اناليتيكالىق باعىت دەگەنىمىز – ءار اقپاراتتى تىڭعىلىقتى زەرتتەۋ. ەۋروپا مەملەكەتتەرى, اقش سىندى دامىعان ەلدەردە جۋرناليستەردىڭ اقپاراتتى حابار سيپاتىندا, جاي كونتەكستە جەتكىزۋ ءۇردىسى جويىلدى دەسەك بولادى. سەبەبى بلوگەرلەر, الەۋمەتتىك جەلى پايدالانۋشىلارى وقىرمانعا مۇنداي تيپتەگى جاڭالىقتى ءاپ ساتتە جەتكىزىپ وتىر. نەگىزى جۋرناليستيكادا ارنايى زەرتتەۋ, تەرگەۋ باعىتى بار. دەمەك جۋرناليستەرگە جاساندى ينتەللەكتىنىڭ مۇمكىندىگىن سەنىمدى تۇردە پايدالانىپ, ساراپتامالىق ماتەريالداردى كوبىرەك شىعارۋعا جۇمىستانۋ قاجەت.
ايتالىق, ەلىمىزدە زاڭنامالىق بازالاردىڭ جيناعى بار. سول دەرەكتەردەن كەيىنگى جارتى جىلدا نە ءبىر جىلدا قانداي زاڭدار نەمەسە نورماتيۆتىك قۇجاتتار وندىرىسكە جىبەرىلگەندىگىن جانە ولاردىڭ پارلامەنت تاراپىنان قابىلدانىپ, پرەزيدەنت قايسىسىنا قول قويعانىن, كۇشىنە ەنگەنىن ساراپتاپ, اناليتيكا جاساۋدا جاساندى ينتەللەكتىنىڭ مۇمكىندىگىن قولدانۋعا بولادى. قازىر رەداكتسياعا, ودان قالدى جۋرناليستەردىڭ جەكە پوشتاسىنا كۇنىنە ءبىرشاما ءباسپاسوز رەليزدەرى ءتۇسىپ جاتىر. قاۋىرت جۇمىس پەن ۋاقىتتىڭ تىعىزدىعىنان ماڭىزدى جاڭالىقتاردى جىبەرىپ الۋ ىقتيمالدىلىعى جوعارى. وسى ورايدا تاقىرىپتاردىڭ ىشىنەن زەرتتەۋگە تۇراتىندارىن تاڭداپ الىپ, Chat GPT سىندى وزىق ساندىق باعدارلامالاردى پايدالانۋ كەرەك.
ءبىر ەسكەرەتىن جايت, كەلگەن ءباسپاسوز رەليزىن بىردەن سول كۇيى سالۋ تالعامدى وقىرمانعا ۇنامايدى. ودان قالدى باسقا باسىلىمدار بايقاعان تۇستى ءسىز ەلەمەي قالۋىڭىز ىقتيمال. سوندىقتان جاساندى ينتەللەكت كومەگىن پايدالانىپ, وقىرمانعا قاجەتتى دەگەن دەرەكتەردى الىپ-قوسىپ, تارقاتىپ جازۋ قاجەت. ياعني Chat GPT كىلت سوزدەردى كورسەتۋدە, ينسايتتار الۋدا, ءسوز جاسامىن, سويلەم قۇرامىن وزگەرتۋگە سەپ بولادى. ونى الەۋمەتتىك جەلىگە جۇكتەسە دە, جاقسى قارالىم جينايتىنىنا سەنىم بار.
ارينە, جاساندى ينتەللەكت مىقتى ءارى ساۋاتتى جۋرناليستەردى الماستىرمايدى. دەسەك تە ول وتە جاقسى كومەكشى بولا الادى. سوندىقتان كۇيبەڭ تىرلىكتە, قايتالانا بەرەتىن جاعدايلاردا ادامدى جالىقتىرماس ءۇشىن جۇمىستىڭ كەي بولىگىن جاساندى ينتەللەكتىگە تاپسىرۋ قاجەت. بۇل – زامان سۇرانىسى.
تيمۋر بەكتۇر,
ءىت-ساراپشى
