مەملەكەت باسشىسى قاسىم-جومارت توقاەۆ «ادال ادام – ادال ەڭبەك – ادال تابىس» اتتى ۇلتتىق قۇرىلتايدىڭ ءۇشىنشى وتىرىسىندا «...اۋىل جانە اۋدان ورتالىعىنىڭ تۇرعىندارىنا ارنالعان جاڭا تۇرعىن ءۇي باعدارلاماسىن قولعا الۋ كەرەك. بۇل رەتتە الەۋمەتتىك تۇرعىدا وسال توپتاعى جاندار ءۇشىن نەسيە ءوسىمى 7 پايىزدان اسپاۋى قاجەت. سونىمەن قاتار ساتىپ الۋ قۇقىعىمەن جالعا بەرىلەتىن باسپانا سانىن بىرنەشە ەسە كوبەيتۋدى ۇكىمەتكە تاپسىرامىن», دەگەن بولاتىن.
«اۋدان ورتالىعىندا قوس بىردەي باسپانانىڭ بەرىلۋى – مەملەكەتتىك باعدارلاما جۇزەگە اسىپ جاتقانىنىڭ ايقىن كورىنىسى. قازىرگى تاڭدا حالىقتى تۇرعىن ۇيمەن قامتاماسىز ەتۋ ماسەلەسى وتە وزەكتى. بۇگىن تۇرعىن ءۇي كەزەگىندەگى ەكى وتباسى باسپانامەن قامتىلدى. جاڭا شاڭىراق يەلەرىنە زور دەنساۋلىق, وتباسى جىلۋىن تىلەيمىن», دەدى اۋدان اكىمى.
جاڭا باسپانا ءۇيى اپاتتى دەپ تانىلعان اسىلزادا زۇلقارناەۆاعا جانە 20 جىل ەڭبەك ءوتىلى بار, 2012 جىلدان بەرى تۇرعىن ءۇي كەزەگىندە تۇرعان بيۋدجەتتىك سالا قىزمەتكەرى شالىققانىم بۇيراشەۆاعا بۇيىردى. ايتا كەتەيىك, بۇل ۇيلەر ساتىپ الۋ قۇقىعىمەن جالعا بەرىلىپ وتىر.
قازىرگى تاڭدا قازتالوۆ اۋدانىندا مەملەكەتتىك باعدارلاما اياسىندا 28 اۋىلدا 116 تۇرعىن ءۇيدىڭ قۇرىلىسى ءجۇرىپ جاتىر. قۇرىلىس ساپاسىن اۋدان اكىمى مەن جەرگىلىكتى قوعامداستىق ءجىتى باقىلاۋعا العان.
باتىس قازاقستان وبلىسى
