فوتو: سەنات
ەسكە سالايىق, مەملەكەت باسشىسى «قر-نىڭ كەيبىر زاڭنامالىق اكتىلەرىنە ويىن بيزنەسى, لوتەرەيا قىزمەتى, دەنساۋلىق ساقتاۋ, مەملەكەتتىك ەڭبەك ينسپەكتسياسى, مەملەكەتتىك باقىلاۋ جانە ارتىق زاڭنامالىق رەگلامەنتتەۋدى بولعىزباۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسىنىڭ زاڭىنا قول قويدى.
سەناتوردىڭ پىكىرىنشە, اتىراۋ قالاسىندا وتكەن ۇلتتىق قۇرىلتايدىڭ ءۇشىنشى وتىرىسىندا پرەزيدەنت تاراپىنان جۇكتەلگەن مىندەت جۇزەگە اسا باستادى. قۇرىلتاي بارىسىندا ەل جاستارى ەرەكشە تاۋەكەل توبىنا جاتاتىنى تۋرالى ماسەلە قوزعالىپ, لۋدومانيا - قوعامدا بەلەڭ العان الەۋمەتتىك ماسەلەلەردىڭ ءبىرى ەكەنى ايتىلعان ەدى.
«بۇل تاۋەلدىلىك وسكەلەڭ ۇرپاققا وراسان زور زيان كەلتىرەدى. وسىعان بايلانىستى قاسىم-جومارت توقاەۆ مەملەكەتتىك ورگاندارعا ازاماتتاردىڭ جەكەلەگەن ساناتتارى ءۇشىن قۇمار ويىندارعا قاتىستى شەكتەۋ قويۋ بويىنشا جۇمىستى كۇشەيتۋدى تاپسىردى. بۇل جۇمىستىڭ ناتيجەسى - ءتيىستى زاڭنامالىق قوسىمشالاردى ازىرلەۋ», دەپ جازدى سەناتور Facebook پاراقشاسىندا.
ەسكە سالايىق, زاڭ ارقىلى حالىقتىڭ ويىنعا تاۋەلدىلىگىن تومەندەتۋگە باعىتتالعان شەكتەۋشى جانە ىنتالاندىرۋشى نورمالار ەنگىزىلەدى. اتاپ ايتقاندا, قۇمار ويىندارعا/باس تىگۋگە قاتىسۋىنا تىيىم سالىناتىن ادامدار ساناتىنىڭ ءتىزىمى كەڭەيتىلدى. ەندى ولاردىڭ قاتارىنا بورىشكەرلەردىڭ بىرىڭعاي تىزىلىمىندە تۇرعان تۇلعالار (اتقارۋشىلىق ءىس جۇرگىزۋ بويىنشا بورىشكەرلەر تۋرالى مالىمەتتەردى قامتيتىن ەلەكتروندىق دەرەكتەر بانكى) قوسىلدى. سونىمەن قاتار سىبايلاس جەمقورلىققا قارسى شەكتەۋ ەنگىزۋ ارقىلى جاۋاپتى مەملەكەتتىك لاۋازىمدى اتقاراتىن, مەملەكەتتىك فۋنكتسيالاردى ورىنداۋعا ۋاكىلەتتىك بەرىلگەن ادامداردىڭ, ولارعا تەڭەستىرىلگەن ادامداردىڭ قۇمار ويىندارعا/باس تىگۋگە قاتىسۋىنا شەكتەۋ قويىلادى.
بۇدان بىلاي مەملەكەتتىك قىزمەتشىلەر, اسكەري قىزمەتشىلەر, ارنايى جانە قۇقىق قورعاۋ ورگاندارىنىڭ قىزمەتكەرلەرى, بيۋدجەتتىك ۇيىمداردىڭ باسشىلارى قۇمار ويىندارعا/باس تىگۋگە قاتىسا المايدى. بۇل شەكتەۋدى ساقتاماعانى ءۇشىن ولاردى جۇمىستان شىعارۋ شاراسى قاراستىرىلعان. ويىن بيزنەسىن ۇيىمداستىرۋشىلاردىڭ قىزمەتىن رەتتەۋ تەتىكتەرى كۇشەيتىلدى. تۋريزم جانە سپورت مينيسترلىگى ويىن مەكەمەسىنىڭ, بۋكمەكەرلىك كەڭسەنىڭ, توتاليزاتوردىڭ, ستاۆكالاردى قابىلداۋ جانە قۇمار ءويىنداردىڭ/باس تىگۋدىڭ بىرىڭعاي ەرەجەلەرىن بەكىتەدى.
سونداي-اق بۋكمەكەرلىك كەڭسەلەر مەن توتاليزاتورلاردىڭ جارنامالارىنا شەكتەۋ قويىلدى. اتاپ ايتقاندا, بۋكمەكەرلىك كەڭسەلەر مەن توتاليزاتورلاردىڭ سىرتقى (كورنەكى) جارناماسىنا, سونداي-اق ولاردىڭ قىزمەتىن كولىك قۇرالدارىندا, بۇقارالىق اقپارات قۇرالدارىندا, كينو-ۆيدەو جانە انىقتامالىق قىزمەت كورسەتۋ ورىندارىندا جارنامالاۋعا تىيىم سالىنادى.
