قارعالى وزەنىنە تاياۋ, تابيعاتى تاماشا جەردە «Campit» لاگەرى ورنالاسقان. تال-تەرەكتەرمەن كومكەرىلگەن, اۋلاسى اعاش, گۇلدەرگە تولى دەمالىس ورنىندا باسكەتبول, ۆولەيبول, بي الاڭدارى جاساقتالعان. شاحمات, توعىزقۇمالاق, دويبى ۇستەلدەرى, اعاشتان قيىپ جاسالعان ءساندى ورىندىعى بار جازعى كۇركەلەر ورنالاسقان. ۇقىپتى وتىرعىزىلعان جانە ادەمىلەپ قىرقىلعان اعاش-بۇتالاردان, گۇلدەردەن باعباننىڭ شەبەر قولى بىلىنەدى. لاگەر ورتاسىندا اسحاناسى, تۇكپىردە بىرنەشە جاتىن كورپۋسى ورنالاسقان. ءبىز بارعانىمىزدا بي الاڭىندا ەكىنشى ماۋسىمنىڭ جابىلۋ سالتاناتى ءوتىپ جاتتى. لاگەردە بي, قولونەر, سۋرەت, فۋتبول, سپورتتىق تۋريزم, روبوتتەحنيكا ۇيىرمەلەرى, اعىلشىن ءتىلىن ۇيرەتۋ كۋرسى اشىلعان. كۇندە كەشكىلىك بي كەشى وتەدى, بالالار اتكەنشەكتەرى بار ارقان ساياباعىندا ويناعاندى جاقسى كورەدى.
ء«ار ماۋسىمدا 300 بالادان قابىلدايمىز. بيىلعى جازدا 2 100 بالانىڭ دەمالىسىن ۇيىمداستىرۋدى جوسپارلادىق. ءبىر بالانىڭ دەمالىس ۇزاقتىعى – 10 كۇن. وسى ايدا «قازاقستان حالقىنا» قورىنىڭ جولداماسىمەن ويىل, شالقار, حرومتاۋ, قوبدا اۋداندارىنان كەلگەن 382 بالا تىنىعىپ, جاقسى كوڭىل كۇيمەن اتتاندى. مەن جاز بويى لاگەردە بولامىن. ديەتولوگ مامانىمىز اس ءمازىرىن, كۇندەلىكتى كەلەتىن ايران-ءسۇت, جەمىس-جيدەك ساپاسىن قاداعالاپ وتىرادى», دەيدى «Campit» جەكەمەنشىك لاگەرىنىڭ ديرەكتورى ايبولات تاشپەنتاەۆ.
شالقار اۋدانى گسك-12 بەكەتىنەن كەلگەن باتىرحان ءجۇزباي وسى جەردە دەمالىس جاقسى ءوتىپ جاتقانىنا ريزا. 5-سىنىپتى اياقتاعان وقۋشى بۇل جەردەن كوپ دوس تاپقان. حرومتاۋ اۋدانى نيكەلتاۋ اۋىلىنان كەلگەن ءاليجان تولەەۆ تا وزىنە ۇيىرمەلەردەن كوپ نارسە ۇيرەنگەنىن ايتادى. بالالارعا لاگەر اۆتوبۋسىمەن اقتوبەدەگى پلانەتاري ۇيىنە بارىپ, جۇلدىزداردى تاماشالاۋ ءساتى قاتتى ۇناعان. ولار كەلەسى جىلى تاعى كەلەمىز دەپ قۇلشىنىپ وتىر.
