ءىس-شاراعا ەلىمىزدىڭ ۇلتتىق ۇلاننىڭ گەنەرال-مايورى قايرات ۇمبەتوۆ, پودپولكوۆنيك تالعات ناشەنوۆ, سونداي-اق قازاقستان مۇسىلماندارى ءدىني باسقارماسىنىڭ وكىلدەرى, ەلشىلىكتىڭ قىزمەتكەرلەرى قاتىستى. شارا 2016 جىلى 15 شىلدەدە توڭكەرىسشىلەردىڭ قولىنان قازا بولعان 253 شەيىتتى ءبىر مينۋت ۇنسىزدىكپەن ەسكە الۋمەن باستالدى.
راسىمگە قاتىسقان قازاقستان مۇسىلماندارى ءدىني باسقارماسىنىڭ مامانى ابىلايحان ەرەجەپوۆ قۇران وقىپ, تۋىس حالىقتىڭ باسىنان وتكەن قارالى كۇندەردىڭ قايتالانباۋىن تىلەدى. سونداي-اق ەكى ەلدىڭ بولاشاعى جارقىن, ىنتىماقتاستىعى ءوربي بەرەرىنە سەنىم ءبىلدىردى. ءوز كەزەگىندە ءسوز العان نايب ءمۇفتي ەرشات اعىباي دا شەيىتتەرگە دۇعا جاساپ, الەمدەگى گەوساياسي جاعداي قۇبىلىپ تۇرعان كەزەڭدە مەملەكەتتەردىڭ اماندىعى مەن تىنىشتىعى ماڭىزدى ەكەنىن ەسكە سالدى. بۇدان كەيىن جينالعانداردىڭ نازارىنا توعىز جىل بۇرىن تۇركيادا بولعان وقيعا تۋرالى دەرەكتى فيلم ۇسىنىلدى.
سالتاناتتى شارادا ءسوز العان تۇركيانىڭ استاناداعى ەلشىسى مۇستافا كاپۋدجۋ تەرروريستىك ۇيىم كەز كەلگەن ەلگە قاۋىپ توندىرەتىنىن اتاپ ءوتتى. بۇل ورايدا ول باۋىرلاس قازاقستاننىڭ دا تەررورلىق ۇيىمعا قارسى جەرگىلىكتى جانە حالىقارالىق زاڭ اياسىندا ءتيىمدى كۇرەس جۇرگىزۋدە قولداۋ كۇتەتىنىن جەتكىزدى.
