ماڭعىستاۋ وڭىرىندە ەلىمىزدىڭ قورعانىس ءمينيسترى, گەنەرال-پولكوۆنيك رۋسلان جاقسىلىقوۆ ازەربايجان, قىرعىز رەسپۋبليكاسى, تاجىكستان جانە وزبەكستاننان كەلگەن ارىپتەستەرىن سەنىپ تاپسىرىلعان اسكەري بولىمشەلەردىڭ وقۋ-جاۋىنگەرلىك مۇمكىندىكتەرىمەن جانە وقۋ-جاتتىعۋدى وتكىزۋ شارتتارىمەن تانىستىردى. قورعانىس ۆەدومستۆولارىنىڭ باسشىلارى الدىمەن قازاقستان قارۋلى كۇشتەرى اسكەري-تەڭىز كۇشتەرىنىڭ زىمىران-ارتيللەريالىق كەمەسىندە بولدى. وندا دەلەگاتسيا باسشىلارى كەمەنىڭ جاۋىنگەرلىك مۇمكىندىكتەرى مەن ورىندايتىن تاپسىرمالارىمەن تانىسىپ, سۇڭگۋىر ورتالىعىنا كەلدى. وقۋ-جاتتىعۋ كەشەنىندە ولارعا جاۋىنگەر جۇزۋشىلەردى كاسىبي دايىنداۋ بارىسىندا قولدانىلاتىن قارۋ-جاراق پەن تەحنيكالىق قۇرالدار تۋرالى ماعلۇمات بەرىلدى.
بۇدان كەيىن شەتەلدىك قوناقتارعا 25744 اسكەري بولىمىندە تەڭىز جاياۋ اسكەرلەرىن دايىنداۋ جۇزەگە اسىرىلاتىن وقۋ ترەناجەرلەرى كورسەتىلدى. دەلەگاتسيا باسشىلارى «ويماشا» پوليگونىندا اسكەري قىزمەتشىلەردى ورنالاستىرۋ جانە تاماقتاندىرۋ جاعدايىمەن تانىسىپ, قارۋ-جاراق پەن اسكەري تەحنيكانى تەكسەرگەن سوڭ اسكەري اتىس الاڭىنا كەلدى. وندا دوستىق ارميالارى اسكەري قىزمەتشىلەرى تاكتيكالىق اتىس ەلەمەنتتەرىن ءساتتى ورىنداپ, اتۋ كەزىندە كەرەمەت شەبەرلىك پەن دالدىك كورسەتتى. سونىمەن قاتار قورعانىس ۆەدومستۆولارىنىڭ باسشىلارى «باتىس» جەدەل قولباسشىلىعى اسكەرلەرى بىرىككەن توبىنىڭ باسقارۋ پۋنكتىندە بولىپ, ونىڭ مۇمكىندىكتەرىمەن جانە وقۋ-جاتتىعۋدىڭ جوسپارىمەن تانىستى.
«بىرلەستىك-2024» وقۋ-جاتتىعۋى اياسىندا تۇنگى ۋاقىتتا قاتىسۋشى مەملەكەتتەردىڭ اسكەري جاۋىنگەرلەرى تاكتيكالىق ءىس-قيمىلداردى تاجىريبە تۇرىندە كورسەتتى.
اسكەرلەردىڭ بىرىككەن ءىس-قيمىلىن باقىلاۋ الاڭىنان بەس ەلدىڭ قورعانىسقا جاۋاپتى باسشىلارى تۇگەل باقىلاپ وتىردى. ايتا كەتۋ كەرەك, «ويماشا» پوليگونىندا وتكەن سوعىس قيمىلدارى تەاترىندا قاتىسۋشى ەلدەردىڭ اسكەري قىزمەتشىلەرى 17 تاكتيكالىق ەپيزودتى پىسىقتادى. ونىڭ ءبارى حاليفات مەملەكەتىن قۇرۋعا ۇمتىلعان زاڭسىز قارۋلى قۇرىلىمداردى تاۋىپ, ولاردىڭ كوزىن جويۋ جونىندەگى بىرىڭعاي وقۋ-جاۋىنگەرلىك تاپسىرمالارعا باعىندى. ارنايى وپەراتسيانى ءساتتى جۇزەگە اسىرۋدا جەر ءۇستى جانە اۋەدەن بارلاۋ قىزمەتتەرى ماڭىزدى ءرول اتقاردى.
