ءسوز باسىندا ءماجىلىس سپيكەرى, پارتيا توراعاسى ەرلان قوشانوۆ «Amanat» پارلامەنتتىك كوپشىلىك پارتيا رەتىندە مەملەكەت باسشىسىنا پرەمەر-ءمينيستردىڭ كانديداتۋراسىن ۇسىنعانىن جانە ۇكىمەت قۇرامىن جاساقتاۋعا تىكەلەي اتسالىسقانىن ەسكە سالدى. سوندىقتان «حالىقپەن بىرگە!» سايلاۋالدى باعدارلاماسىنىڭ ساپالى ورىندالۋى – پارتيانىڭ, دەپۋتاتتىق كورپۋستىڭ جانە ۇكىمەتتىڭ ورتاق جاۋاپكەرشىلىگى.
«سايلاۋالدى باعدارلاما – ءبىزدىڭ باستى قۇجاتىمىز. بۇل – ەل دامۋىنا داۋىس بەرگەن ميلليونداعان وتانداسىمىزدىڭ سەنىمى. سوندىقتان حالىقتىڭ ءۇمىتىن اقتاپ, وسى ۋادەلەردى ورىنداۋ – ءبىزدىڭ ورتاق جاۋاپكەرشىلىگىمىز. پرەزيدەنت قاسىم-جومارت توقاەۆ 2029 جىلعا قاراي ەل ەكونوميكاسىن ەكى ەسە ارتتىرۋ مىندەتىن قويدى. مۇنىڭ ءبارى پارتيانىڭ سايلاۋالدى باعدارلاماسىندا جانە بەكىتىلگەن جول كارتاسىندا كوزدەلگەن. ۇكىمەتپەن دە كەلىسىلگەن. بۇعان سالالىق مينيسترلىكتەر مەن فراكتسيا مۇشەلەرى تىكەلەي جاۋاپ بەرەدى», دەدى ە.قوشانوۆ.
سونىمەن قاتار پارتيا توراعاسى پارتيانىڭ سايلاۋالدى باعدارلاماسىن ورىنداۋ بويىنشا جول كارتاسىن جۇزەگە اسىرۋداعى وڭ ديناميكاعا نازار اۋداردى. ماسەلەن, تۇرعىن ءۇي قولجەتىمدىلىگىن ارتتىرۋ ءۇشىن 2023 جىلى ەلىمىزدە 17 ملن شارشى مەتر تۇرعىن ءۇي پايدالانۋعا بەرىلدى. جول كارتاسى بويىنشا 15,5 ملن شارشى مەتر تۇرعىن ءۇي سالۋ كوزدەلگەن بولاتىن. «جەر اماناتى» جوباسى اياسىندا 10 ملن گەكتاردان استام اۋىل شارۋاشىلىعى جەرلەرى مەملەكەت مەنشىگىنە قايتارىلدى.
پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى نۇرلان بايبازاروۆ پارتيانىڭ سايلاۋالدى باعدارلاماسىن جۇزەگە اسىرۋ بويىنشا ۇكىمەتتىڭ اتقارعان جۇمىسى تۋرالى باياندادى. ول ەكونوميكانى دامىتۋ, بيزنەستى, اۋىل شارۋاشىلىعىن, ءوندىرىستى قولداۋ, ازاماتتاردىڭ تابىسىن ارتتىرۋ, الەۋمەتتىك ساياساتتى جاقسارتۋ, جۇمىسپەن قامتۋ ماسەلەلەرىن شەشۋ, وڭىرلەردىڭ ينفراقۇرىلىمدىق دامۋى جانە وزگە دە ماڭىزدى باعىتتار بويىنشا قابىلدانعان شارالارعا ەگجەي-تەگجەي توقتالدى.
«ۇكىمەت ءوزىنىڭ بارلىق الەۋمەتتىك مىندەتتەمەلەرىن ورىنداپ كەلەدى. بۇل ماقساتتارعا رەسپۋبليكالىق بيۋدجەتتىڭ 40%-دان استام قاراجاتى بولىنەدى. ماسەلەن, بىلتىردان باستاپ اتاۋلى الەۋمەتتىك كومەك شەڭبەرىندە 1 جاستان 6 جاسقا دەيىنگى ءاربىر بالاعا 1,5 اەك مولشەرىندە قوسىمشا تولەم بەلگىلەندى. 2023 جىلى بۇل تولەمدى 186,8 مىڭ بالا الدى. بۇعان قوسا بيىل بازالىق زەينەتاقىنىڭ ەڭ تومەنگى مولشەرى 65%-عا, ال ەڭ جوعارى مولشەرى ەڭ تومەنگى كۇنكورىس دەڭگەيىنىڭ 105%-نا دەيىن ۇلعايتىلدى. ايتا كەتەيىك, بۇگىندە قازاقستان تمد ەلدەرى اراسىندا ەڭ جوعارى ورتاشا زەينەتاقى مولشەرىنە يە», دەدى ن.بايبازاروۆ.
سونىمەن قاتار ءتۇرلى ساناتتاعى ازاماتتاردىڭ: اسكەري قىزمەتشىلەردىڭ جالاقىسى – 50, توتەنشە جاعدايلار قىزمەتكەرلەرىنىڭ جالاقىسى – 40, دارىگەرلەردىڭ ەڭبەكاقىسى – 30, مەديتسينا قىزمەتكەرلەرىنىڭ جالاقىسى – 20, مادەنيەت جانە ارحيۆ ءىسى قىزمەتكەرلەرىنىڭ ەڭبەكاقىسى 20 پايىزعا ءوستى. سونىمەن قاتار بىلتىر 67 مىڭ ورىندىق 611 مەكتەپكە دەيىنگى مەكەمە جانە 137,8 مىڭ ورىندىق 165 مەكتەپ اشىلدى. 473 مىڭ جاس ازامات جۇمىسقا ورنالاستىرىلدى. پرەمەر-ءمينيستردىڭ ورىنباسارى تۇرعىن ۇيمەن قامتاماسىز ەتۋ شارالارىنا جەكە توقتالدى.
