فوتو: wrm.kz
بولىنگەن قارجى اقمولا, اقتوبە, قوستاناي جانە سولتۇستىك قازاقستان وبلىستارىنداعى جولداردى, سونداي-اق كوپىرلەر مەن سۋ وتكىزگىش قۇرىلىمداردى قالپىنا كەلتىرۋگە, رەكونسترۋكتسيالاۋعا جانە قۇرىلىس جۇمىستارى ءۇشىن اكىمدىكتەرگە ۇلەستىرىلەدى.
سۋ تاسقىنىنىڭ سالدارىن جويۋ باعىتىندا اقتوبە وبلىسىندا 31 جوبا جۇزەگە اسىرىلىپ جاتىر. ولاردىڭ ىشىندە ىرعىز – نۇرا, ىرعىز – قۇتتىكول, قۇمتوعاي اۆتوجولدارىنداعى سۋ وتكىزگىش قۇبىرلاردى, ويىل اۋىلىنا اپاراتىن اۆتوجولدى جوندەۋ, ويىل وزەنىندەگى كوپىردى قايتا جاڭعىرتۋ, سونداي-اق ايتەكە بي اۋدانى ايكە اۋىلىنداعى كوپىر وتكەلىنىڭ قۇرىلىسى بار.
«اقمولا وبلىسىندا اتباسار قالاسىنا اپاراتىن جول بولىگىن, اتباسار – سوچينسكوە اۆتوجولىن قايتا جاڭارتۋ, جالتىر – ماكينسك اۆتوجولىن, قالقۇتان اۋىلىنا, جامبىل جانە باسقا دا ەلدى مەكەندەرگە كىرەبەرىس جولدارىن جوندەۋ جۇمىستارى جۇرگىزىلەدى. بارلىعى – 14 باعىت.
قوستاناي وبلىسىندا قاراجات 22 باعىت بويىنشا جولداردى, كوپىرلەردى جانە 10-عا جۋىق سۋ وتكىزگىش قۇبىردى جوندەۋگە جانە رەكونسترۋكتسيالاۋعا جۇمسالادى», دەلىنگەن ۇكىمەت حابارلاماسىندا.
سونىمەن قاتار وسى قارجى ەسەبىنەن سولتۇستىك قازاقستان وبلىسىندا 10 جولدى, ونىڭ ىشىندە كوكشەتاۋ – ومبى باعىتىنداعى جولدى جوندەۋ, سونداي-اق 22 شاقىرىم سۋ وتكىزگىش قۇبىرلارعا ورتاشا جوندەۋ جۇمىستارىن جۇرگىزۋ جوسپارلانعان.
