تەڭىز جاعالاۋىنا جينالعاندار قازاقستان مەن ازەربايجان اسكەري كەمەلەرىنىڭ تەڭىزدەگى ساپىن باقىلاي الدى. كەمە پالۋبالارىندا ەكيپاجداردىڭ جەكە قۇرامى سالتاناتتى ساپ تۇزەدى.
ال امفيتەاتر الاڭىندا جاتتىعۋعا قاتىسۋشى بەس ەل قارۋلى كۇشتەرىنىڭ وزگە دە بولىمشەلەرى تاپسىرمانى ورىنداۋعا ساقاداي ساي تۇر. قازاقستان, ازەربايجان, قىرعىز رەسپۋبليكاسى, تاجىكستان جانە وزبەكستاننىڭ گيمندەرى كەزەكپەن ورىندالىپ, مەملەكەتتىك تۋلارى كوتەرىلدى. قورعانىس مينيسترلىگى تاراتقان رەسمي مالىمدەمەدە كور- سەتىلگەندەي, وقۋ-جاتتىعۋ ەلىمىزدىڭ ويماشا جوتالارى مەن توقماق ماڭىنداعى تەڭىز ايماعىندا وتەدى. وقۋ-جاتتىعۋدىڭ ستسەناريىنە سايكەس اسكەري بولىمشەلەرگە ايماقتا بولادى دەپ بولجانعان قارۋلى قاقتىعىستى باقىلاۋعا الۋ جۇكتەلەدى.
4 000 اسكەري قىزمەتكەر مەن 700 قارۋ-جاراق پەن اسكەري تەحنيكا قولدانىلاتىن وقۋ-جاتتىعۋدا قۇرلىق جانە اۋە بارلاۋ توپتارى, ارميا جانە مايداندىق اۆياتسيا بولىمشەلەرى, تەڭىز كۇشتەرىنىڭ ارنايى جاساقتارى, ارتيللەريا جانە تانك بولىمشەلەرى جاتتىعۋ جۇرگىزەدى. ءىس-شارا اياسىندا اسكەري سپورتتىق جارىس, «باعدار» تاكتيكالىق بارلاۋ جانە وق اتۋ جارىستارىن وتكىزۋ جوسپارلانعان.
قورعانىس مينيسترلىگى باسشىلىعىنىڭ اتىنان قاتىسۋشىلاردى ەلىمىزدىڭ قورعانىس ءمينيسترىنىڭ ءبىرىنشى ورىنباسارى, قارۋلى كۇشتەرى باس شتابىنىڭ باستىعى, گەنەرال-لەيتەنانت سۇلتان كامالەتدينوۆ قۇتتىقتاپ, «بىرلەستىك-2024» وقۋ-جاتتىعۋى جاۋىنگەرلەردىڭ بويىنداعى رۋحتى وياتىپ, ايبىندارىن اسقاقتاتۋدىڭ تاعى ءبىر مۇمكىندىگى ەكەنىن اتاپ ءوتتى. سونداي-اق ءتۇبى ءبىر تۋىس حالىقتار اراسىنداعى دوستىقتىڭ جالاۋىن جەلبىرەتەرىنە سەنىم ءبىلدىردى. ەلدەرىمىز اراسىنداعى ءبىر-بىرىنە دەگەن سەنىمگە نەگىزدەلگەن تىعىز ءارى دوستىق قارىم-قاتىناستارعا وسىنداي بىرلەسكەن ءىس-شارالاردىڭ بەرەرى مول ەكەنىن ايتا كەلىپ:
– ورتالىق ازيا ءوڭىرىنىڭ ءتورت ەلى مەن ازەربايجان رەسپۋبليكاسى قارۋلى كۇشتەرىنىڭ اسكەري كونتينگەنتتەرىن تارتا وتىرىپ, مۇنداي وقۋ-جاتتىعۋ وتكىزۋ فورماتى العاش رەت قولدانىلىپ وتىر. بۇل مەملەكەتتەرىمىزدىڭ تاتۋ كورشىلىك قاتىناستاردى ودان ءارى كەڭەيتۋگە جانە نىعايتۋعا, ونىڭ ىشىندە قاۋىپسىزدىك پەن تۇراقتىلىقتى قامتاماسىز ەتۋ دەگەن ۇمتىلىسىن ايعاقتايدى, – دەدى.
سونىمەن بىرگە گەنەرال-لەيتەنانت س.كامالەتدينوۆ وقۋ-جاتتىعۋ اسكەرلەردىڭ اسكەري باسقارۋ ورگاندارىنىڭ ۇيلەسىمدىلىك دەڭگەيىن ارتتىراتىنىن, زاڭسىز قارۋلى قۇرالىمداردى جويۋعا ارنالعان وقۋ-جاۋىنگەرلىك مىندەتتەردى ورىنداۋ كەزىندە قارۋلى كۇرەستى جۇرگىزۋ تاسىلدەرىن سىناقتان وتكىزۋگە مۇمكىندىك بەرەتىنىنە توقتالىپ:
– سىزدەرگە وقۋ-جاتتىعۋدا تابىسقا جەتۋ ءۇشىن بارىنشا ءتيىمدى ءوزارا ءىس-قيمىل تىلەيمىن. وسىنداي ءىس-شارالاردا قاۋىپسىزدىكتى قامتاماسىز ەتۋدەگى ورتاق كۇش-جىگەردە پايدالى بولاتىن قۇندى تاجىريبە مەن ءبىلىم الا الاسىزدار, – دەپ ءسوزىن تۇيىندەدى.
وقۋ-جاتتىعۋعا قاتىسۋشى ەلدەر اسكەري قىزمەتشىلەرىنىڭ سالتاناتتى شەرۋىمەن جانە قازاقستاننىڭ قارۋلى كۇشتەرى ۇلتتىق اسكەري-پاتريوتتىق ورتالىعىنىڭ شىعارماشىلىق ۇجىمى دايىنداعان كونتسەرتتىك باعدارلامانى تاماشالاۋمەن اياقتالدى.
