كوللاجدى جاساعان زاۋرەش سماعۇل, «ەQ»
مەملەكەتتىك كىرىستەر كوميتەتىنىڭ حابارلاۋىنشا, بانكروت اتانۋعا قاتىستى ۇدەرىس كەزىندە ماقۇلداۋ الماۋدىڭ ءبىر سەبەبى – قارىزدى رەتتەۋ بويىنشا جۇرگىزىلگەن شارالار تۋرالى قۇجاتتىڭ جوقتىعى. ەندى اتالعان تالاپ الىنىپ تاستالۋى مۇمكىن. قارجى ءمينيسترى ءمادي تاكيەۆتىڭ ايتۋىنشا, قازىر بانكروتتىق ۇدەرىسىن قيىنداتاتىن تالاپتاردى جويۋ ماسەلەسى قاراستىرىلىپ جاتىر.
«جەكە تۇلعا ەشقانداي ارتىق ارەكەتسىز ءوتىنىم بەرە الادى. سولاي وڭتايلى بولماق. سونىمەن قاتار زاڭنامالىق دەڭگەيدە تۇتىنۋشىلىق نەسيە تۇسىنىگىن ەنگىزۋ ۇسىنىلىپ وتىر. سونداي-اق بانكتەر ءۇشىن سوما 5 ملن تەڭگەدەن اسسا, ميكروقارجى ۇيىمدارى ءۇشىن سوما 3 ملن تەڭگەدەن اسسا, ونداي نەسيەلەردى بەرىلمەيتىن ەتەتىن تەتىك ەنگىزىلمەك. وزگەرتۋلەر تولەم قابىلەتىن قالپىنا كەلتىرۋ پروتسەدۋراسىنا دا قاتىستى», دەيدى مينيستر.
دارمەنسىز بورىشكەرلەرمەن جۇمىس باسقارماسىنىڭ باسشىسى مەرۋەرت سەيسەمباەۆا دا بانكروتتىق ماسەلەسىندە ىڭعايلى وزگەرىستەردىڭ بولاتىنىن ايتادى.
«ەگەر قازىرگى كۇندە تولەم قابىلەتىن قالپىنا كەلتىرۋ ۇدەرىسى قارىز بەرەشەگىنىڭ تولەنبەگەنىنە ءبىر جىلدان اسقان ازاماتتارعا عانا قولدانىلسا, ەندىگى وزگەرىستەر بۇل نورمانى ءبىراز جاقسارتپاق. نەسيە تولەمدەرى بويىنشا پروبلەما تۋىنداعان جاعدايدا ولار 12 ايدى كۇتپەي-اق, وسى ۇدەرىسكە جۇگىنە الادى. ياعني كرەديتورمەن رەتتەۋ ۇدەرىسى تولەم قابىلەتىن قالپىنا كەلتىرۋ ۇدەرىسى اياسىندا جۇرگىزىلەدى. سونداي-اق بۇعان دەيىن ازاماتتىڭ شەتەلگە شىعۋىنا تىيىم سالىنسا, ەندى بۇل شەكتەۋ دە الىنىپ تاستالادى», دەيدى.
ماماننىڭ ايتۋىنشا, بۇل شارالاردىڭ ءبارى نەسيەلەۋ كەزىندەگى تاۋەكەلدەردى ايتارلىقتاي تومەندەتەدى دەپ كۇتىلەدى. دەگەنمەن ازاماتتار بانكروت اتانۋ مۇمكىندىگىن «ايرىقشا قامقورلىق» دەپ ۇعىنۋعا ءتيىستى ەمەس. ويتكەنى بانكروت اتانعان ادام 5 جىل بويى ەشقانداي قارجى ۇيىمىنان قارىز الا المايدى جانە 3 جىل بويى تۇراقتى باقىلاۋدا بولادى.
«ارينە, بارلىق بانك بىردەي بانكروتتىق تۋرالى زاڭدى قابىل الا قويمايدى. ويتكەنى قارىزدى كەشىرۋ بانكتەردىڭ موينىنا جۇك بولىپ تۇسەدى. ولار وزدەرىنىڭ رەزەرۆتىك پروۆيزياسى ەسەبىنەن ازاماتتاردىڭ قارىزىن كەشىرەدى. ءبىر جاعىنان ولار قانشاما جىل بويى بورىشكەرلەردىڭ وسى پروبلەماسىن شەشە الماسا, وندا نەگە بانكروت دەپ تانىماسقا؟
جىل باسىنان بەرى 3 600 ادام بانكروت دەپ تانىلعان. ولاردىڭ جالپى بەرەشەگى – 9 ملرد تەڭگە.
