اتالعان سەرىكتەستىك – وڭىردە بەكىرە تۇقىمدى باعالى بالىق ءوسىرىپ جاتقان بىردەن-ءبىر كاسىپورىن. بالىق فەرماسى تولىق وندىرىستىك قۋاتىنا كوشسە, جىلىنا 10 توننا ءتىرى بەكىرە, 10 توننا وڭدەلگەن بالىق ەتىن وندىرە الادى.
ءوڭىر تۇرعىندارىنا تاڭسىق ءونىمدى جەرگىلىكتى جەردە ءوندىرىپ جاتقان بىرەگەي كاسىپورىن مەملەكەتتىڭ بيزنەستى قولداۋ باعدارلامالارىن دا ءتيىمدى پايدالانا بىلگەن. مەملەكەت اتالعان جوباعا يندۋستريالاندىرۋ كارتاسى اياسىندا توبىل قالاسىنان اۋقىمى 1,1 گەكتار بولاتىن جەر تەلىمىن ءبولىپ بەرىپ وتىر. مۇنىڭ سىرتىندا, سەرىكتەستىك «كاسىپكەرلىكتى دامىتۋدىڭ 2021–2025 جىلدارعا ارنالعان ۇلتتىق جوباسى» شەڭبەرىندە «دامۋ» قورىنىڭ قولداۋىنا ىلىگىپ, «Bereke Bank» اق ارقىلى 100 ملن تەڭگە جەڭىلدەتىلگەن نەسيە الدى. قوماقتى قارجىعا وندىرىسكە قاجەت قۇرىلعىلار مەن شاباق ساتىپ الىندى.
سەرىكتەستىك باسشىسى ۆالەنتين يششەنكونىڭ ايتۋىنشا, جوبا ءۇش كەزەڭگە ءبولىنىپ جۇزەگە اسىرىلىپ جاتىر. العاشقى كەزەڭ ىشىندە, 2023 جىلى بالىق فەرماسىنىڭ عيماراتى سالىنعان. 2024 جىلدىڭ باستاپقى ايلارىنان باستاپ ۋىلدىرىق ساتىپ الىنىپ, بەكىرە تۇقىمدى بالىق وسىرىلە باستاعان. كاسىپورىن قازان ايىندا ارنايى دۇكەنىن اشىپ, بالىق ونىمدەرىن ساۋداعا شىعارۋدى جوسپارلاپ وتىر.
«فەرمانىڭ عيماراتىن كوتەرۋ, رەزەرۆۋارلاردى ورناتۋ جۇمىستارى اياقتالدى. ينجەنەرلىك ينفراقۇرىلىمنىڭ جەتپەي قالعان جەرىنە, اتاپ ايتقاندا, فەرما نىساندارىن ەلەكتر قۋاتىمەن قامتاماسىز ەتۋگە «كاسىپكەرلىكتى دامىتۋدىڭ ۇلتتىق جوباسى» اياسىندا وبلىستىق بيۋدجەتتەن تاعى 91,7 ملن تەڭگە قارجى ءبولىندى. قۇرىلىس-مونتاجداۋ جۇمىستارىنىڭ ءبارى كەستەگە سايكەس دەر ۋاقىتىندا ورىندالدى. قازىر بالىق وڭدەۋ ءوندىرىسىن ىسكە قوسۋ جۇمىستارىمەن اينالىسىپ جاتىرمىز. ءوزىمىز وسىرگەن بالىقتى وڭدەيتىن قۇرىلعىنى دا ساتىپ الىپ, ورناتىپ قويدىق. سونداي-اق ءونىم ساقتايتىن توڭازىتقىشتارىمىز بەن دايىن ءونىمدى ساتۋعا شىعاراتىن قۇرىلعىلارىمىز دا دايىن تۇر», دەيدى كاسىپورىن باسشىسى.
بۇگىندە بالىق فەرماسىنداعى 7 باسسەيندە استراحاننان اكەلىنگەن ۋىلدىرىقتان تاراعان 5 مىڭعا جۋىق بەكىرە تۇقىمى بار. ال شاباق تسەحىندا 20 مىڭنان استام بەكىرە شاباعى مەن ارالاس تۇقىمدى شاباقتار ءوسىپ جاتىر. كاسىپورىندا 6 ادام ەڭبەك ەتەدى. الداعى كۇزدە بالىق وڭدەۋ تسەحى مەن فەرمانىڭ ارنايى دۇكەنى اشىلعان سوڭ, جۇمىسشى سانى دا ارتا تۇسپەك.
كاسىپورىن كەلەشەكتە بەكىرە وسىرۋمەن عانا شەكتەلمەي, نارىقتا جوعارى سۇرانىسقا يە, باعاسى قىمبات فورەل, اقسەركە سىندى تاڭسىق بالىقتاردى دا ءوسىرۋدى جوسپارلاپ وتىر. وسىلايشا, وبلىس كولەمىندەگى باعالى بالىق ونىمدەرىنىڭ ءتۇرىن كوبەيتۋدى كوزدەيدى.
«سونىمەن قاتار اۋەسقوي بالىقشىلار كەلىپ بالىق اۋلايتىن ارنايى سۋ قويماسىن اشۋدى ويلاستىرىپ جاتىرمىز. قوستاناي اۋدانى اكىمدىگى فەرمانىڭ ىرگەسىنەن قوسىمشا تاعى 0,4 گەكتار جەر تەلىمىن بەرۋگە دايىن وتىر», دەيدى كاسىپكەر.
تاياۋدا وبلىس اكىمدىگىندە ءوڭىر ەكونوميكاسىن ءارتاراپتاندىرۋ جونىندە قاداۋ-قاداۋ ماسەلەلەردى ورتاعا سالعان القالى كەڭەس ءوتتى. وسى جيىندا ايماق باسشىسى قۇمار اقساقالوۆ ءبىز ءسوز ەتىپ وتىرعان فەرمانى دا تىلگە تيەك ەتىپ, وزگە كاسىپكەرلەرگە ۇلگى قىلا سويلەدى.
«بۇگىندە مەملەكەت تاراپىنان تاماق ونەركاسىبىن دامىتۋ ماسەلەسىنە ەرەكشە كوڭىل ءبولىنىپ وتىرعانى تەگىن ەمەس. بىزدە ازىق-ت ۇلىك ءوندىرىسىن دامىتۋ ءۇشىن اۋىل شارۋاشىلىعى شيكىزاتى مەن باسقا دا قوسالقى كومپونەنتتەر جەتكىلىكتى. كاسىپكەرلەر ەكونوميكانىڭ كوپ يگەرىلە قويماعان باعىتتارىندا بەلسەندىلىك تانىتۋ قاجەت. ۆالەنتين سياقتى كاسىپكەرلەردەن ۇلگى العان ءجون. مەملەكەت ءبىرىنشى كەزەكتە ىشكى نارىقتى وتاندىق ونىممەن قامتاماسىز ەتۋگە كۇش سالاتىن بولادى», دەدى اكىم.
«قوستاناي بەكىرەسى» سەرىكتەستىگى ءوڭىر تۇرعىندارىن باعالى بالىقپەن قامتاماسىز ەتىپ قانا قويماي, شەتەلدەن اكەلىنىپ جاتقان تەڭىز بالىعى ونىمدەرىنە دە باسەكەلەس بولا الادى.
قوستاناي وبلىسى