ەكىنشى ايالداعان جەرىمىز – «شۇعىلا» جەكەمەنشىك لاگەرى. قارعالى وزەنىنە تاياۋ ورنالاسقان دەمالىس ورنىنىڭ تىنىشتىعىن بالالاردىڭ كۇلكىسى مەن داۋىستارى بۇزىپ تۇر. بيىل التى ماۋسىمعا 2 100 بالا كەلەدى دەپ جوسپارلانعان. ءار ماۋسىمدا 300 بالا ساۋىقتىرىلادى. دەمالىس ورنىن «ارلان-سەكيۋريتي» مەكەمەسىنىڭ قىزمەتكەرلەرى كۇنى-ءتۇنى كۇزەتەدى. لاگەر قىزمەتكەرلەرى تاڭعى ساعات 5.00-دەن جۇمىسقا كىرىسىپ, تۇنگى ساعات 12.00-گە دەيىن بالالار ۇيىقتاعانشا تازالىققا جاۋاپتى. تاڭعى جانە تۇسكى دەمالىستان سوڭ بالالار شىعارماشىلىق سايىستار مەن سپورتتىق شارالارعا قاتىسادى. لاگەردىڭ ءوز باسسەينى بار. بۇل جەردە ءار كۇن ءبىر-بىرىنە ۇقسامايدى. دەمالۋشىلار التى توپقا بولىنگەن. ءار توپتا ەكى جەتەكشى, ءبىر تاربيەشى ۇنەمى بالالارمەن بىرگە. ولار – قالاداعى مەكتەپ مۇعالىمدەرى مەن كوللەدج وقىتۋشىلارى.
«ۇستازدىق تاجىريبەسى مول, بالالارمەن جاقسى ءتىل تابىسا الاتىن پەداگوگ ماماندارعا جازعى جۇمىستى ۇسىندىق. ولار جىلدا جاز ماۋسىمىندا بىزدە جۇمىس ىستەيدى. «شۇعىلاعا» جىلدا كەلىپ دەمالاتىن بالالار ولاردى جاقسى تانيدى. بالالار التى رەت تاماقتانادى. تاماق ساپاسى سانيتارلىق تالاپتارعا ساي. كوپبالالى جانە اتاۋلى الەۋمەتتىك كومەك الاتىن وتباسىلاردىڭ بالالارى ءبىلىم باسقارماسىنىڭ تەگىن جولداماسىمەن كەلەدى. لاگەردىڭ ءوز مەدبيكەسى بولسا دا, مەديتسينالىق ورتالىقپەن كەلىسىمشارتقا وتىردىق. بالا ءوزىن جايسىز سەزىنسە, بىلىكتى ماماندار كەلىپ قارايدى. ازىرشە سىرتتان مەديتسينالىق كومەككە قاجەتتىلىك بولعان جوق. دەمالىس اياقتالىپ, بالالار ۇيلەرىنە قايتار ساتتە ءبىر-بىرىمەن قيماي قوشتاسادى», دەيدى «شۇعىلا» لاگەرىنىڭ ديرەكتورى مەرەكە بايدراحمان ۇلى.
پويىزبەن جەتكەندەردى لاگەر قىزمەتكەرلەرى لاگەر اۆتوبۋسىمەن كۇتىپ السا, قالا بالالارىن اتا-انالارى جەتكىزەدى. ء«بىزدىڭ لاگەرگە جولداما قۇنى – 95 مىڭ تەڭگە تۇرادى. ونى كوبىنەسە ءىرى وندىرىستىك مەكەمەلەردىڭ كاسىپوداق ۇيىمدارى قىزمەتكەرلەرىنىڭ بالالارىنا ساتىپ الادى. اتا-انالار ءوز قارجىسىنا اقتوبە قالاسىنداعى ابىلقايىر حان, 1 مەكەنجايىنداعى كەڭسەمىزدەن ساتىپ الا الادى. سايتىمىز بەن ينستاگرام پاراقشامىزدا جولداما مامىر ايىنان باستاپ ساتىلاتىنى كورسەتىلەدى. بۇگىندە التى ماۋسىمعا دا ورىن قالمادى. اتا-انالار حابارلاسىپ, قوسىمشا ورىن اشساڭىز دەپ ءوتىنىش ايتادى. ماۋسىم ايىندا العا, ىرعىز اۋداندارى مەن اتىراۋ, باتىس قازاقستان وبلىستارىنىڭ وقۋشىلارى دەمالدى. ماۋسىمدىق تاربيەشى, جەتەكشىلەردەن باسقا, لاگەر شتاتىندا تۇراقتى 40 ادام جۇمىس ىستەيدى. ولاردىڭ قاتارىندا باعبان, كىشى تەحنيكالىق قىزمەتكەر, اۋلا سىپىرۋشى, اسپاز, كۇزەتشىلەر بار», دەيدى م.بايدراحمان ۇلى.
