فوتو: قر پارلامەنتى سەناتىنىڭ ءباسپاسوز قىزمەتى
ماۋلەن اشىمباەۆ جۋرناليستەر قاۋىمىن قۇتتىقتاي كەلە, باق ادىلەتتى قازاقستان قۇرۋ باعدارىن ىسكە اسىرۋعا بەلسەندى قاتىسىپ كەلە جاتقان ماڭىزدى ينستيتۋتتاردىڭ ءبىرى ەكەنىن ايتتى. سەنات سپيكەرى جۋرناليستەردىڭ پارلامەنتتىك پۋلى زاڭ شىعارۋشى ورگان مەن قوعامدى بايلانىستىراتىن مانگە يە ەكەنىن دە تىلگە تيەك ەتتى. سونداي-اق ول ەلىمىزدە بولىپ جاتقان وقيعالار, مەملەكەت باسشىسىنىڭ باستاماسىمەن قولعا الىنعان رەفورمالار, سەناتورلاردىڭ جۇمىسى جانە زاڭنامالىق وزگەرىستەر مەن قابىلدانعان شەشىمدەر جايىندا اقپارات تاراتىپ, ولاردىڭ ماڭىزىن حالىققا دايەكتى تۇردە جەتكىزىپ جۇرگەن تىلشىلەر قاۋىمى مەملەكەتىمىزدىڭ دامۋىنا ۇلكەن ۇلەس قوسىپ وتىرعانىن اتاپ ءوتتى.
«سوڭعى جىلدارى ەلىمىزدە مەملەكەت باسشىسىنىڭ باستاماسىمەن ادىلەتتى قازاقستان قۇرۋ جولىندا اۋقىمدى جۇمىس اتقارىلىپ جاتىر. پرەزيدەنتىمىز قاسىم-جومارت كەمەل ۇلى توقاەۆ اتاپ وتكەندەي, بۇل – بارشا ازاماتتىڭ الدىندا تۇرعان ماڭىزدى مىندەت. وسىعان بايلانىستى كەشەندى ساياسي, ەكونوميكالىق, الەۋمەتتىك رەفورمالار ىسكە اسىرىلىپ كەلەدى. ۇلتتىق قۇندىلىقتاردى دارىپتەۋ, يدەولوگيا باعىتىندا دا ماڭىزدى قادامدار جاسالىپ جاتىر. مەملەكەت باسشىسى ۇلتتىق قۇرىلتايدىڭ ءۇشىنشى وتىرىسىندا وسى سالاداعى نەگىزگى باسىمدىقتاردى بەلگىلەپ بەردى. سول قاعيداتتاردى جانە اتقارىلىپ جاتقان جۇمىستار مەن قابىلدانعان زاڭداردى حالىققا جەتكىزىپ, ولاردىڭ ءمانىن تۇسىندىرۋدە بۇقارالىق اقپارات قۇرالدارى قىزمەتكەرلەرىنىڭ ءرولى زور», دەدى ماۋلەن اشىمباەۆ.
بۇل رەتتە سەنات جۇمىسىنداعى باسىم باعىتتاردىڭ ءبىرى وڭىرلەردىڭ دامۋىنا ىقپال ەتۋ, سونداي-اق, جەرگىلىكتى وكىلدى جانە اتقارۋشى ورگاندارمەن بىرلەسىپ وزەكتى پروبلەمالاردى شەشۋ ەكەنى بەلگىلى. وسىعان بايلانىستى ماۋلەن اشىمباەۆ باق-نىڭ بولعان وقيعانى جەدەل جانە وبەكتيۆتى جاريالاۋى, سەناتورلاردىڭ دەپۋتاتتىق ساۋالدارى بويىنشا سيۋجەتتەرى مەن ماقالالارى, تۇراقتى كوميتەتتەردىڭ قىزمەتى مەن قابىلدانىپ جاتقان زاڭدار تۋرالى تالدامالىق ماتەريالدارى اسا ماڭىزدى ەكەنىنە باسا نازار اۋداردى. سوندىقتان دا سەناتورلاردىڭ باق وكىلدەرىمەن بايلانىستى ودان ءارى نىعايتۋعا مۇددەلى ەكەندەرىن ايتتى.
