فوتو: dzen.ru
ءدال وسى فاكتىمەن جابىرلەنۋشىلەرگە كەلتىرىلگەن شىعىن كولەمى بىرنەشە ميلليون تەڭگەدەن اسقان.
«الدىمەن الاياقتار ازاماتتارعا تەلەفون سوعىپ, وزدەرىن ۇيالى بايلانىس وپەراتورىنىڭ قىزمەتكەرى رەتىندە تانىستىرادى. ولار تەلەفون ءنومىرىڭىزدىڭ مەرزىمى ءوتىپ كەتكەنىن ايتىپ, قىزمەت كورسەتۋ مەرزىمىن ۇزارتۋدى ۇسىنادى. ەگەر دە ۇزارتۋعا كەلىسكەن جاعدايدا, الاياقتار SMS-حابارلامادان كەلگەن كودتى ايتۋدى سۇرايدى. كودتى العاننان كەيىن ولار WhatsApp ارقىلى قوڭىراۋ شالىپ, وزدەرىن قۇزىرلى ورگان قىزمەتكەرلەرىمىز دەپ تانىستىرادى. ءسىزدى الاياقتار, جالعان وپەراتورلار الداپ, اتىڭىزعا بىرنەشە بانكتەن نەسيە راسىمدەلگەنىن حابارلايدى», دەدى اقتوبە وبلىسىنىڭ كريمينالدىق پوليتسيا باسقارماسىنىڭ اعا جەدەل ۋاكىلى باقداۋلەت بالمۋرزين.
سونداي-اق ولار وزدەرىن ۇلتتىق قاۋىپسىزدىك كوميتەتىنىڭ, پوليتسيانىڭ, بانكتىڭ جانە ت.ب. قىزمەتكەرلەرى رەتىندە تانىستىرعان. قاسكويلەر جابىرلەنۋشىلەردى ولاردىڭ اتىنا بۇرىن جالعان وپەراتورلار راسىمدەگەن نەسيەلەردى وشىرەمىز دەپ الداپ, وزدەرىنە نەسيە العان. بارلىق جاعدايدا جابىرلەنۋشىلەردى قاراجاتتى الاياقتار كورسەتكەن «قاۋىپسىز» شوتتارعا اۋدارۋعا مىندەتتەگەن.
2024 جىلدىڭ شىلدە ايىندا الاياقتار اقتوبە قالاسىنىڭ تۇرعىنىن ءدال وسىنداي جولمەن 8 ميلليون تەڭگەگە, ەكىنشى ادام دا وسىندايعا سەنىپ, 3 ميلليون تەڭگەسىن جوعالتقان. سونىمەن قاتار تاعى ءبىر تۇرعىن ءوز اتىنا 5 ميلليون تەڭگەگە جۋىق نەسيە راسىمدەپ, الاياقتارعا اۋدارعان.
اقتوبە وبلىسىنىڭ پوليتسيا دەپارتامەنتى ازاماتتاردى مۇنداي قوڭىراۋلارعا سەنبەۋگە, قوڭىراۋ تۇسكەن جاعدايدا دەرەۋ ۇزۋگە, SMS جانە جەكە دەرەكتەردەگى كودتاردى جاريالاماۋعا جانە بەيتانىس ادامدارعا اقشا اۋدارماۋعا شاقىرادى.
