قاھارمان قايراتتىڭ ەل-جۇرتتى قايران قالدىرعان سول ءبىر ەرلىگىنە تاعى ءبىر كوز جۇگىرتىپ كورەلىك. 2008 جىلدىڭ 20 مامىرى. قاراعاندى قالالىق جول پوليتسياسى باتالونىنىڭ ينسپەكتورلارى, پوليتسيا اعا سەرجانتى قايرات جۇمابەكوۆ پەن ستارشينا دميتري پۋگاچقا قاراعاندىدان استانا قالاسىنا باعىتتالعان اۆتوبۋستاعى مەكتەپ وقۋشىلارىن امان-ەسەن اپارىپ كەلۋ تۋرالى تاپسىرما بەرىلەدى. قوس ينسپەكتوردىڭ باعىتتاۋىمەن ءۇش اۆتوبۋس ەلورداعا امان-ەسەن جەتەدى. قاراعاندىعا قايتار جولدا پوليتسيا كولىگىنىڭ تىزگىنىندە قايرات جۇمابەكوۆ بولادى. ولارعا قاراما-قارسى جول بويىمەن كەلە جاتقان تاس تيەلگەن جۇك كولىگى وزىمەن قاتارلاس جۇيتكىگەن جەڭىل اۆتوكولىكپەن جارىسىپ, ابايسىزدا جولدىڭ قارسى باعىتىنا شىعىپ كەتكەنىن بايقاماي قالادى. قاس پەن كوزدىڭ اراسىندا قارسى جولاققا شىعىپ كەتكەنىن سەزىنگەن جۇك كولىگى, جولدا كەلە جاتقان پاترۋل كولىگى مەن اۆتوبۋستاردى كورىپ وڭعا قاراي بۇرىلادى. جۇك كولىگىنىڭ اراقاشىقتىعى تىم جاقىن بولعاندىقتان, جەڭىل كولىككە سوقتىعىسادى. ءدال وسى جول اپاتى كەزىندە قايرات جۇمابەكوۆتىڭ الدىندا ەكى تاڭداۋ تۇردى. ءبىرىنشىسى – قارسى كەلە جاتقان كولىكتەن سىتىلىپ شىعىپ, وزدەرىن ساقتاۋ نەمەسە سوققىعا ءوزىن توسىپ, اۆتوبۋستى امان الىپ قالۋ. بىراق ول اردى تاڭدادى. اۆتوبۋستاعى بالالاردىڭ اماندىعىن ويلادى. ءوزىنىڭ ۇيىندە دە كىشكەنتاي ق ۇلىنشاقتارىنىڭ كۇتىپ وتىرعانىن بىلسە دە, باتىر ءوز موينىنا جۇكتەلگەن تاستاي تاپسىرمانى سەزىنىپ, كەساپاتقا قارسى تۇردى. سول جەردە اجال قۇشتى. ال قاسىنداعى سەرىگى اۋىر جاراقاتپەن اۋرۋحانا جەتكىزىلدى.
مىنە, سودان بەرگىدە 16 جىل زىرعىپ وتە شىقتى. باتىردىڭ ەسىمىن ۇلىقتاۋعا اۆتوبۋستاعى وقۋشىلار, وتباسى مەن تۋعان-تۋىستارى جينالدى. العاشقى ءسوزدى باتىردىڭ قاسىندا بولعان جولسەرىگى دميتري پۋگاچ الىپ, سول ءبىر اۋىر ءساتتى ەسىنە ءتۇسىردى.
– بارلىعى قاس-قاعىم ساتتە بولدى. «استانا – قاراعاندى» تاسجولىندا جۇك كولىگى الدىندا كەلە جاتقان جەڭىل كولىكتى باسىپ وزىپ, ءبىز جەتەگىمىزگە الىپ كەلە جاتقان اۆتوبۋستارعا قاراي قارسى باعىتقا شىقتى. قايرات تەز ارادا شەشىم قابىلداپ, جۇك كولىگى اۆتوبۋسقا سوعىلماۋ ءۇشىن ءوزىمىز مىنگەن قىزمەتتىك اۆتوكولىكپەن توسقاۋىل قويدى. ودان كەيىنگىسى ەسىمدە جوق. مەن جانساقتاۋ بولىمىنە ءتۇسىپ, ول جەردە ءتورت كۇن جاتتىم. ول ءوزىنىڭ قىزمەتىنە ادال بەرىلىپ, تاپسىرمانى انتىنا سايكەس سوڭىنا دەيىن ورىندادى. ەگەر ولاي جاساماعاندا اۆتوبۋستاعى بالالار قازا تاباتىن ەدى, – دەيدى دميتري پۋگاچ.
