الماتىدا 150 سۋبۇرقاق بار بولسا, ونىڭ 66-سى كوممۋنالدىق, 84-ءى جەكەمەنشىك اۋماعىندا ەكەندىگىن, ال كوممۋنالدىق مەنشىكتەگى سۋبۇرقاقتار 1 مامىردان 25 قازانعا دەيىن كۇندەلىكتى تەكسەرىلىپ, تازالانىپ, جۇمىس ىستەپ تۇرعانىن ايتۋعا بولادى. الايدا جەكەمەنشىك اۋماقتاعى سۋبۇرقاقتاردىڭ جاعدايى ءماز ەمەس, قاراۋسىز قالعان, جۇمىس ىستەمەيدى ياكي كۇردەلى جوندەۋدى تالاپ ەتەتىندىكتەن, «الماتى جازى» اكتسياسى جەكەمەنشىك اۋماعىنداعى سۋبۇرقاقتار قالپىنا كەلتىرۋدى كوزدەپ وتىر.
وعان قوسا ۇزىندىعى 1 525 شاقىرىم بولاتىن ارىق جەلىلەرىن تازارتۋ جۇمىستارى كۇشەيتىلەدى. كۇن سايىن الماتىنىڭ ارىقتارىنان شامامەن 250 تەكشە مەتر لاي مەن قوقىس شىعارىلادى. كوكتەم شىققالى تىنىمسىز جۇرگىزىلىپ جاتقان تازالىق جۇمىستارىنا قاراماستان ارىقتاردى نوسەر جاڭبىر كەزىندە تۇرعىندار تاستاعان قوقىس-قالدىقتار بىتەپ, اينالاسىن كول-داريا ەتىپ جاتادى. قانشا جەردەن ەسكەرتىلسە دە, وكىنىشكە قاراي, كوممۋنالدىق قىزمەت نوسەر جاڭبىردان كەيىن ارىقتاردى جورگەكتەر, ەسكى-قۇسقى زاتتار مەن ىدىس-اياق, ءتىپتى كولىك دوڭگەلەكتەرى مەن قۇرىلىس قالدىقتارىنان تازارتىپ وتىرۋعا ءماجبۇر.
«الماتى جازى» اكتسياسى ەكى اپتا ىشىندە 624 ايالدامانى, 222 باعدارشام مەن 2 181 جول بەلگىسىن جۋىپ, وزەن جاعالاۋى مەن سۋ ايدىندارى اۋماعىنداعى شامامەن 250 شارشى شاقىرىم جەردى قوقىستان تازارتۋدى جوسپارلاپ وتىر.
سول سياقتى جازدا اۋلا ىشىندەگى قوقىس كونتەينەرلەرىنىڭ تەز تولىپ قالاتىنى دا ماسەلە تۋعىزاتىندىقتان, 1 454 كونتەينەرلىك الاڭدى سانيتارلىق وڭدەۋدەن وتكىزىلىپ, 700 كونتەينەرلىك الاڭ جۋىلىپ, زالالسىزداندىرىلىپ, 24 747 قوقىس جاشىگى تازارتىلادى.
ەگەر الماتىدا اينالىپ وتۋگە بولمايتىن ەسكى ماسەلە بار دەيتىن بولساق, ول – وزەگى قۋراعان اعاشتار. ءدىڭى ءشىرىپ تۇرعان اعاشتار جەل شايقاعاندا ادامدارعا عانا ەمەس, م ۇلىككە, كولەڭكە ىزدەگەن كولىكتەرگە دە قاۋىپ ءتوندىرىپ جاتادى. سوندىقتان «الماتى جازى» اكتسياسى كەزىندە 6 مىڭعا جۋىق اعاش سانيتارلىق ماقساتتا كەسىلەدى.
كوڭىلگە شۋاق ۇيالاتاتىن تاعى ءبىر جايت, «جاسىل» ەڭبەك جاساقتارىنداعى بەلسەندىلەر قاتارى كوبەيىپ كەلەدى. «ەڭ الدىمەن, «جاسىل ەل» جوباسى اياسىندا «Jas ecopatrol» ەكولوگيالىق جاساقتارى مونيتورينگ جۇمىستارىن جۇرگىزىپ جاتقانىنا توقتالعىم كەلەدى. ناتيجەسىندە, قالا اۋداندارىندا 15-تەن استام ءىرى رۇقساتسىز قوقىس ورىندارى بار ەكەندىگى انىقتالدى, بۇل قالدىقتاردى زاڭسىز جيناۋ ماسەلەسىنىڭ بار ەكەنىن كورسەتەدى. سونداي-اق وزەندەردى لاستاۋعا قاتىستى 150-دەن استام زاڭ بۇزۋشىلىق انىقتالدى», دەيدى الماتى قالاسىنىڭ «جاسىل ەل» جانە «جاس ەكوپاترۋل» جاستار ەكولوگيالىق جاساقتارىنىڭ باسشىسى ءادىل نۇرپەيىسوۆ. ايتۋىنشا, انىقتالعان كەلەڭسىزدىكتەرگە بايلانىستى جاۋاپتى مەكەمەلەرگە 50-دەن استام سۇراۋ سالىنىپ, 100 شاقتى ارىز جازىلعان.
«جاسىل ەل» ەڭبەك جاساقتارىن قۇرۋ جوعارى وقۋ ورىندارى مەن ەكولوگيالىق ۇيىمدار ارقىلى جۇزەگە اسىپ جاتىر. 700-دەي ادام اتسالىساتىن بيىلعى «جاسىل ەل» جوباسى كوكتوبەدە تۇساۋىن كەسىپ, ەكولوگيالىق نورمالار بويىنشا ترەنينگتەر مەن نۇسقاۋلىقتار وتكىزىلدى. اتالعان جوبانىڭ تيىمدىلىگى كوپ-اق. جازعى دەمالىستا جاستار بوسقا ساندالماي, ءبىر-بىرىمەن ارالاسىپ, تابىس تاۋىپ, قالا تازالىعى قالاي قامتاماسىز ەتىلەتىنىن تۇيسىنەدى.
الماتى
