فوتو: Azattyq Ruhy
پارتيا فراكتسياسىنىڭ مۇشەلەرى پاۆەل كازانتسەۆ, تاتيانا ساۆەلەۆا, سامات نۇرتازا, مارات باشيموۆ جانە دۇيسەنباي تۇرعانوۆ استاناداعى «تۇران» گاز جىلۋ ستانساسىنىڭ قۇرىلىسىمەن تانىستى.
بۇگىندە قۋاتى ساعاتىنا 250 گيگاكالوري بولاتىن 4 قازاندىق سالۋ جۇمىسى ءجۇرىپ جاتىر. بۇل قادام الداعى جىلۋ بەرۋ ماۋسىمىندا ەلوردانىڭ نۇرا اۋدانىندا ورنالاسقان تۇرعىن ۇيلەردى بىرىڭعاي جىلۋمەن جابدىقتاۋ جۇيەسىنە قوسۋعا مۇمكىندىك بەرەدى. بۇعان دەيىن بۇل نىساندار جەكە قازاندىقتاردى پايدالانىپ كەلگەن بولاتىن.
«Amanat» پارتياسىنىڭ سايلاۋالدى باعدارلاماسى اياسىندا جىلۋمەن جابدىقتاۋ ماسەلەلەرىن شەشۋ ماقساتىمەن «تۇران» گجس قۇرىلىسى جالعاسىپ كەلەدى. العاشقى قازاندىق بىلتىر پايدالانۋعا بەرىلدى.
– جۋىردا ءبىز «جىلۋ ەنەرگەتيكاسى تۋرالى» زاڭ قابىلدادىق. بۇل قۇجات اتالعان سالاداعى مەملەكەتتىك قاداعالاۋدى كۇشەيتۋگە مۇمكىندىك بەرەدى. وسىلايشا, جىلۋ جەلىلەرىن باقىلاۋ قىزمەتى جەرگىلىكتى اتقارۋشى ورگانداردان ەنەرگەتيكا مينيسترلىگىنىڭ اتوم جانە ەنەرگەتيكالىق قاداعالاۋ كوميتەتىنە بەرىلدى. استانادا 2 جىل بۇرىن جىلۋ تاپشىلىعى بولعان ەدى. الايدا وتكەن جىلىتۋ ماۋسىمىندا قالا العاش رەت پروفيتسيتكە شىقتى. بۇعان «وڭتۇستىك-شىعىس» گاز جىلۋ ستانساسى مەن «تۇران» گجس-نىڭ 1 كەزەڭى پايدالانۋعا بەرىلۋى ىقپال ەتتى, – دەدى دەپۋتات دۇيسەنباي تۇرعانوۆ.
دەپۋتات پاۆەل كازانتسەۆ جىلۋمەن قامتاماسىز ەتۋ ماسەلەسى شەشىلگەندىكتەن, «تۇران» گجس تۇرعىن ءۇي قۇرىلىسىنا سەرپىن بەرەتىنىن اتاپ ءوتتى.
اتاپ ايتقاندا, قازاقستاندىق يپوتەكالىق كومپانيانىڭ تۇرعىن ءۇي كەشەنى سالىنىپ جاتقان «ەللينگتون» كوپبەيىندى وتباسىلىق ويىن-ساۋىق تۋريستىك اۋماعىنا جانە قورعالجىن تاسجولى مەن سەيفۋللين كوشەسى اراسىنداعى ۋچاسكەگە جىلۋ جەلىلەرىن جەتكىزۋگە بولادى.
– 2023 جىلدان بەرى پروفيتسيت دەڭگەيىنە جاقىنداپ كەلەمىز. ياعني جاڭا ۇيلەردى جىلۋ جەلىلەرىنە قوسۋعا قاتىستى ەشقانداي شەكتەۋ جوق. سونداي-اق جىلۋ جەلىلەرىنە بايلانىستى اقاۋ دا جوق. جاڭادان قوسىلعان 3 ستانسا قاجەتتى گيدراۆليكالىق رەجىمدى ساقتاۋعا مۇمكىندىك بەرەدى. ءبىز استانانى ارتىق شىعىنسىز جىلۋمەن قامتاماسىز ەتە الامىز, – دەدى استانا قالاسى ەنەرگەتيكا باسقارماسى باسشىسىنىڭ ورىنباسارى ماقسات ەسماعۇلوۆ.
ساپار بارىسىندا ماجىلىسمەندەر وندىرىستىك جانە الەۋمەتتىك نىسانداردى ارالاپ, ەڭبەك ۇجىمدارىمەن كەزدەسۋلەر, سونداي-اق ازاماتتاردىڭ جەكە ماسەلەلەرى بويىنشا قابىلداۋلار وتكىزەدى. دەپۋتاتتاردىڭ وڭىرلەردەگى ساپار قورىتىندىسى كۇزدە پارلامەنت ءماجىلىسىنىڭ جالپى وتىرىستارىنىڭ بىرىندە جيناقتالادى.
