فوتو: akorda.kz
پرەزيدەنتكە قازىرگى ۋاقىتتا بولجامدى ءومىر ءسۇرۋ ۇزاقتىعىنىڭ كورسەتكىشى 75 جاستان اساتىنى جونىندە ايتىلدى. جىل باسىنان بەرى ينفەكتسيالىق اۋرۋلاردىڭ 21 ءتۇرى بويىنشا, سونىڭ ىشىندە كوروناۆيرۋسپەن سىرقاتتانۋ كورسەتكىشتەرى تومەندەگەن. ۆاكتسيناتسيالاۋ جانە پروفيلاكتيكالىق ءىس-شارالاردى جۇرگىزۋ جۇمىستارى جالعاسىپ جاتىر.
اقمارال ءالنازاروۆا مينيسترلىكتىڭ جۇمىسىنا قاتىستى پرەزيدەنت تاپسىرمالارىنىڭ ورىندالۋى جونىندە ەسەپ بەردى. ونىڭ ايتۋىنشا, مەديتسينالىق قىزمەتتىڭ ساپاسىن جانە قولجەتىمدىلىگىن ارتتىرۋعا باسا نازار اۋدارىلىپ وتىر. العاشقى جانە ستاتسيونارلىق مەديتسينالىق كومەكتى ۇيىمداستىرۋدىڭ تاسىلدەرى قايتا قارالىپ جاتىر. سونداي-اق دياگنوستيكالىق جانە ەمدەۋ ستاندارتتارى جاڭارتىلىپ, سالانىڭ كادرلىق الەۋەتى نىعايىپ كەلەدى.
ءمينيستردىڭ ايتۋىنشا, ءدارى-دارمەك پەن مەديتسينالىق بۇيىمداردى ساتىپ الۋ جۇيەسىنىڭ تيىمدىلىگى مەن اشىقتىعى قامتاماسىز ەتىلۋدە. بۇدان بولەك, مەديتسينالىق مەكەمەلەر جۇمىسىنىڭ تيىمدىلىگىن ارتتىرىپ, مىندەتتى الەۋمەتتىك مەديتسينالىق ساقتاندىرۋعا باقىلاۋدى جاقسارتۋ ءۇشىن زاماناۋي تسيفرلىق تەحنولوگيالار ازىرلەنگەن. ولار قولدانىسقا ەنگىزىلىپ جاتىر.
پرەزيدەنتكە جاڭا مەديتسينالىق نىساندار سالۋ جانە سالا قىزمەتتەرىنىڭ ساپاسىن ودان ءارى ارتتىرۋ ماسەلەلەرى قامتىلعان دەنساۋلىق ساقتاۋ ينفراقۇرىلىمىن دامىتۋدىڭ 2025-2030 جىلدارعا ارنالعان ستراتەگيالىق جوسپارى تۋرالى اقپارات بەرىلدى. قابىلدانعان وسى تۇجىرىمداما اياسىندا دەنساۋلىق ساقتاۋ ۇيىمدارىنىڭ وڭتايلى جانە ءتيىمدى جەلىسىن قۇرۋعا باعىتتالعان 34 نەگىزگى جوبانى ىسكە اسىرۋ جوسپارلانىپ وتىر.
كەزدەسۋ سوڭىندا مەملەكەت باسشىسى انا مەن بالا ءولىمىنىڭ كورسەتكىشتەرىن تومەندەتۋ بويىنشا جۇمىستى جالعاستىرۋ قاجەت ەكەنىن اتاپ ءوتتى. سونىمەن قاتار مەديتسينالىق كومەك كورسەتۋدىڭ مەيىلىنشە ناتيجەلى بولۋىنا نازار اۋدارا وتىرىپ, دەنساۋلىق ساقتاۋ جۇيەسىن ساپالى تۇردە قايتا قۇرۋ كەرەكتىگىنە توقتالدى. سونداي-اق سالاعا, ونىڭ ىشىندە ءدارى-دارمەككە بولىنەتىن قاراجاتتىڭ اشىقتىعى مەن تيىمدىلىگىن قامتاماسىز ەتۋ جونىندە مىندەتتەر جۇكتەدى.
