فوتو: ەڭبەك جانە حالىقتى الەۋمەتتىك قورعاۋ مينيسترلىگى
وڭىرلەردەگى الەۋمەتتىك قىزمەتتەردى الۋشىلار وزدەرىنە زاڭ جۇزىندە تيەسىلى مەملەكەتتىك قولداۋ شارالارى تۋرالى جەتكىلىكتى حاباردار ەمەس. ورال تۇرعىندارى دەپۋتاتپەن كەزدەسۋدە مەملەكەتتىك ورگانداردىڭ بۇل باعىتتاعى اقپاراتتاندىرۋىنىڭ تومەندىگىنە شاعىمداندى. سونىمەن قاتار پسيحولوگيالىق-مەديتسينالىق-پەداگوگيكالىق كوميسسيا قىزمەتىنىڭ اشىق بولماۋى دا سۇراق تۋعىزادى.
اجار ساعاندىقوۆا مەملەكەتتىك ورگاندارعا ءوز جۇمىسىنداعى ۇستانىمدارى مەن تاسىلدەرىن وزگەرتۋ جونىندە ۇكىمەتكە ءتيىستى دەپۋتاتتىق ساۋال جولداعانىن اتاپ ءوتتى.
– الايدا مەن مەملەكەتتىك ورگانداردا بۇعان قاراجات جوق دەگەن جاۋاپ الدىم. بۇعان كوپ قارجى قاجەت ەمەس. تەك تالداۋ جۇرگىزىپ, تاپسىرىس دەڭگەيىندە مۇنداي كوميسسيالاردىڭ جۇمىس ىستەۋ ەرەجەلەرىن وزگەرتىپ, حالىقپەن كوبىرەك ارالاسۋ قاجەت. پارتيانىڭ وبلىستىق فيليالىمەن بىرلەسە وتىرىپ, بۇل جاعدايدى قاداعالايمىز, – دەدى ا.ساعاندىقوۆا.
سونداي-اق دەپۋتات ەلىمىزدە تسيفرلاندىرۋ بەلسەندى دامىپ كەلە جاتقاندىقتان حالىقتىڭ الەۋمەتتىك تۇرعىدا از قامتىلعان توپتارى ەلەكتروندىق قىزمەتتەردى الۋ ماسەلەلەرىنە ەرەكشە نازار اۋدارۋ قاجەتتىگىن باسا ايتتى.
– قىزمەتتەردى ۇيدەن شىقپاي-اق ەلەكتروندى تۇردە جاساۋ مۇمكىن بولسا دا, ازاماتتارعا كوپتەگەن مەكەمەنىڭ ەسىگىن قاعۋعا تۋرا كەلەدى. ەگەر انا ءتورتىنشى بالانى دۇنيەگە اكەلسە, ونىڭ مارتەبەسى اۆتوماتتى تۇردە كوپبالالىعا اۋىسۋى كەرەك. قازىر وسى تسيفرلىق پلاتفورمالاردىڭ بارلىعىن بىرىكتىرەتىن جاڭا پلاتفورما ازىرلەنىپ جاتىر, بىراق ول وڭىرلەردە ءالى جۇمىس ىستەي قويماعان. ءبىز بۇل ماسەلەنى قاداعالايمىز, – دەدى دەپۋتات.
ساپار اياسىندا ماجىلىسمەن وبلىستىق ءماسليحات دەپۋتاتتارىمەن جانە جۇرتشىلىقپەن دە كەزدەستى. وتىرىستا سۋ تاسقىنىنان زارداپ شەككەندەرگە وتەماقى ەسەپتەۋ جونىندەگى كوميسسيانىڭ جۇمىسى, كيىكتەردىڭ ماسەلەسى, وڭىردەگى باسقا دا وزەكتى تۇيتكىلدەر تالقىلاندى.