قىركۇيەك تۋىپ, بالالار مەكتەپكە ورالعان سوڭ لاگەر اۋلاسى بوساپ قالادى. وسى كەزدە تابيعات اياسىندا وتباسىمەن ءبىر-ەكى كۇنگە دەمالىپ كەتۋشىلەر سيرەكتەۋ بولسا دا تابىلادى. قىستا لاگەردىڭ سپورت الاڭقايى مۇز ايدىنى مەن سىرعاناققا اينالادى. ساۋىردەگى سۋ تاسقىنىندا لاگەر كورپۋستارى دا ءب ۇلىندى. ىرگەدەگى قارعالى وزەنى تاسىپ, لاگەر كورپۋسىنىڭ ورتان بەلىنە دەيىن سۋ باسىپ, بۇكىل جيھاز, توسەك-ورىندى شايىپ كەتتى. جەر كەپكەن سوڭ بارلىق مۇلكى جاڭارتىلعان.
ەندىگى باعىتىمىز – قالاداعى د. قوناەۆ اتىنداعى مەكتەپ-گيمنازياسى. وسى وقۋ ورنىندا التى ماۋسىمعا ەسەپتەلگەن مەكتەپىشىلىك لاگەر ۇيىمداستىرىلعان. ءبىر ماۋسىمداعى دەمالىس ۇزاقتىعى – ون ەكى كۇنگە ەسەپتەلگەن. «1-سىنىپتان 7-سىنىپقا دەيىنگى بالالاردى قابىلدايمىز. ولار ەرتەڭگىلىك ساعات 8.00-دە كەلىپ, 17.00-دە ۇيلەرىنە قايتادى. اقىلى تۇردە دەمالاتىن وقۋشىلارىمىز دا بار. ون ەكى كۇنگە جولداما قۇنى – 29 مىڭ 256 تەڭگە تۇرادى. مەكتەپىشىلىك لاگەردە ءبىر بالا 12 كۇن وتكىزەدى. قازىر لاگەردىڭ ەكىنشى ماۋسىمىنا جازىلعان بالالار بار. وسى ماۋسىمدا اتاۋلى الەۋمەتتىك كومەك الاتىن وتباسىلاردىڭ 144 بالاسى تەگىن تىنىقسا, 66 بالا اقىلى تۇردە دەمالىپ جاتىر. ءتورت رەت تاماقتانادى. بىزدە ءار كۇن قىزىقتى وتەدى. مۇراجاي, جاس ناتۋراليستەر بەكەتى, «الاقاي» قۋىرشاق تەاترى, «Kinder Land», باسسەين, اكۆاپاركقا مەكتەپتىڭ اۆتوبۋسىمەن اپارامىز. جۇمىستاعى اتا-انا دا كەشكى بەسكە دەيىن الاڭدامايدى. قازىر مەكتەبىمىزدىڭ 39 قىزمەتكەرى لاگەردە جۇمىس ىستەيدى. مۇعالىمدەر تاربيەشى بولىپ ءجۇر. كىشى تەحنيكالىق قىزمەتكەرلەر اسپازدارىمىزدى جۇمىسقا قابىلدادىق. جاس ۇستازدار جازدىق لاگەردە جۇمىس ىستەپ, تاجىريبە جينايدى. قىركۇيەكتە ساباق باستالعاندا ۇزدىك شىققان ءۇش ۇزدىك تاربيەشىگە ارنايى سىياقى بەرىلەدى», دەيدى اتالعان مەكتەپ-گيمنازيا ديرەكتورىنىڭ وقۋ-ءىسى جونىندەگى ورىنباسارى, لاگەر ديرەكتورى گۇلناز قادىروۆا. د.