پودستەپنىي اۋىلدىق وكرۋگىنىڭ يۋبيلەينىي اۋىلىندا اشىلعان جاڭا زاۋىتتىڭ تۇساۋكەسەرىنە وبلىس اكىمى ناريمان تورەعاليەۆ باردى. اۋىل اۋماعىنان سۋ كوزىن ساراپتامادان وتكىزگەن وتاندىق جانە رەسەيلىك عىلىمي زەرتتەۋ ينستيتۋتتارى بۇل سۋدىڭ ەمدىك قاسيەتى ەرەكشە ەكەنىن بايقاپتى. مىسالى, ەرەسەك ادامنىڭ ورتاشا تاۋلىكتىك قاجەتتىلىگى 200-300 مكگ/دم3 دەسەك, ەمدىك-اسحانالىق سۋدىڭ ءبىر قۇتىسىندا 60-100 مكگ/دم3 يود بار ەكەن. بۇل سۋدىڭ دەنساۋلىققا وتە پايدالى ەكەنىن كورسەتەدى.
«بۇل – مەملەكەت باسشىسىنىڭ تاپسىرماسىنا سايكەس جۇزەگە اسىپ جاتقان جوبالاردىڭ ءبىرى. وڭىرگە ينۆەستيتسيا تارتۋ, كاسىپ اۋقىمىن كەڭەيتىپ, ەلدىڭ سۇرانىسىنا ساي قىزمەت كورسەتۋ كۇن تارتىبىنەن تۇسپەيدى. وبلىس كولەمىندە كەلەلى جوبالار قۇلاشىن كەڭگە جايدى. وتكەن جىلدىڭ قورىتىندىسىنا سۇيەنسەك, ينۆەستيتسيا اكەلۋ جوسپارىن 16 پايىزعا ارتىق ورىندادىق. ال بيىل 118 ملرد تەڭگەگە 26 جوبانى ىسكە قوسقالى وتىرمىز. مىنە, سونىڭ ىشىندە «Sartay» مينەرالدى تازا سۋىمىز – ءتورتىنشى جوبا», دەدى ءوڭىر باسشىسى ناريمان تورەعالي ۇلى.
وبلىس اكىمىنىڭ ايتۋىنشا, وسى جىلدىڭ سوڭىنا دەيىن وڭىرگە 700 ملرد تەڭگەگە جۋىق ينۆەستيتسيا تارتىلادى ەكەن. ارينە, وسى ارقىلى جاڭا جۇمىس ورىندارى اشىلىپ, تابىس مولايا تۇسپەك.
«Batysminiralsu» زاۋىتىندا 60 ادام جۇمىس ىستەيدى. قۇرىلىس كەزىندە 30 ادام جۇمىسقا تارتىلعان. وسىلايشا, قازىردىڭ وزىندە الاقانداي اۋىلداعى ءبىر عانا زاۋىت 90 ادامدى جۇمىسپەن قامتىعان.
زاۋىتتىڭ اشىلۋ سالتاناتىنا تەرەكتى اۋدانىنىڭ اكىمى ءاليا مۇحانبەتجانوۆا, وسى جوبانى قارجىلاندىرۋعا اتسالىسقان «ForteBank» وكىلدەرى قاتىسىپ, ساتتىلىك تىلەدى. جاڭا كاسىپورىننىڭ ەسىگىنە كەرىلگەن باۋدى وبلىس اكىمى ناريمان تورەعاليەۆ پەن زاۋىتتىڭ باس ديرەكتورى الىشەر وڭتالاپ ۇلى قيدى.
قۇنى 1,5 ملرد تەڭگەنى قۇرايتىن جوبا ءونىمىنىڭ اتاۋى بەلگىلى بي جانە باتىر سارتاي بايجان ۇلىنىڭ ەسىمىنە بايلانىستى قويىلعان ەكەن. 1711-1785 جىلدارى ءومىر سۇرگەن, 15 جاسىندا قول باستاپ, جاۋعا تويتارىس بەرگەن تاريحي تۇلعا جونىندە رەجيسسەر اقان ساتاەۆ «جاۋجۇرەك مىڭ بالا» اتتى فيلم دە تۇسىرگەن بولاتىن. ايتپاقشى, سارتاي باتىردىڭ اشامايى باتىس قازاقستان وبلىستىق تاريحي-ولكەتانۋ مۋزەيىندە ساقتاۋلى تۇر.
باتىس قازاقستان وبلىسى
