فوتو: adyrna.kz
تالعات ءۋالي بۇگىندە ەلىمىز بويىنشا سوت ورىنداۋشىلارىنىڭ ورىنداۋىندا اليمەنت ءوندىرىپ الۋ تۋرالى 291 مىڭ اتقارۋشىلىق ءىس جۇرگىزىلىپ جاتقانىن اتاپ ءوتتى. ونىڭ ىشىندە 281 مىڭ بورىشكەر - ەرلەر, 11 مىڭنان استامى – ايەلدەر ەكەنى بەلگىلى بولدى.
«2024 جىلدىڭ باسىندا پروبلەمالىق اليمەنت تولەمدەرىنىڭ سانى 20,7 ملرد تەڭگەنى قۇرايتىن 16 197 ءوندىرىستى قۇراسا, قازىرگى ۋاقىتتا پروبلەمالىق اليمەنت تولەمدەرى 21%-عا (سوما 35%-عا دەيىن) ازايدى, ياعني 13 ملرد تەڭگەگە - 12 883 وندىرىسكە دەيىن تومەندەدى. ورتاشا العاندا, اليمەنت ءوندىرىسىنىڭ 95%-دان استامى سوت ورىنداۋشىلارىنىڭ تالاپتارىن ەش قيىندىقسىز ورىندايتىن جۇمىس بەرۋشىلەردىڭ بۋحگالتەرلىك قىزمەتتەرى ارقىلى وندىرىلەدى», دەپ ءتۇسىندىردى ۆەدومستۆو وكىلى.
سونداي-اق سوت ورىنداۋشىلارى 7 مىڭنان استام بورىشكەردىڭ رەسپۋبليكادان تىس جەرگە شىعۋىنا ۋاقىتشا شەكتەۋ قويدى.
بۇل رەتتە تالعات ءۋالي بورىشكەرلەر اليمەنتتىك مىندەتتەمەلەردى تيىسىنشە ورىنداماعانى ءۇشىن اكىمشىلىك جانە قىلمىستىق جاۋاپكەرشىلىككە تارتىلاتىنىن ەسكە سالدى.
«جىل باسىنان بەرى قىلمىستىق كودەكستىڭ 139-بابى بويىنشا 1875 بورىشكەر اكىمشىلىك جاۋاپكەرشىلىككە تارتىلىپ, ونىڭ 115-ءى سوتقا جولداندى, 55 بورىشكەر سوتتالدى», دەپ تۇيىندەدى تالعات ءۋالي.