قوناەۆ اتىنداعى مەكتەپ-گيمنازيا اينالاسى تاپ-تۇيناقتاي, مەكتەپ شارباعىنا ءارتۇرلى گۇلدەر مەن قاراعاي, شىرشا اعاشتارى ءار بەرىپ تۇر. ۇجىمنىڭ ۇستازدارى مەكتەپتىڭ اينالاسىن ءوز قولدارىمەن اسەمدەگەن. ءبىر ەرەكشەلىگى, وسى ءبىلىم وشاعىندا جاس ەر مۇعالىمدەر كوپ ەكەن. ولار مەكتەپ تازالىعىنا, كوگالداندىرۋعا ەرەكشە ءمان بەرىپ, ءبارىن ءوز قولدارىمەن جاساعان.
وبلىستىق ءبىلىم باسقارماسى قوسىمشا ءبىلىم بەرۋ جانە تاربيە جۇمىستارى ءبولىمىنىڭ باس مامانى اياجان تاجەباەۆانىڭ ايتۋىنشا, «كۇنشۋاق», «اسەم» دەمالىس ورىندارى جىل بويى, «Campit» «شۇعىلا», «مۇنايشى», «مۇعالجار», ء«اليا» لاگەرلەرى جاز مەزگىلىندە عانا جۇمىس ىستەيدى. ازىرشە ماۋسىمدىق ءۇش لاگەردىڭ سانيتارلىق-ەپيدەميالىق رۇقساتى بار. «نەگىزىنەن ەرەكشە بالالاردى ساۋىقتىرۋعا ارنالعان «كۇنشۋاق» لاگەرى جاز كەزىندە الەۋمەتتىك وسال توپتاعى وتباسىلاردىڭ بالالارىن دا ساۋىقتىرادى. حرومتاۋ اۋدانىندا ورنالاسقان «مۇعالجار» لاگەرى ءدوڭ كەن بايىتۋ كومبيناتى, «قازحروم» تۇك» جۇمىسكەرلەرىنىڭ بالالارىن قابىلدايدى. وزدەرىڭىز كورىپ وتىرعانداي, «اسەم», كۇنشۋاق», «شۇعىلا», «كامپيت», «مۇعالجار» لاگەرلەرى جۇمىسىن باستاپ كەتتى. سونداي-اق «قازاقستان حالقىنا» قورىنىڭ «جازدىق جولداما» الەۋمەتتىك جوباسى اياسىندا وڭىرىمىزدەگى 1 147 اۋىل بالاسىن ساۋىقتىرۋ جوسپارلاندى. جازدىڭ العاشقى ايىندا العا اۋدانىنان – 103, ايتەكە بيدەن – 108, بايعانين اۋدانىنان – 120, ىرعىز اۋدانىنان – 78, قارعالىدان – 60, قوبدادان – 65, مارتوكتەن – 133, مۇعالجاردان – 75, ويىلدان – 84, تەمىر اۋدانىنان – 175, حرومتاۋدان – 76, شالقار اۋدانىنان 70 مەكتەپ وقۋشىسى قوردىڭ قارجىلاي قولداۋىمەن لاگەردە تىنىعىپ قايتتى», دەيدى اياجان تاجەباەۆا .
تاياۋ كۇندەرى قوبدا اۋدانىنىڭ ەگىندىبۇلاق اۋىلىندا جاڭادان سالىنعان ء«اليا» لاگەرى دە بالالارعا ەسىگىن اشادى.
اقتوبە وبلىسى