«پارلامەنت وسى سەسسيادا 100-گە جۋىق زاڭ قابىلدادى. بارلىق زاڭ حالىقتىڭ ءومىر ءسۇرۋ ساپاسىن ارتتىرۋعا, ەلىمىزدى ودان ءارى دامىتۋعا جانە ازاماتتارىمىزدىڭ قۇقىقتارىن قورعاۋعا ارنالعان. وسى رەتتە ايەلدەردىڭ قۇقىقتارى مەن بالالاردىڭ قاۋىپسىزدىگىن قورعاۋعا, قوعامدىق باقىلاۋدى ارتتىرۋعا جانە مەملەكەتتىك ساتىپ الۋ جۇيەسىن جەتىلدىرۋگە ارنالعان زاڭداردى ەرەكشە اتاپ وتكەن ءجون. ماڭىزدى نورمالاردىڭ قاتارىندا «ماسس-مەديا تۋرالى» زاڭ دا بار. بۇل قۇجات ماسس-مەديا سالاسىنداعى زاڭنامانى جۇيەلى تۇردە جەتىلدىرۋدى كوزدەيدى. زاڭ شىعارۋ قىزمەتىمەن بىرگە سەنات ماڭىزدى ماسەلەلەرگە ارنالعان ۇكىمەت ساعاتتارى, پارلامەنتتىك تىڭداۋلار, دوڭگەلەك ۇستەلدەر جانە حالىقارالىق ءىس-شارالار وتكىزدى. سەناتورلاردىڭ وڭىرلەرگە ساپارىن دا ايرىقشا اتاپ وتكەن ءجون. وسى جۇمىستىڭ بارىنە وزدەرىڭىز دە قاتىسىپ, ولاردىڭ ماڭىزىن حالىققا جەتكىزىپ كەلەسىزدەر. سەنات ءاردايىم بۇقارالىق اقپارات قۇرالدارىمەن تىعىز بايلانىستا جۇمىس ىستەيدى. الداعى ۋاقىتتا وسى بايلانىس ودان ءارى ارتادى دەپ سەنەمىن», – دەپ, ماۋلەن اشىمباەۆ باق وكىلدەرىنە زور دەنساۋلىق, باق-بەرەكە جانە شىعارماشىلىق تابىس تىلەدى.
ايتا كەتەرلىگى, بيىل «پاراسات» بايقاۋىنا قاتىسۋعا تەلەارنالار, راديو, گازەت, اقپارات پورتالدارى جانە باسقا دا مەديادان ەلىمىز بويىنشا 120-عا جۋىق جۇمىس كەلىپ ءتۇستى.
2024 جىلعى «پاراسات» بايقاۋىنىڭ جەڭىمپازدارى
ۇزدىك تەلەۆيزيالىق ماتەريال: ايداربەك بالعابەكوۆ – «24KZ» تەلەارناسىنىڭ سولتۇستىك قازاقستان وبلىسىنداعى مەنشىكتى ءتىلشىسى, فاريزا بولاتبەك – «Atameken Business» تەلەارناسىنىڭ ءتىلشىسى.
ۇزدىك راديوماتەريال: الماس بايدراحمانوۆ – «قازاق راديوسىنىڭ» ءتىلشىسى.
مەرزىمدى باسپاسوزدەگى ۇزدىك ماتەريال: ەسكەندىر زۇلقارناي – «Egemen Qazaqstan» گازەتىنىڭ ءتىلشىسى, ەكاتەرينا باينياشەۆا – «ناش كوستاناي» گازەتىنىڭ ءتىلشىسى.
ينتەرنەت-باسىلىمداعى ۇزدىك جاريالانىم: رۋسلان عابباسوۆ – «قازاقپارات» حالىقارالىق اقپارات اگەنتتىگىنىڭ ءتىلشىسى, ايگەرىم ۋممات – «Informburo.kz» اقپارات اگەنتتىگىنىڭ ءتىلشىسى.
الەۋمەتتىك جەلىلەردەگى ۇزدىك جازبا: بولات بۇحارباي – «Jaqsy Bolady» Youtube-ارناسىنىڭ اۆتور-جۇرگىزۋشىسى, اباي تىلەنشيەۆ – «Abay Live» Youtube-ارناسىنىڭ اۆتور-جۇرگىزۋشىسى, رەنات تاشكينباەۆ – «درۋگيە مەستا» بلوگىنىڭ اۆتورى.
جىلدىڭ ارنايى سىيلىعى – «ۇزدىك اناليتيكالىق ماتەريال»: امانگەلدى سەيىتحان – «Qazaqstan» ۇلتتىق تەلەارناسىنىڭ ءتىلشىسى, ارۋجان ءدارىباي – «Tengrinews.kz» اقپاراتتىق ينتەرنەت-پورتالىنىڭ ءتىلشىسى, لاۋرا تۇسىپبەكوۆا – «كازاحستانسكايا پراۆدا» گازەتىنىڭ ءتىلشىسى.