«جىل سوڭىنا دەيىن 18 ملن شارشى مەتر تۇرعىن ءۇي سالۋ جوسپارلانىپ وتىر. بيىل جالعا بەرىلەتىن تۇرعىن ءۇي قۇرىلىسىنا «سامۇرىق-قازىنادان» العاش رەت 272 ملرد تەڭگە ءبولىندى, ونىڭ 40%-ى اۋداندىق دەڭگەيدەگى تۇرعىن ءۇي قۇرىلىسىنا ارنالعان. سونداي-اق بيىل «وتباسى بانك» جەلىسى بويىنشا 20 مىڭ وتباسىنا 7-9% جەڭىلدىكپەن نەسيە بەرۋ جوسپارلانعان», دەدى ن.بايبازاروۆ.
پرەمەر-ءمينيستردىڭ ورىنباسارى 2023 جىلى شيكىزاتتىق ەمەس تاۋارلار مەن قىزمەتتەردىڭ جالپى ەكسپورتى 35,6 ملرد دوللارعا جەتكەنىن ايتتى. ول سونداي-اق دەپۋتاتتاردى اۋىل شارۋاشىلىعىن مەملەكەتتىك قولداۋدىڭ جۇيەلى شارالارى تۋرالى حاباردار ەتتى. بۇگىندە «اۋىل اماناتى» جوباسى اياسىندا 89,9 ملرد تەڭگە سوماسىنا 14,2 مىڭ شاعىن نەسيە بەرىلدى. بۇل قادام 15,7 مىڭنان استام جۇمىس ورنىن قۇرۋعا مۇمكىندىك بەردى.
«Amanat» پارتياسىنىڭ حاتشىسى ەرجان جىلقىباەۆ جەرگىلىكتى جەردەگى پارتيالىقتار جاۋاپتى مەملەكەتتىك ورگاندارمەن بىرگە سايلاۋالدى ۋادەلەردىڭ جۇزەگە اسىرىلۋىنا تۇراقتى مونيتورينگ جۇرگىزۋدى جالعاستىرىپ جاتقانىن اتاپ ءوتتى.
«بۇگىندە سالىنىپ جاتقان نىسانداردا 600-دەن استام پارتيالىق باقىلاۋ بەكەتتەرى ورنالاستىرىلدى. وعان 12 مىڭنان استام پارتيا مۇشەسى جۇمىلدىرىلدى. ماسليحاتتارداعى پارتيا فراكتسيالارىنىڭ جيىندارىندا جەرگىلىكتى اتقارۋشى ورگانداردىڭ ەسەبى تىڭدالدى. سونداي-اق پارتيالىق باقىلاۋ كوميتەتى اتقارعان جۇمىستار ناتيجەسىندە سايلاۋالدى باعدارلامانى ورىنداماعانى نەمەسە ءتيىستى دەڭگەيدە جۇزەگە اسىرماعانى ءۇشىن 36 پارتيا مۇشەسى پارتيالىق جاۋاپكەرشىلىككە تارتىلدى», دەدى ول.
سونىمەن قاتار ءماجىلىس دەپۋتاتتارى پارتيانىڭ سايلاۋالدى باعدارلاماسىن جۇزەگە اسىرۋدىڭ كەيبىر پۋنكتتەرى بويىنشا, ونىڭ ىشىندە بالاباقشالار اشۋ, اعاش وتىرعىزۋ, الەۋمەتتىك جاعدايى وسال توپتارعا تۇرعىن ءۇي بەرۋ جانە تاعى باسقا باعىتتار بويىنشا ارتتا قالۋشىلىق بار ەكەنىنە ۇكىمەت مۇشەلەرىنىڭ نازارىن اۋداردى.
جيىندى قورىتىندىلاي كەلە, «Amanat» توراعاسى فراكتسيا مۇشەلەرى مەن مينيسترلەر پرەزيدەنتتىڭ سايلاۋالدى باعدارلاماسىنىڭ جۇيەلى جۇزەگە اسىرىلۋىن باقىلاۋدى كۇشەيتۋى كەرەك ەكەنىن اتاپ ءوتتى.
ء«ار دەپۋتات ءوزىنىڭ سايلاۋالدى ۋادەلەر بلوگىن مۇقيات تالداپ, مينيسترلىكتەرمەن تىعىز جۇمىس ىستەۋگە ءتيىس. قاجەت بولعان جاعدايدا بيۋدجەتتى قاراۋ كەزىندە ۇسىنىستار ەنگىزۋ كەرەك. بۇل – پرەزيدەنت قاسىم-جومارت توقاەۆتىڭ سايلاۋالدى باعدارلاماسى مەن جولداۋلارىنداعى ناقتى تاپسىرمالارى, «Amanat» پارتياسىنىڭ حالىققا بەرگەن ۋادەلەرى جانە ۇكىمەتتىڭ ەلدى دامىتۋ, ازاماتتاردىڭ ءال-اۋقاتىن جاقسارتۋ جونىندەگى مىندەتتەمەلەرى», دەدى ە.قوشانوۆ.
