فوتو: opennews.kz
زاڭ پرەزيدەنت قاسىم-جومارت توقاەۆتىڭ ادام ساۋداسىنا قارسى كۇرەسۋ, سونداي-اق ۆانداليزم مەن قوعامدىق ءتارتىپتى بۇزعانى ءۇشىن جاۋاپكەرشىلىكتى كۇشەيتۋ جونىندەگى تاپسىرماسىن جۇزەگە اسىرۋعا باعىتتالعان.
اتاپ ايتقاندا, قىلمىستىق كودەكسكە «ادام ساۋداسىنا بايلانىستى قىلمىستار» دەگەن جاڭا ۇعىم ەنگىزىلدى. ول ادام ۇرلاۋ, ادامدى زاڭسىز باس بوستاندىعىنان ايىرۋ, ادام ساۋداسى, ونىڭ ىشىندە كامەلەتكە تولماعانداردى ساتۋ, جەزوكشەلىكپەن اينالىسۋعا يتەرمەلەۋ جانە باسقا دا قاۋىپتى قىلمىستىق ارەكەتتەردى قامتيدى.
زاڭدا مۇنداي قىلمىستاردى جاساعانى ءۇشىن تاتۋلاسۋ ارقىلى قىلمىستىق جاۋاپكەرشىلىكتەن بوساتۋعا تىيىم سالىنادى.
سونىمەن قاتار ادامنىڭ كامەلەتكە تولماعانىن بىلە تۇرا, جەزوكشەلىك نەمەسە سەكسۋالدىق سيپاتتاعى قىزمەتتەرىن پايدالانعانى ءۇشىن العاش رەت قىلمىستىق جاۋاپكەرشىلىك ەنگىزىلدى.
زاڭدا كامەلەتكە تولماعان ادامدى سەكسۋالدىق سيپاتتاعى قىزمەت كورسەتۋگە, سونىڭ ىشىندە مۇنداي ءىستى ناسيحاتتاۋ نەمەسە جارنامالاۋ ارقىلى تارتۋ فاكتىلەرى قىلمىس دەپ تانىلادى.
بۇدان بولەك, زاڭدا العاش رەت ۆانداليزم قىلمىسىنىڭ سارالانعان قۇرامدارى ايقىندالدى. ياعني الەۋمەتتىك, ۇلتتىق, ناسىلدىك نەمەسە ءدىني ارازدىق سەبەبىمەن, ءبىر توپ ادام نەمەسە الدىن الا ءسوز بايلاسقان ادامدار توبى جاساعان, اسىرەسە, قاراۋلىقپەن ادەيى ءارى بىرنەشە رەت ۆانداليزم جاساۋ جاۋاپكەرشىلىكتى اۋىرلاتاتىن ءمان-جايلاردىڭ قاتارىنا جاتقىزىلادى.
زاڭدا بوتەننىڭ مۇلكىن قاساقانا جويعانى نەمەسە بۇلدىرگەنى ءۇشىن جاۋاپكەرشىلىك كۇشەيتىلدى. ونى ءبىر توپ ادام نەمەسە بىرنەشە رەت جانە قىلمىستىق توپ بولىپ جاساعانى ءۇشىن جاۋاپكەرشىلىك ەنگىزىلدى.
ءدال وسىنداي قىلمىستىق جاۋاپكەرشىلىك تاريحي, مادەني ەسكەرتكىشتەردى, تابيعي كەشەندەردى نەمەسە مەملەكەتتىڭ قورعاۋىنا الىنعان وبەكتىلەردى, سونداي-اق ەرەكشە تاريحي, عىلىمي, كوركەمدىك نەمەسە مادەني قۇندىلىعى بار زاتتاردى نەمەسە قۇجاتتاردى قاساقانا جويعانى نەمەسە بۇلدىرگەنى ءۇشىن بەلگىلەندى.
وسى تەكتەس قىلمىستاردى جاساعانى ءۇشىن بۇدان بىلاي قىلمىستىق جاۋاپكەرشىلىككە 16 جاستان ەمەس, 14 جاستان باستاپ تارتىلادى.
زاڭنىڭ ءماتىنى باسپاسوزدە جاريالانادى.