ەسكە الۋ كەشىنە قايرات جۇمابەكوۆتىڭ جارى نازگۇل, ۇلى عالىم مەن قىزى ديليارا استانادان ارنايى كەلىپ قاتىستى. عالىم قايرات ۇلى دا اكە جولىن جالعاپ, ىشكى ىستەر ورگانىندا قىزمەت ەتىپ ءجۇر. ول استانا قالالىق پوليتسيا دەپارتامەنتىنە قاراستى ەسىل اۋداندىق پوليتسيا باسقارماسىندا جەدەل ۋاكىل لاۋازىمىندا.
– اكەم ەر ازاماتقا ساي ءىس ىستەدى. ءوزىم كىشكەنتاي كەزىمنەن پوليتسيا قىزمەتكەرى بولۋدى ارماندادىم. انام قارسى بولسا دا, اكەمنىڭ ءىزىن جالعاعىم كەلدى. باتىردىڭ ۇلى ەكەنىمدى ماقتان ەتەمىن. وتباسىمىزبەن اكەمىزدى ەسكە الۋ كەشىنە كەلىپ, كوزىمىزگە ەرىكسىز جاس الدىق. اكەم ءوز ءومىرىن قيىپ, قۇتقارىپ قالعان 130 وقۋشى ءوسىپ-ءونىپ, ۇلكەن ازاماتتار بولىپتى. ءتىپتى كوبى وتباسىلى ەكەن. سولار باستاماشى بولىپ, ارىپتەستەرىمىز قولداپ, مىنەكەي, اكەمنىڭ ەسىمى جاڭعىرىپ جاتىر. العىستان باسقا ايتارىمىز جوق, – دەيدى عالىم قايرات ۇلى.
اۆتوبۋستىڭ ىشىندە بولعان وقۋشىلاردىڭ ءبىرى – 27 جاستاعى اسەمگۇل اباتوۆا. ەكى بالانىڭ اناسى. وتباسىمەن ساران قالاسىندا تۇرادى. بۇگىندە «قازتەلەراديودا» ينجەنەر قىزمەتىندە. 2008 جىلى اسەمگۇلدىڭ جاسى 11-دە بولعان ەكەن.
– استانانىڭ كورىكتى جەرلەرىن كورىپ, ءوزىمدى باقىتتى سەزىنىپ كەلە جاتتىم. جولدا ۇيىقتاپ كەتىپپىن. اۆتوبۋس كىلت توقتاعاندا الدىڭعى ورىندىققا باسىمدى سوقتىم. ءبارىمىز اڭ-تاڭ بولىپ قالدىق. سىرتقا شىققانىمدا اۋدارىلىپ جاتقان پوليتسەي كولىگىن كوردىم. بۇل قايعىلى جاعدايدان كەيىن ءبىز ءومىردى باعالاي باستادىق. جول-كولىك وقيعاسىنان كەيىن ءار جىلدىڭ 20 مامىرىندا انام شەلپەك ءپىسىرىپ, اكەم قۇران وقيدى. 16 جىل وتسە دە, ءبىز قايرات اعانىڭ ەرلىگىن ۇمىتپايمىز. مەن ءالى كۇنگە دەيىن ونىڭ وتباسىمەن ارالاسامىن, – دەيدى اسەمگۇل اباتوۆا.
ابىلايحان ق ۇلىمبەتوۆ تە قۇتقارىپ قالعان پوليتسەي قايرات جۇمابەكوۆتىڭ ەسىمىن اسا قادىرلەيدى. ول قاراعاندى قالاسىنىڭ بەدەلدى نەفرولوگ دارىگەرى. ءبىر ۇل تاربيەلەپ وتىر.
– سول قايعىلى جول-كولىك وقيعاسى ءالى كۇنگە دەيىن ەسىمدە. قايرات جۇمابەكوۆتىڭ ەسىمى مەنىڭ جۇرەگىمدە. مەكتەپ وقىپ جۇرگەندە مەن دە قايرات اعا سياقتى ەلىمە قىزمەت اتقارىپ, ەلىمە قول ۇشىمدى سوزعىم كەلدى. سوندىقتان, دارىگەر ماماندىعىن تاڭدادىم. وزىنە العىس ايتا المايمىز. سول سەبەپتى, وتباسىنا ريزاشىلىعىمىزدى جەتكىزۋگە ارنايى كەلدىك وسىندا, – دەيدى ابىلايحان ق ۇلىمبەتوۆ.
يگىلىكتى ءىس-شارانىڭ سوڭىندا ىشكى ىستەر مينيسترلىگىنىڭ رەسمي وكىلى شىڭعىس الەكەشەۆ قايرات جۇمابەكوۆتىڭ ەرلىگى جايىندا تۇسىرىلگەن بەينەفيلم بارلىق مەكتەپتە كورسەتىلەتىنىن, سول ارقىلى باتىردىڭ قايسارلىعىن وسكەلەڭ ۇرپاقتىڭ بويىنا ءسىڭىرۋ قاجەتتىگىن اتاپ ءوتتى.
قاراعاندى وبلىسى
