№1 قالالىق پوليتسيا ءبولىمى جەرگىلىكتى پوليتسيا قىزمەتى باستىعىنىڭ ورىنباسارى قازبەك ادايبەكوۆتىڭ ايتۋىنشا, پوليتسيا جاساعىنىڭ رەيدتىك شارالار جۇرگىزۋىنە قاراماستان, اقتوبە سۋ قويماسى, ەلەك جانە قارعالى وزەندەرىنىڭ جاعاسىنداعى رۇقسات ەتىلمەگەن ورىنداردا قوقىس ءۇيىپ كەتۋشىلەر قاتارى ازايار ەمەس. قازىرگى كەزدە وزەندەر بويىنا قوقىس تاستاماۋ تۋرالى ەسكەرتۋلەردى ەلەمەستەن قورشاعان ورتانى بۇلدىرۋشىلەردىڭ قاراسى وتە كوپ.
مۇنىمەن قوسا «جاسىل ەل» وتريادى, وبلىستىق جاستار رەسۋرستىق ورتالىعىنىڭ 150 مۇشەسى اقتوبە سۋ قويماسى جاعاسىن تازالاۋعا كەلىپ, «Jasyl cross 2024» پلوگگينگ-جۇگىرۋ مارافونىن وتكىزدى. پلوگگينگ – قاشىقتىققا جۇگىرۋدى قوقىس جيناۋمەن الماستىراتىن جاڭا ەكولوگيالىق قوزعالىس. مارافونعا قاتىسۋشىلار بەس توپقا ءبولىنىپ, ءبىر-بىرىمەن جارىسا جۇگىرىپ, قولدارىنداعى قاپشىقتارىن قوقىسقا تولتىردى. كوڭىلدى مۋزىكا ىرعاعىمەن بيلەپ ءجۇرىپ قوقىس جيناعان جاستارعا دەمالۋشىلار دا قوسىلدى. «جاسىل ەل» ستۋدەنتتىك قۇرىلىس وتريادى وبلىستىق شتابىنىڭ جەتەكشىسى نۇرجان شاڭعىتباەۆتىڭ ايتۋىنشا, جاستار از ۋاقىتتا سۋ قويماسى توڭىرەگىنەن 18 توننا قالدىق جيناپ, دەمالۋشىلار تاستاعان قاعاز, پلاستيك جانە شىنى قۇتىلاردى, پلاستيك پاكەتتەردى سۇرىپتاپ ءبولىپ, كولىككە تيەپ, قوقىس پوليگونىنا جىبەردى.
«تازا قازاقستان» اكتسياسى باستالعالى قالا كوشەلەرى مەن وزەن جاعالاۋلارى, توعاي اراسى ءبىراز تازالاندى. ءۇش ايدان بەرى «تازا قازاقستان» اكتسياسىنا اقتوبە وبلىسىنان 213 مىڭ 954 تۇرعىن قاتىسقان. ولار 18 مىڭ 982 اۋلا, 276 ساياباق پەن گۇلباقتى تازالاپ, 285 مىڭ 910 ءتۇپ كوشەت وتىرعىزدى.
اقتوبە وبلىسى
