فوتو: Finclub.net
اتىراۋدا وتكەن ۇلتتىق قۇرىلتايدىڭ ءۇشىنشى وتىرىسىندا مەملەكەت باسشىسى لۋدومانيامەن كۇرەس بويىنشا جۇيەلى جۇمىستى جولعا قويىپ, كەشەندى جوسپار قۇرىپ, ءتيىستى زاڭ قابىلداۋدى جەدەلدەتۋدى تاپسىرعان ەدى.
بيىل ماۋسىم ايىندا پارلامەنت ويىن بيزنەسى, لوتەرەيا جانە لوتەرەيا قىزمەتى ماسەلەلەرى بويىنشا, ونىڭ ىشىندە اكىمشىلىك قۇقىق بۇزۋشىلىق تۋرالى كودەكسكە زاڭنامالىق تۇزەتۋلەر قابىلدادى. زاڭدار 100-دەن استام تۇزەتۋلەردى قامتيدى. دەپۋتات بىرنەشە نورمانى اتادى.
«1. ازاماتتىڭ قۇمار ويىندارعا قاتىسۋىن 1 جاستان 10 جاسقا دەيىن ءوز بەتىنشە شەكتەۋ قۇقىعى بەلگىلەنگەن, تىيىم سالۋدى مەرزىمىنەن بۇرىن توقتاتۋ مۇمكىن ەمەس. 2. بورىشكەرلەردىڭ بىرىڭعاي تىزىلىمىنە ەنگىزىلگەن جەكە تۇلعالار ءۇشىن قۇمار ويىندار مەن ءباس تىگۋگە قاتىسۋعا تىيىم سالۋ بەلگىلەندى (شارا بۋكمەكەرلىك كەڭسەلەردىڭ الەۋەتتى كليەنتتەرىنىڭ سانىن ازايتۋعا باعىتتالعان). 3. جوعارىدا اتالعان تۇلعالاردى قۇمار ويىندار مەن ءباس تىگۋگە تارتقانى جانە جىبەرگەنى ءۇشىن زاڭدى تۇلعالاردىڭ اكىمشىلىك جاۋاپتىلىعى ەنگىزىلەدى. 4. مەملەكەتتىك قىزمەتكەرلەرگە كەز كەلگەن قۇمار ويىنداردا – بۋكمەكەرلىك كەڭسەلەردە, كازينولاردا جانە ونلاين-كازينولاردا شەكتەۋ قويىلادى. دالىرەك ايتقاندا, جالپى سانى 280 مىڭ ادامدى قۇرايتىن اسكەري قىزمەتشىلەر, مەملەكەتتىك ورگانداردىڭ قىزمەتكەرلەرى, بيۋدجەتتىك ۇيىمداردىڭ باسشىلارى قۇمار ويىن ويناي المايدى», دەپ جازدى دەپۋتات.
دەپۋتات اتاپ وتكەندەي, اتالعان زاڭ بۇزىلعان جاعدايدا ءتيىستى شارالار قولدانىلاتىن بولادى.
«ويىن بيزنەسىن ۇيىمداستىرۋشىلار ءۇشىن قۇمار ويىندار مەن ءباس تىگۋگە قاتىسۋ تاۋەكەلدەرى مەن زيانى تۋرالى ەسكەرتۋدى ويىن مەكەمەلەرىندە جانە جەكە ينتەرنەت-رەسۋرستاردا ورنالاستىرۋ مىندەتى ەنگىزىلەدى. ويىن مەكەمەلەرى, بۋكمەكەرلىك كەڭسەلەر مەن توتاليزاتورلار جۇمىسىنىڭ جاڭا ۇلگىلىك ەرەجەلەرى قابىلدانادى. ەرەجەلەردە كازينو كليەنتتەرى مەن بۋكمەكەرلەردىڭ مۇددەلەرىن قورعايتىن نورمالار دا كوزدەلگەن. زاڭدا قۇمار ويىندارعا تاۋەلدى ادامداردى مەديتسينالىق وڭالتۋ ءتارتىبى بەلگىلەنگەن (ويىنشىلاردى ديناميكالىق ەسەپكە قويماي, مەديتسينالىق قۇپيانى ساقتاي وتىرىپ كونسۋلتاتيۆتىك باقىلاۋ). 