بايقاۋعا ۇلان اۋدانىنداعى بارلىق 16 اۋىلدىق وكرۋگ جانە 45 ەلدى مەكەن قاتىسىپ, وزدەرىنىڭ بەرەكە-بىرلىكتەرىن كورسەتتى. تازالىققا ۇندەيتىن بايقاۋ قورىتىندىسى بويىنشا اۋدانداعى ەڭ ۇزدىك «تازا اۋىل» دەپ جانۇزاق اۋىلى تاڭدالىپ, جۇلدەلى 10 ملن تەڭگە كولەمىندە سەرتيفيكاتقا يە بولدى.
– اۋدانىمىزداعى بەلسەندىلەر مەن قورشاعان ورتاعا بەيجاي قاراي المايتىن ازاماتتار وسى اتالعان بايقاۋعا جەمىستى جۇمىس اتقارعاندارىن ماقتانىشپەن ايتا الامىز. اۋىلىمىزدىڭ كوركەيۋى مەن تازا بولۋى وسىنداي جانداردىڭ تىنىمسىز ەڭبەگىنىڭ ارقاسى. «تازا قازاقستان» اكتسياسى اياسىندا اۋدانىمىزدا ايتۋلى شارالار ىسكە استى. اتاپ ايتساق, كيەلى مەكەن اقباۋىر ارحەولوگيالىق كەشەنى تولىعىمەن تازالانىپ, اسۋبۇلاق ورمان شارۋاشىلىعىندا 22 مىڭ كوشەت وتىرعىزىلدى. سونداي-اق سىبە, دۇبىعالى جانە شىبىندى كول جاعالاۋلارى قوقىستان تازارتىلىپ, تاۆريا اۋىلدىق وكرۋگىندە «تازا بەيسەنبى» سەنبىلىگى ءوتتى. تۋعان جەردى جاسىل جەلەككە اينالدىرۋ باعىتىندا قىزمەت ەتەتىن وسىنداي جاناشىر جانە بەلسەندى ازاماتتار قاتارى ارتا بەرسىن, – دەيدى ۇلان اۋدانىنىڭ اكىمى دۋمان ەسداۋلەت ۇلى.
ەستەرىڭىزگە سالا كەتەيىك, بايقاۋدا كوميسسيا مۇشەلەرى ارىقتار مەن كانالداردى تازالاۋعا, اباتتاندىرۋعا باسا نازار اۋداردى. ءار اۋىلدان جۇزدەگەن ادامدار جۇمىلدىرىلىپ كوشەلەر تازالاندى, اباتتاندىرۋ جۇمىستارى جۇرگىزىلدى جانە جاسىل جەلەك وتىرعىزىلدى. سونىڭ ىشىندە ەڭبەكتەگەن بالادان, ەڭكەيگەن قارتقا دەيىن جانۇزاق اۋىلىنىڭ تۇرعىندارى بەرەكە-بىرلىك تانىتىپ, ءبىر ادامداي سەنبىلىككە بەلسەنە اتسالىستى. «اۋىلىنا قاراپ, ازاماتتارىن تانى» دەمەكشى, بۇل اۋىل بۇعان دەيىن ىشىمدىكتەن باس تارتقان اۋىل رەتىندە بىلسەك, ەندى مىنە, ۇلان اۋدانىنىڭ ەڭ ۇزدىك «تازا اۋىلى» اتاندى. بەرىلگەن 10 ملن تەڭگە قارجىنى اۋىل تۇرعىندارى وزدەرى اقىلداسا وتىرىپ, اۋىلدارىنا قاجەتتى دۇنيە سالۋعا جۇمساماق.
– «تازا اۋىل» بايقاۋى – اۋدان تۇرعىندارىن تازالىققا شاقىراتىن, تۋعان ولكەنى جاسىل جەلەككە اينالدىرۋعا ۇلەس قوساتىن الەۋمەتتىك ماڭىزى بار جوبا. سوڭعى جىلدارى اۋىلداردا اباتتاندىرىلعان اۋلالار كوبەيگەن. بۇل جىل سايىن وتكىزىلىپ كەلە جاتقان وسىنداي شارالاردىڭ ناتيجەسى. مۇنداي بايقاۋلار اۋىلدىڭ سانيتارلىق تازالىعىن جاقسارتۋعا سەپتىگىن تيگىزەدى. سونداي-اق ۇلان اۋدانى «تازا قازاقستان» ەكولوگيالىق اكتسياسى قورىتىندىسى بويىنشا شىعىس قازاقستان وبلىسىندا كوش باستاپ تۇر – دەيدى جاستار رەسۋرستىق ورتالىعىنىڭ باسشىسى سەرىك اسقابىلوۆ.
شىعىس قازاقستان وبلىسى,
ۇلان اۋدانى
