىنىن سەزدىم. شىن قازاق بولۋ قيىننىڭ قيىنى, بىراق بۇل باقىت ەكەن. باقىت بولاتىنى, ءسىز قازاق بولىپ-اق وراسان زور باي دۇنيەتانىمعا, نۇرلى اقىلعا, القام-سالقام دارقان مىنەزگە يە بولاسىز.
ادەبيەتكە قاراساق, مۇقاعالي, بەردىبەك, سايىندار اۋىلدان الماتىعا كەش كەلىپتى. ەلدىك ءداستۇر ينستيتۋتىنا تويىپ كەلىپ, تويعان قوزىداي تومپايىپ ءجۇرىپتى. سولايشا ۇلتتىق بيىككە قولتاڭباسىن قالدىرىپتى.
ەدىگە بوكەي,
«Egemen Qazaqstan»
