فوتو: ەرلان ومار
«Dara» پرەزيدەنتتىك باستامالار قورىنىڭ ۇيىمداستىرۋىمەن وتكەن ءىس-شارادا ماسس-مەديا سالاسىنىڭ قىزمەتكەرلەرىنە پاتەر سەرتيفيكاتتارىن قازاقستان رەسپۋبليكاسى پرەزيدەنتىنىڭ كەڭەسشىسى – ءباسپاسوز حاتشىسى بەرىك ءۋالي, مادەنيەت جانە اقپارات ءمينيسترى ايدا بالاەۆا جانە «Dara» قورىنىڭ پرەزيدەنتى اسەل شىلدەباەۆا سالتاناتتى تۇردە تابىستادى.
قازاقستان رەسپۋبليكاسى پرەزيدەنتىنىڭ كەڭەسشىسى – ءباسپاسوز حاتشىسى بەرىك ءۋالي مەملەكەت باسشىسىنىڭ باق سالاسىن دامىتۋعا ايرىقشا ءمان بەرەتىنىن ايتا كەلىپ, قۋانىش يەلەرىن جاڭا قونىسىمەن قۇتتىقتادى.
«جۋرناليستەر اراسىندا ء«بىز نە مەملەكەتتىك قىزمەتشىلەردىڭ, نە بيۋدجەتتىك مەكەمە قىزمەتكەرلەرىنىڭ ساناتىندا جوقپىز, مەملەكەتتىك باعدارلامالاردىڭ يگىلىگىن كورە المايمىز» دەگەن ماسەلە ءجيى كوتەرىلەتىن. پرەزيدەنتتىڭ تاپسىرماسىمەن سول ولقىلىقتىڭ ورنى تولىپ, جىل سايىن جۋرناليستەرگە باسپانا بەرۋ داستۇرگە اينالدى. ەڭ باستىسى, پاتەر كىلتتەرى ەلىمىزدىڭ دامۋىنا, مەملەكەت باسشىسى جۇرگىزىپ وتىرعان رەفورمالاردى حالىققا جەتكىزۋگە ەلەۋلى ۇلەس قوسىپ كەلە جاتقان باق وكىلدەرىنە تابىس ەتىلەدى. سونىڭ ىشىندە باسپانا شىن مانىندە مۇقتاج جاندارعا بەرىلىپ وتىر. اتاپ ايتقاندا, 21 پاتەر كوپبالالى وتباسىعا, 5 پاتەر جالعىزباستى انالارعا بەرىلدى. سونىمەن قاتار وتباسىندا مۇمكىندىگى شەكتەۋلى بالاسى نەمەسە جۇبايى بار 11 ازامات باسپانالى بولدى. پاتەر العان باق سالاسى قىزمەتكەرلەرىنىڭ اراسىندا 6 جانۇيا وسى ۋاقىتقا دەيىن جاتاحانادا تۇرىپ كەلگەن. بۇل يگى ءداستۇر الداعى ۋاقىتتا دا جالعاسىن تابادى. ءبىر وتباسى باسپانالى بولسا, قۋانىپ, حالىقتان ءسۇيىنشى سۇرايتىن جۋرناليستەردىڭ ءۇيلى بولۋى – وتە قۋانىشتى جاعداي», دەدى بەرىك ءۋالي.
مادەنيەت جانە اقپارات ءمينيسترى ايدا بالاەۆا مەملەكەت الەۋمەتتىك جوبالاردى تولىعىمەن قولدايتىنىن اتاپ ءوتتى.
«مەملەكەت باسشىسى تۇرعىن ءۇي ماسەلەسىنە كوپ كوڭىل بولەدى. قولجەتىمدى باسپانا بويىنشا ءتۇرلى الەۋمەتتىك جوبالاردان باسقا, قازاقستاننىڭ ءبىر ميلليون ءۇش ءجۇز مىڭنان استام ازاماتى تۇرعىن ءۇي جاعدايىن جاقسارتۋ ءۇشىن, جالپى ءۇش تريلليون تەڭگەدەن استام زەينەتاقى جيناعىن پايدالانعانىن دا اتاپ وتكەن ءجون. بۇل مەملەكەتتىڭ ءوز ازاماتتارىنا جەردەم بەرۋىنىڭ تەڭدەسسىز تەتىگى», دەدى مينيستر ايدا بالاەۆا.
سەرتيفيكات يەلەرىنىڭ قاتارىندا «Egemen Qazaqstan» گازەتىنىڭ التى قىزمەتكەرى دە بار. ولار: ينتەرنەت-رەداكتسيا ءبولىمىنىڭ جەتەكشىسى - دينار كەرىم, ەكونوميكا جانە وندىرىس بولىمىنىڭ مەڭگەرۋشىسى - اباي ايماعامبەت, مادەنيەت جانە ادەبيەت ءبولىمىنىڭ تىلشىلەرى - جانىبەك ءاليمان مەن باتىرحان سارسەنحان, «Egemen Qazaqstan» گازەتىنىڭ بەت قاتتاۋشى-ديزاينەرى زاۋرەش نۇعىمانوۆا, سونداي-اق, «قازاق گازەتتەرى» جشس كادرلىق قامتاماسىز ەتۋ جانە كادرلىق ءىس جۇرگىزۋ مامانى باقىتجامال قايبجانوۆا.
ايتا كەتەيىك, بىلتىر مەملەكەت باسشىسىنىڭ اتىنان باق قىزمەتكەرلەرىنە 1 جانە 2 بولمەلى 65 پاتەر, ال بيىل 67 پاتەر بەرىلدى. ناقتىراق ايتقاندا, 13-ءى – 3 بولمەلى, 45-ءى – ەكى بولمەلى, 9-ى – ءبىر بولمەلى پاتەرلەر.
