ەلىمىزدە اۋىلدىق جانە قانداس كۆوتاسى بويىنشا گرانت قالاي بولىنەدى؟

ۇلتتىق تەستىلەۋ ورتالىعى اۋىل كۆوتاسى 35 %-دى قۇرايتىنىن اتاپ ءوتتى. ياعني بەلگىلى ءبىر ماماندىققا بولىنگەن گرانتتاردىڭ جالپى سانىنىڭ 35 %-ى اۋىلدىق كۆوتا بويىنشا بولىنەدى. ماسەلەن, 2024 جىلى «پەداگوگيكا عىلىمدارى» باعىتىنا 13 735 گرانت بولىنسە, 4 807 گرانتتى اۋىل مەكتەپتەرىنىڭ تۇلەكتەرى الادى.

«اۋىل كۆوتاسى اۋىلدىڭ الەۋمەتتىك-ەكونوميكالىق دامۋىن ايقىندايتىن ماماندىقتار بويىنشا بەرىلەدى. مىسالى, پەداگوگيكالىق, IT, اۋىل شارۋاشىلىق, ۆەتەريناريا, مەديتسينالىق جانە ت.ب.», دەلىنگەن حابارلامادا.

سونىمەن قاتار ورتالىق اۋىل كۆوتاسى ءۇشىن انىقتاما الۋدىڭ قاجەتى جوق ەكەنىن مالىمدەدى. اۋىلدىق جەردە ورنالاسقان مەكتەپتى بىتىرگەن تۇلەكتەردىڭ اقپاراتى بازادا بولاتىنىن ەسكە سالدى.

سونداي-اق قازاقستاننىڭ ازاماتتارى بولىپ تابىلمايتىن ۇلتى قازاق ادامدارعا ارنالعان كۆوتا ءتۇرى بار. قانداس كۆوتاسى 4%-دى قۇرايتىنىن اتاپ ءوتتى. ياعني جالپى بولىنگەن گرانتتىڭ 4%-ى قانداستارعا بەرىلەدى. مىسالى, 2024 جىلى «پەداگوگيكالىق عىلىمدار» باعىتى بويىنشا 13 735 گرانت بولىنگەن, ونىڭ ىشىندە 549 گرانت نەمەسە 4%-ى قانداستارعا ارنالعان.

«بۇل كۆوتا بويىنشا گرانت كونكۋرسىنا قاتىسۋ ءۇشىن قانداستار ۇلتى (قازاق) كورسەتىلگەن شەتەل تولقۇجاتىن ۇسىنادى. اتاپ وتسەك, قانداستار ءۇشىن گرانت كونكۋرسىنا قاتىسۋعا ۇبت-نىڭ شەكتى بالدارى بەكىتىلمەگەن», دەپ قوستى ۇتو.