باندالىق قۇرىلىمداردىڭ بازالارىن تاپقاننان كەيىن, ارنايى ماقساتتاعى توپتار سوققى بەرۋ ءۇشىن ارميالىق اۆياتسياعا كوورديناتتاردى تاپسىردى. سونىمەن قاتار العى شەپتەگى بازالىق ايماقتاردى, سودىرلاردىڭ پوزيتسيالارىن جانە ولاردىڭ باعدارى مەن قوزعالىسىن ىزدەۋدى جاۋىنگەرلىك ەكيپاجدار, Wing Loong, Orbiter جانە Puma ۇشقىشسىز ۇشاتىن اپپاراتتارىنداعى بارلاۋ كەشەندەرى جۇزەگە اسىردى. باندالىق قۇرىلىمداردىڭ ورىستەگەن جەرى ارتيللەريانىڭ كۇشىمەن جويىلدى. جاۋ پوزيتسياسىنان ۇشىرىلعان دروندار توبىنىڭ شابۋىلىنا اسكەري قىزمەتشىلەر راديوەلەكتروندى كۇرەس قۇرالدارىمەن ءوزارا ءىس-قيمىل جاساي وتىرىپ, جىلجىمالى زەنيتتى زىمىران كەشەندەرىمەن جانە زەنيتتىك قوندىرعىلارمەن تويتارىس بەردى. وسىلايشا, زاڭسىز قارۋلى قۇرىلىمعا بارىنشا زيان كەلتىرۋ ماقساتىمەن اسكەرلەر توبىنىڭ بىرىككەن بولىمشەلەرى باسقارىلاتىن مينا الاڭدارى مەن ارتيللەريا كۇشتەرىن قولدانىپ «وت قاپشىعىن» قۇرۋ بويىنشا مانەۆر جاسادى.
جاۋ ارتيللەرياسىنىڭ اتىس شابۋىلىن تويتارۋعا تانككە قارسى قول جانە ستانوكتىق گراناتومەتپەن, رەاكتيۆتى جاياۋ اسكەر وتشاشارىمەن, تانككە قارسى زىمىران كەشەندەرىمەن جانە پۋلەمەتتەرمەن جابدىقتالعان ۇتقىر توپتار قاتىستى. ولاردىڭ تۋننەلدەر ارقىلى شەگىنىس جاساۋى اسكەري كونتينگەنتتەر ارتيللەريالىق ەسەپ توپتارىنىڭ قولداۋىمەن جۇزەگە اسىرىلدى. «ساق قورعانى» تاكتيكالىق ءتاسىلىن ورىنداۋ كەزىندە تانك ەكيپاجدارى ۇيلەسىمدى قيمىل كورسەتتى. شابۋىلعا تويتارىس بەرۋدەگى ءادىستىڭ ارتىقشىلىعى – تانكتەردىڭ اياق استىنان پايدا بولۋى جانە شابۋىلداۋشى جەڭىلىسكە ۇشىراۋى بولدى. زاڭسىز قارۋلى قۇرىلىم توپتارىنىڭ سىتىلىپ كەتۋىنە اتىس شەبىندە ورنالاسقان رەزەرۆتىك كۇشتەر كەدەرگى كەلتىردى. وپەراتسيانىڭ ساتتىلىگى الدىن الا ءتيىمدى پوزيتسياعا يە بولعان تاكتيكالىق اۋە دەسانتىن, سونداي-اق ارالاس اۆياتسيالىق توپتىڭ سوققىلارىن ەنگىزۋ ارقىلى دامىدى. ودان ءارى اسكەري مانەۆرلەر كاسپي جاعالاۋىندا جانە توقماق مۇيىسىنە جاقىن تەڭىز ۋچاسكەسىندە جالعاستى.
ەپتىلىگى مەن جاۋىنگەرلىك دايىندىقتى شىڭداۋعا نەگىزدەلگەن «بىرلەستىك-2024» جەدەل-تاكتيكالىق كوماندالىق-شتابتىق وقۋ-جاتتىعۋىنىڭ سوڭى توقماق مۇيىسىندەگى كاسپي تەڭىزىنىڭ قازاقستان سەكتورىندا پراكتيكالىق ءىس-قيمىلداردى پىسىقتاۋمەن اياقتالدى. جوسپار بويىنشا قۇرلىقتىڭ وسى بولىگىنە شوعىرلانعان سودىرلار توبىنىڭ قالدىقتارى ايتارلىقتاي شىعىنعا ۇشىرايدى. بىرىككەن اسكەرلەر توبىنىڭ بولىمشەلەرى بارلاۋ جۇرگىزىپ, ميناعا قارسى قامتاماسىز ەتۋ, ارالىق بازانى, قۇرلىقتاعى جانە تەڭىزدەگى سودىرلاردى جويۋ جۇمىستارىن جۇرگىزدى. وپەراتسياعا اسكەري-تەڭىز دەسانتى مەن اۋە دەسانتتارى, شابۋىلداۋ ەشەلوندارى, ءموبيلدى-اتىس توبى قاتىستى. ولاردىڭ ارەكەتتەرى زىمىران-ارتيللەريالىق كەمەلەرمەن, ارتيللەريامەن, ارميالىق جانە مايداندىق اۆياتسيامەن قولداۋ تاپتى.
