ورالدا ءتارتىپ ساقشىلارى ايەلدى زورلىقتان قۇتقارىپ قالدى

ورال. 11 ماۋسىم. باتىس قازاقستان وبلىسىنىڭ ورتالىعى – ورال قالاسىندا ۇلتتىق ۇلاننىڭ ساربازدارى ايەلدى زورلىقتان قۇتقارىپ قالدى. بۇل تۋرالى egemen.kz ءتىلشىسى حابارلادى. وقيعا 7 ماۋسىمدا كەشكى مەزگىلدە بولعان. ەفرەيتور جاندار تاسبولاتوۆ پەن قاتارداعى داۋلەت سۇلتان جانە نۇرسۇلتان ميزاموۆتار قىزمەت بارىسىندا №720 باعىت بويىنشا تسيولكوۆسكي كوشەسىندە قوعامدىق ءتارتىپ پەن قاۋىپسىزدىكتى قاداعالاپ جۇرەدى. كەنەت پاترۋلدىك توپ كومەك سۇراپ ايقايلاعان ايەل ادامنىڭ داۋسىن ەستيدى. دەرەۋ داۋىس شىققان جەرگە جەتكەن ءتارتىپ ساقشىلارى بىرنەشە ەركەكتىڭ ءبىر ايەلدى زورلاماق بولىپ, كۇش قولدانىپ جاتقاندارىنىڭ ۇستىنەن تۇسەدى. شيراقتىق تانىتقان ساربازدار ايەلدى ارام ويلىلاردىڭ قولىنان قۇتقارىپ قالدى. تەرگەۋ بارىسىندا زورلاماق بولعانداردىڭ ماس ەكەنى انىقتالدى. ۇستالعاندار ورال قالالىق ىشكى ىستەر بولىمىنە جەتكىزىلدى. ال ءوز كاسىپتەرىندە قىراعىلىق پەن شەبەرلىك تانىتقان پاترۋلدىك توپ باسشىلىق تاراپىنان ماراپاتقا يە  بولدى. تەمىر قۇسايىن. دەرەك: egemen.kz. سۋرەت: zhaikpress.kz.