نارىق تەتىكتەرىنىڭ السىزدىگى بولار, كورشى ەلدىڭ ساپاسىز استىعى ءبىزدىڭ نارىعىمىزدى ەركىن بيلەپ-توستەپ الدى. پاۆلودار وبلىسى بويىنشا ەكونوميكالىق تەرگەپ-تەكسەرۋ دەپارتامەنتى ەڭ قاۋىپتى ءارى كۇدىكتى قارجىلىق وپەراتسيالاردى تالداي كەلىپ, 30 قىلمىستىق قۇقىق بۇزۋشىلىقتى انىقتاعان. بۇل زاڭ بۇزۋشىلىقتار بويىنشا قىلمىستىق جاۋاپكەرشىلىك قىلمىستىق كودەكستىڭ 216-بابىندا ايقىن كورسەتىلگەن. كەلتىرىلگەن زالال 6 ميلليارد تەڭگەدەن اسقان. ونىڭ 300 ميلليون تەڭگەسى تەرگەۋ ۇدەرىستەرى كەزىندە وتەلدى.
زاڭسىز استىق يمپورتى بويىنشا وڭىردەگى شارۋا قوجالىقتارىنا قاتىستى 12 قىلمىستىق ءىس تىركەلگەن. ونىڭ ىشىندە مەملەكەتكە 4,1 ملرد تەڭگە زالال كەلتىرگەن 10 قىلمىستىق ءىس سوتتا قارالدى.
– كورشىلەس مەملەكەتتەردە, اتاپ ايتقاندا, رەسەيدە وندىرىلگەن استىقتى ۇلكەن كولەمدە ەلگە اكەلىپ, جالعان شوت-فاكتۋرالار جاساۋ ارقىلى تاياۋ شىعىس ەلدەرىنە وتاندىق ءونىم رەتىندە ەكسپورتقا شىعارىپ جاتقاندار انىقتالدى. ولار ءونىمدى كوبىنە اۋعانستان, يران, تاجىكستان سياقتى مەملەكەتتەرگە جىبەرەدى. بۇل ءبىزدىڭ وتاندىق ەكونوميكامىزعا, ءوڭىرىمىزدىڭ شارۋا قوجالىقتارىنا ايتارلىقتاي زيان كەلتىرىپ وتىر. ءوزىمىزدىڭ ونىمدەرىمىز شەتەلگە شىقپاي قالادى نەمەسە ساتىلعان كۇندە دە باعاسى تومەندەپ كەتەدى. سوندىقتان دا مۇنداي زاڭسىز ءىس-ارەكەتتەر ءبىزدىڭ ۇلتتىق ەكونوميكامىزعا ۇلكەن زالال كەلتىرەدى, – دەيدى پاۆلودار وبلىسى بويىنشا ەكونوميكالىق تەرگەپ-تەكسەرۋ دەپارتامەنتىنىڭ باسشىسى ەرىك ەسەنوۆ.
وبلىستاعى كۇلبىلتەلى پروبلەمالاردىڭ ءبىرى – زاڭسىز استىق يمپورتى. بۇل رەتتە شارۋا قوجالىقتارىنا قاتىستى 12 قىلمىستىق ءىس تىركەلگەن. ونىڭ ىشىندە مەملەكەتكە 4,1 ملرد تەڭگە زالال كەلتىرگەن 10 قىلمىستىق ءىس سوتقا جولدانىپ, قارالدى.
اتاپ ايتقاندا, ولاردىڭ ءبىرى – «ەرتىس» شارۋا قوجالىعى. باسشىسى جالعان شوت-فاكتۋرالار جاساۋ ەسەبىنەن 50 ميلليون تەڭگەگە جۋىق كىرىس تاپقان. ول بۇل قاراجاتقا «Toyota Camry» اۆتوكولىگى مەن پاۆلودارداعى ەليتالىق تۇرعىن ءۇي كەشەنىنەن پاتەر ساتىپ العان. شارۋا قوجالىعى باسشىسى ءۇش جىلعا باس بوستاندىعىنان ايرىلىپ, مۇلكى تاركىلەندى.
تاعى ءبىر كاسىپورىن – «ۆوستوك» جك وكىلدەرى ءبىر جارىم جىلعا باس بوستاندىعىنان ايىرىلدى. ولار «داماس» شق, «ديار», «التىن بيداي», «سەۆەر», «انسار» جك جانە «Ansar_ANSAR» جشس-لارى ءۇشىن ءداندى جانە ءداندى-بۇرشاقتى داقىلدار بويىنشا جالعان شوت-فاكتۋرالار دايىنداپ وتىرعان. قىلمىستىق تابىس سوماسى 50 ميلليون تەڭگەنى قۇراعان.
پاۆلودار وبلىسى