قاتىسۋشىلاردى وقۋ-جاتتىعۋدىڭ اياقتالۋىمەن ەلىمىزدىڭ قورعانىس ءمينيسترى, گەنەرال-پولكوۆنيك رۋسلان جاقسىلىقوۆ قۇتتىقتادى. ول قارۋلى قاقتىعىستى وقشاۋلاۋ جونىندەگى بىرلەسكەن وپەراتسيا باسقارۋ ورگاندارىنىڭ ۇيلەسىمدىلىگىن, جاۋىنگەرلىك ازىرلىكتى جانە اسكەري كونتينگەنتتەر بولىمشەلەرىنىڭ جەدەل ۇيلەسىمدىلىگىن جەتىلدىرۋگە باعىتتالعانىن جەتكىزدى. اسكەري قىزمەتشىلەر بۇل تاپسىرمانى ءساتتى ورىنداپ, جاۋىنگەرلىك جاعدايداعى ءوزارا ءىس-قيمىلدىڭ وڭ تاجىريبەسىن الدى.
– وقۋ-جاتتىعۋ جوسپارىن ىسكە اسىرۋ بارىسى ناقتى جاۋىنگەرلىك جاعدايلارعا جاقىن مودەلدەندى. قايتا توپتاستىرۋ جانە بىرىككەن اسكەرلەر توبىن قۇرۋ ماسەلەلەرى پىسىقتالدى. تاكتيكالىق ەپيزودتاردى ورىنداۋ كەزىندە ءارتۇرلى قارۋ-جاراق پەن اسكەري تەحنيكا قولدانىلدى, اۆياتسيا, اسكەري-تەڭىز كۇشتەرىنىڭ كەمەلەرى, ارتيللەريالىق ەسەپتوپتار, اۋە قورعانىسىنىڭ زەنيتتىك-زىمىراندىق كەشەندەرى, بروندى جانە ينجەنەرلىك تەحنيكا, ۇشقىشسىز ۇشۋ اپپاراتتارى جۇمىلدىرىلدى, – دەپ ناقتىلادى ول.
سونداي-اق قورعانىس ءمينيسترى بيىل قۇرلىقتا جانە تەڭىزدە وتكىزىلگەن وقۋ-جاتتىعۋ تەك اۋقىمىمەن عانا ەمەس, جەكە قۇرامنىڭ كاسىبي دايىندىق دەڭگەيىمەن دە ەرەكشەلەنەتىنىن اتاپ ءوتتى.
– قاتىسۋشى ەلدەردىڭ اسكەري كونتينگەنتتەرى ءبىر ساپتا جاۋىنگەرلىك مىندەتتەردى كەلىسىپ ءارى شەبەر ورىنداۋعا دايىن ەكەندىكتەرىن دالەلدەدى. بىرلەسكەن وقۋ-جاتتىعۋ ءوز ماقساتىنا قول جەتكىزدى جانە قويىلعان مىندەتتەر تولىق كولەمدە ورىندالدى دەپ ەسەپتەيمىن, – دەدى ر.جاقسىلىقوۆ.
ءراسىم بارىسىندا ازەربايجان قورعانىس ءمينيسترى زاكير گاسانوۆ, قىرعىز رەسپۋبليكاسى قورعانىس ءمينيسترى باقتىبەك بەكبولوتوۆ, وزبەكستان قورعانىس ءمينيسترى باحودير قۇربانوۆ جانە تاجىكستان قارۋلى كۇشتەرى باس شتابى باستىعىنىڭ ءبىرىنشى ورىنباسارى سايداسرور سايد ابدۋللوزودا ءسوز سويلەدى. وقۋ-جاتتىعۋدى ۇيىمداستىرۋشىلارعا العىسىن بىلدىرگەن دەلەگاتسيا باسشىلارى دايىندىقتىڭ جوعارى دەڭگەيىن اتاپ ءوتتى. قاتىسۋشى ەلدەر قارۋلى كۇشتەرىنىڭ ىقتيمال اگرەسسيالىق اكتىلەردى تويتارۋعا جاۋىنگەرلىك ازىرلىگىن نىعايتۋعا قىزمەت ەتەتىنىنە سەنىم ءبىلدىردى.
وقۋ-جاتتىعۋ سوڭىندا قاتىسۋشى ەلدەر قورعانىس مينيسترلەرىنىڭ بۇيرىقتارىمەن بىرقاتار اسكەري قىزمەتشى حالىقارالىق ىنتىماقتاستىقتى دامىتۋعا قوسقان ۇلەسى ءۇشىن مەدالمەن جانە ەستەلىك كادەسىيلارمەن ماراپاتتالدى. ءىس-شارا اسكەري كونتينگەنتتەر لەگىنىڭ سالتاناتتى شەرۋىمەن اياقتالدى.
