فوتو: stat.gov.kz
قازاقستان ۇلتتىق ستاتيستيكا بيۋروسىنىڭ باسشىسى ماقسات تۇرلىباەۆ پەن قحر ۇلتتىق ستاتيستيكا بيۋروسىنىڭ ديرەكتورى كان ي مىرزا قول قويعان مەموراندۋم ەكى ۆەدومستۆو اراسىندا تۇراقتى جانە ناتيجەلى قاتىناستار ورناتۋعا باعىتتالعان.
وسى قۇجاتتىڭ ماقساتى − ستاتيستيكانىڭ كەلەسى نەگىزگى باعىتتارى بويىنشا ىنتىماقتاستىقتى دامىتۋ:
- ستاتيستيكالىق جۇيەلەردى جاڭعىرتۋ: ستاتيستيكالىق اقپاراتتىڭ تيىمدىلىگى مەن سەنىمدىلىگىن ارتتىرۋعا باعىتتالعان دەرەكتەر ەكوجۇيەسىن ۇيلەستىرۋ جانە باسقارۋ سالاسىندا تاجىريبە جانە تەحنولوگيالارمەن الماسۋ.
- «ۇلكەن دەرەكتەردى» جانە جاڭا تەحنولوگيالاردى پايدالانۋ: ستاتيستيكالىق تاجىريبەگە يننوۆاتسيالىق تاسىلدەردى ەنگىزۋ بويىنشا بىرلەسكەن كۇش-جىگەر, سونىڭ ىشىندە جەردى قاشىقتىقتان زوندتاۋ دەرەكتەرىن پايدالانۋ.
- ونلاين ەسەپ بەرۋ پلاتفورمالارىن قۇرۋ بويىنشا تاجىريبە الماسۋ: رەسمي ستاتيستيكانىڭ اشىقتىعى مەن قولجەتىمدىلىگىن ارتتىرۋعا ىقپال ەتەتىن ستاتيستيكالىق دەرەكتەردى جيناۋ, تالداۋ جانە تاراتۋ ءۇشىن زاماناۋي پلاتفورمالاردى ازىرلەۋ جانە ەنگىزۋ.
«مەموراندۋمعا قول قويۋ − ءبىزدىڭ ۇيىمدار اراسىندا ناتيجەلى ارىپتەستىك ورناتۋعا باعىتتالعان ماڭىزدى قادام. بىرلەسكەن زەرتتەۋلەرگە قاتىسۋ, اقپارات الماسۋ جانە ءبىلىم بەرۋ ستاتيستيكالىق دەرەكتەردىڭ ساپاسىن ارتتىرۋعا ىقپال ەتەدى جانە ستراتەگيالىق شەشىمدەردى ازىرلەۋ ءۇشىن قاجەتتى اقپاراتتىڭ دالدىگى مەن دۇرىستىعىن قامتاماسىز ەتەدى», دەپ اتاپ ءوتتى قازاقستاننىڭ ۇلتتىق ستاتيستيكا بيۋروسىنىڭ باسشىسى ماقسات تۇرلىباەۆ.
ەكى ەل سونداي-اق ستاتيستيكالىق ەسەپتىلىكتى, دەرەكتەردى جيناۋ جانە اقپاراتتى تالداۋ ستاندارتتارىن دامىتۋعا باعىتتالعان بىرلەسكەن ءىس-شارالار مەن باعدارلامالار جوسپارىن تالقىلاعان. سونىمەن قاتار بولاشاقتا ستاتيستيكا سالاسىندا ءبىلىم مەن تاجىريبە الماسۋعا ىقپال ەتەتىن وقىتۋ ءىس-شارالارى جوسپارلانىپ وتىر.