21 جاسقا تولماعان ادامدارعا ەنەرگەتيكالىق سۋسىنداردى ساتۋعا تىيىم سالىنادى. بايلانىس وپەراتورلارىنا قۇمار ويىندار مەن ءباس تىگۋ جارناماسى بار حابارلامالاردى تاراتۋعا تىيىم سالىنادى. بۋكمەكەر كەڭسەسى ورنالاسقان جەردە, سپورت عيماراتتارىنىڭ ىشىندە جانە سپورتشىلاردىڭ كيىمدەرىندە ورنالاستىرىلعانداردى قوسپاعاندا, عيماراتتاردا, كولىك قۇرالدارىندا بۋكمەكەر كەڭسەلەرى مەن توتاليزاتورلاردى سىرتقى جارنامالاۋعا تىيىم سالىنادى. سپورتتىق تاقىرىپتاعى باق-تاعى جارنامانى قوسپاعاندا, سونداي-اق وتاندىق تەلەارنالار حالىقارالىق سپورت جارىستارىن تىكەلەي ترانسلياتسيالاۋ كەزىندە بۇقارالىق اقپارات قۇرالدارىندا, كينو, بەينە جانە انىقتامالىق قىزمەت كورسەتۋدە بۋكمەكەرلىك كەڭسەلەر مەن توتاليزاتورلاردى جارنامالاۋعا تىيىم سالىنادى. بۋكمەكەر كەڭسەلەرىنىڭ جارناماسى تاراتىلعان جاعدايدا 60 اەك جانە ودان جوعارى ايىپپۇل قاراستىرىلعان. تۋريزم جانە سپورت مينيسترلiگiنiڭ شەتەلدiك بۋكمەكەرلiك كەڭسەلەردiڭ, ليتسەنزياسى جوق توتاليزاتورلاردىڭ جانە ينتەرنەت-كازينولاردىڭ تiزiمiن جۇرگiزۋ جونiندەگi قۇزىرەتi, سونداي-اق بانكتەر مەن تولەم ۇيىمدارىنا ولاردىڭ پايداسىنا قارجىلىق وپەراتسيالار جۇرگiزۋگە تىيىم سالۋ بەلگiلەنەدi. بۇدان باسقا, ەندى ينتەرنەت-كازينو ۇيىمداستىرۋشىلارى ەكى جىلعا دەيىن باس بوستاندىعىنان ايىرۋمەن قىلمىستىق جاۋاپكەرشىلىككە تارتىلادى. ەلەكتروندىق لوتەرەيا بيلەتتەرى ەندى تەك قانا رەسمي ينتەرنەت-رەسۋرس نەمەسە لوتەرەيا وپەراتورىنىڭ موبيلدىك قوسىمشاسى ارقىلى ساتىلادى. وسىلايشا, «Lotomatic» تەرمينالدارى مەن لوتوكلۋبتاردىڭ قىزمەتىنە تىيىم سالىنادى. لوتەرەيا بيلەتتەرىن تۇرعىن ۇيلەردە, جاتاقحانالاردا, ءبىلىم بەرۋ, دەنساۋلىق ساقتاۋ ۇيىمدارىندا, عيبادات ۇيلەرى مەن عيماراتتارىندا, سونداي-اق ءبىلىم بەرۋ جانە دەنساۋلىق ساقتاۋ ۇيىمدارىنان ءجۇز مەتر راديۋستا تاراتۋعا تىيىم سالىنادى. اتالعان شارالار كوشەلەردە لوتەرەيا ونىمدەرىنىڭ ناقتى قاتىسۋىن بىرنەشە ەسە قىسقارتادى. كوشەلەردە تەك كلاسسيكالىق لوتەرەيانى ساتاتىن نۇكتەلەر عانا قالادى», دەپ پىكىر قالدىردى سەنات دەپۋتاتى.
جاننا اسانوۆانىڭ جازۋىنشا, ۇكىمەت ويىن بيزنەسى, لوتەرەيا جانە لوتەرەيا قىزمەتى ماسەلەلەرى جونىندەگى زاڭنىڭ نەگىزگى ەرەجەلەرىمەن تولىق ۇيلەستىرىلگەن 2024-2026 جىلدارعا ارنالعان زاڭسىز ويىن بيزنەسىنە قارسى ءىس-قيمىل جونىندەگى كەشەندى جوسپاردى قابىلدادى.
